Македонија
Пациентката која починала вчера имала акутна леукемија, Таравари тврди дека нема докторска грешка

Починатата пациентка имала акутна леукемија и била инфицирана со ковид-19, изјави министерот за здравство, Арбен Таравари, кој тврди дека докторска грешка не е причина за смртта, а пациентката била лекувана на Клиниката за Хематологија со сите протоколи.
Се работи за жена на 48 годшина возраст.
„Информиран сум дека за пациентката е консултиран и анестезиолог и инфектолог, нема лекарска грешка, даден е целосен третман. Треба да знаеме од што починала пациентката. Кај акутна леукемија следува тежок период по добиена терапија. Гарантирам дека пациентката е третирана по сите протоколи“, рече Таравари одговарајќи на новинарски прашања.
Министерот ги отфрли обвинувањата дека пациентката починала оти не била примена во Инфективната клиника каде се реновира ургентниот дел.
„Оддели за интензивна нега има скоро на сите клиники, респиратори има скоро на сите клиники. Јас не знам за некој случај дека пациент е вратен од некоја установа“, рече Таравари.
СДСМ побара истрага и одговорност за смртта на пациентката, обвинувајќи дека иако била во лоша состојба првин не била примена на интензивна нега во Инфективната Клиника, а не била примена ниту на Карил, по што починала.
„Министерот Таравари да не чека како што чекаше вчера туку веднаш да преземе мерки за целосно расчистување на случајот. Но и за средување на состојбата на Инфективна клиника за да не се случи нова жртва“, изјави портпаролката на СДСМ, Богданка Кузеска, одговарајќи на новинарски прашања.
Ги повика и директорите на Карил и Инфективната клиника да излезат пред јавноста и да одоговорат зошто не била примена пациентката.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Шукова: Преку БРТ системот, јавниот превоз во Скопје ќе го решиме до средината на 2028

Јавниот превоз во Скопје е една од клучните слабости на Градот. ДПМНЕ и Аросвска ветуваа нови еколошки автобуси, бесплатен јавен превоз и ред во јавниот сообраќај. Денес – нема нови автобуси, а постојните се стари, нечисти, доцнат премногу, а некогаш и не доаѓаат воопшто. Дел од приградските линии се укинати или нередовни. Градскиот јавен транспорт е крајно небезбеден и во колапс, вели Каја Шукова, кандидатка за градоначалничка на Скопје и потпретседателка на СДСМ.
Шукова додава дека решавањето на јавниот превоз не смее да доцни ни ден повеќе.
Тоа, како што додава, е услов за квалитетн живот на сите кои живеат во Скопје.
„И на тие што се возат и на тие што не се возат. На сите ни треба помалку метеж, добро поврзани општини, побрз, безбеден и одржлив јавен транспорт, транспорт кој не ги труе граѓаните на Скопје.
Решението за ова постои а јас, заедно со Градот ќе го реализирам. Како Градоначалничка на Скопје, итно ќе започнам со реализација на проектот БРТ, кој ќе обезбеди нова модерна мрежа на урбаниот транспорт во Скопје, преку коридори кои се резервирани само за автобуси. Проектот вклучува и набавка на нови еколошки автобуси и ревитализација на две депоа за автобусите“.
За ова, како што рече, одамна се обезбедени 40 милиони евра од Европската банка за обнова и развој.
„Нема веќе чекање и одлагање! Со силна одлучност, заради потребата на секој граѓанин на Скопје, гарантирам дека до средината на 2028 година, скопјани, од Ѓорче Петров, преку Центар до Ново Лисиче во Аеродром ќе се возат со првата линија на БРТ системот за само половина час, брзо и навреме – без доцнења, без гужви, безбедно. БРТ обезбедува линија од 13 км во една насока, со 21 автобуска постројка и 2 терминали, со 29 автобуси, за неверојатен број од 65.000 патници на ден“.
Шукова нагласи дека ќе се работи и на втората линија север – југ, но и на набавка на нови еколошки автобуси за останатите сообраќајни линии низ Скопје, со што, истакна таа, постојните стари и неефикасни автобуси ќе бидат целосно заменети.
Потенцира дела БРТ е решението позади кое стои и кое драстично ќе ја подобри состојбата со автобускиот превоз во Скопје.
Македонија
Меџити го претстави носителот на листата за советници за Општина Чаир: Мухамед Муртези, активист од граѓанскиот сектор

Кандидатот за градоначалник на Општина Чаир, Изет Меџити, го претстави името на носителот на листата за Општинскиот совет, Мухамед Муртези.
Во видео-обраќање на социјалните мрежи, Меџити напиша: „Денес сакам да го претставам носителот на листата на советници на ВЛЕН за Општина Чаир, докторот, интелектуалецот, активистот на граѓанското општество и човек со високи вредности, Мухамед Муртези. Заедно кон големата победа.
Само за тебе Чаир“, напиша Меџити.
Муртези за локалните избори во октомври за првпат се вклучува во партиско-политичка дејност. Тој е носител на листата на советници на „Вреди“ за Општина Чаир и кандидат за претседател на Советот. Целта, како што појаснуваат на неговото политичко ангажирање е да даде позитивен придонес и да остави добра трага и во оваа област.
„Нашата визија, заедно со идниот градоначалник на Чаир, Изет Меџити, е еден поубав, почист и побезбеден Чаир. Поквалитетно образование и наука, поразвиена култура и спорт, подобар и подостоинствен живот. Затоа што жителите на Чаир го заслужуваат тоа и јас верувам дека ова е остварливо со добра волја, голема посветеност и чесна работа. Затоа ја бараме вашата поддршка на 19 октомври. За нашиот Чаир,“ изјави Муртези.
Македонија
Герасимовски: Го обновуваме паркингот на „Петар Поп Арсов“, обезбедуваме повеќе ред и подобри услови

Службите на општина Центар интензивно работат на обновување на паркинг просторот на улицата „Петар Поп Арсов“, лоциран зад Вучко.
Во тек е асфалтирање и уредување на паркингот со површина од 550 метри квадратни. По завршувањето на градежните работи, следува обележување на паркинг- местата, по што просторот ќе биде целосно функционален и подготвен за користење, извести Општината.
Реновирањето на паркингот се изведува на барање на жителите во рамки на караванот „Се гледаме во маало”, кои се соочуваат со хаотичната состојба при паркирањето и недостиг на паркинг-места, велат од Општината.
„Со уредувањето и обележувањето на овој паркинг-простор им излегуваме во пресрет на потребите на центарци, овозможувајќи организирано и поефикасно паркирање. Целта ни е да создадеме безбеден и уреден простор, со современи стандарди и подобра пристапност,“ рече градоначалникот Герасимовски.
Со овој зафат, Центар продолжува со инвестиции во подобрување на урбаната и комунална инфраструктура, се додава во соопштението на Општината.