Македонија
Пендаровски во Подгорица: Македонија ќе работи на премостување на поделбите и градење доверба во ЈИЕ

Претседателот Стево Пендаровски, денеска, во Подгорица, Црна Гора, се обрати на самитот на шефови на држави и влади на земјите членки на Процесот за соработка во Југоисточна Европа (ПСЈИЕ).
Пендаровски во своето обраќање изрази благодарност до Црна Гора за направените напори изминатата година за време на нивното претседавање со ПСЈИЕ и ги најави приоритетите на македонското претседавање со оваа иницијатива. Претседателот истакна дека како претседавачи ќе се водиме од принципите наведени во основачките документи, кои се од 1996 година, односно добрососедските односи, стабилноста, безбедноста, соработката во ЈИЕ и интеграцијата во евро-атлантската заедница на слободни и демократски народи. Тој посочи дека овие принципи се исто толку релевантни и денес како што биле пред две децении и потсети дека оттогаш бил постигнат значителен напредок во однос на политичката и економската соработка, како што е потврдено со спроведувањето на Стратегијата ЈИЕ 2030 и воспоставувањето на заедничкиот регионален пазар.
Во своето обраќање Пендаровски го претстави слоганот „Премостување на поделбите, градење доверба“ како водечка тема за македонското претседавање, со посебен фокус на помирувањето, регионалната соработка и забрзувањето на евро-атлантските интеграции.
Претседателот Пендаровски, нотирајќи ги етничките тензии во регионот, кои лесно се искористуваат од надворешни актери, како и падот на евроентузијазмот, порача дека од суштинско значење е да вложиме максимални напори за да се спротивставиме на овие тенденции преку дијалог и барање заемно прифатливи решенија со разбирање и почитување еден кон друг.
Тој нагласи дека Северна Македонија посветено го следи овој пат, како што покажаа Охридскиот рамковен договор, преспанскиот договор, договорот за добрососедство со Република Бугарија и одобрувањето на преговарачката рамка на ЕУ минатиот јули, што ни овозможи да ги отвориме пристапните преговори.
Покрај ова, говорејќи во контекст на руската агресија против Украина, ја нагласи итноста за интегрирање на регионот на Западен Балкан во ЕУ и притоа изрази очекување за поддршка од страна на земјите членки на ЕУ за обезбедување опипливи придобивки, вклучително и пристап до фондовите на ЕУ во соодветните области во текот на целиот процес не чекајќи го неговото завршување.
Во овој контекст претседателот Пендаровски изрази задоволство од неодамнешната објава на претседателот на Европската комисија за новиот план за раст за Западен Балкан за кој рече дека е целосно во согласност со нашето барање да се добие одредена предност од членството во ЕУ пред формалното членство.
Претседателот во своето обраќање посочи дека и подобрувањето на енергетската безбедност во ЈИЕ, изградбата на трансевропските транспортни коридори и промовирањето на културните размени исто така ќе се рангираат високо на нашата листа на приоритети за кои изрази уверување дека ќе им служат на пошироките напори на нашата платформа и ќе го одржат просперитетот на целиот регион.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Обилни дождови, студ и снег на планините – од среда промена на времето

Утре времето ќе биде променливо облачно со сончеви периоди. Ќе дува слаб до умерен северен ветер. Минималните температури ќе се движат од 5 до 14, а максималните од 17 до 24 степени.
Во Скопје ќе преовладува слично време – променливо облачно со сончеви периоди и слаб северен ветер. Утринската температура ќе се спушти до 12, а дневната ќе достигне до 22 степени.
Од среда попладне до петок се очекува нов влажен бран со врнежи од дожд, локално пообилни над 30 литри на метар квадратен. Во четврток и петок, со продор на постудена воздушна маса и засилен северен ветер, на повисоките планини ќе има услови за повремен снег. Температурите значително ќе опаднат.
За време на викендот се очекува стабилизирање на времето и постепен пораст на дневните температури.
Македонија
Судот оваа недела ја завршува оценката на обвинението за „Пулс“

Скопскиот Кривичен суд најави дека до петок ќе ја донесе одлуката дали обвинението за пожарот во кочанската дискотека ќе биде прифатено. Судиите треба да утврдат дали актот е јасен, правно издржан и поткрепен со доволно докази.
Постапката се одолговлекуваше поради тоа што дел од адвокатите на обвинетите не биле достапни за прием на документацијата, но сега, според судот, сите рокови истекуваат на 3 октомври.
Премиерот Христијан Мицкоски изрази незадоволство од начинот на кој обвинителството ја води постапката и порача дека сите поврзани со случајот мора да одговараат. Од опозициската СДСМ, пак, обвинија дека власта ги штити своите функционери кои биле чести гости во дискотеката.
Во пожарот загинаа 62 млади луѓе. Паралелно се води и истрага за 29 полициски службеници, за кои сè уште се анализираат доказите.
Македонија
Можност за воведување на нови авиолинии, тема на средбата меѓу вицепремиерот Николоски и шведскиот амбасадор Солстром

Заменик претседателот на Владата и министер за транспорт Александар Николоски денеска оствари работна средба со новоименуваниот амбасадорот на Шведска, Ола Солстром.
На средбата, вицепремиерот Николоски го запозна амбасадорот со владината програма во делот на капиталните проекти и вклученоста на Македонија во регионалните инфраструктурни проекти со што сe дава придонес во развој и промоција на регионалната соработка.
Се разговараше и за можностите и услови за инвестирање што ги нуди Македонија и јакнење на економската соработка.
Исто така, вицепремиерот Николоски ја отвори и темата за поквалитетна поврзаност меѓу двете земји и можностите за зголемување на авиолиниите меѓу Македонија и Шведска.
На средбата беа потврдени добрите билатерални односи меѓу Македонија и Шведска кои традиционалнo се пријателски. Двајцата соговорници ја нагласија потребата од интензивирање на соработката во дејностите од заеднички интерес за двете земји.