Македонија
Пендаровски: Кога папата и Саудиска Арабија ги затворија храмовите, не гледам зошто нашите верски заедници не би го почитувале тоа

За одлуката на МПЦ верниците да се причестуваат од иста лажичка, да јадат леб од иста рака, односно храмовите за Велигден да бидат отворени, претседателот Стево Пендаровски посочува дека не гледа зошто во моменти кога папата или најсветите места во Саудиска Арабија ги затвориле храмовите, нашите верски заедници не би го почитувале тоа.
„На 20 март оваа година саудиските власти донесоа одлука за затворање на двете најсвети џамии за секој муслиман во светот бидејќи таква е ситуацијата. Бидејќи здравјето на верниците е најважно и во оваа ситуација без преседан, секој верник, ќе најде начин како да ја практикува верата. Ако тоа го прави папата или најсветите места, така да се однесуваат и да бидат, дури и затворени во оваа ситуација, не можам да видам зошто нашите верски заедници тоа не би го почитувале“, рече Пендаровски.
Тој вели дека го поздравува тоа што МПЦ и ИВЗ постојано повторуваат дека сите верници треба да се придржуваат до мерките на Владата, меѓу која е и да се ограничи движењето.
„Да не излезе дека јас ја критикувам политиката на раководствата на најголемите верски заедници кај нас, треба да го кажеме и тоа дека раководствата на МПЦ и ИВЗ до овој момент во сите свои јавни објави и во сите настапи ги поддржуваат мерките на Владата и апелираат до верниците најсветите празници да ги поминат во домашни услови или со почитување на препораката да нема повеќе од петмина во еден простор. Има време кога ќе заврши пандемијата и да се вратиме на практикување на верата онака како што тоа секоја од верите го налага“, кажа Пендаровски.
Претседателот рече дека прописите важат за сите, без разлика на која вероисповед припаѓаат.
„Во нашата држава никој не смее да биде привилегиран, ниту да биде дискриминиран по верска, религиозна основа. Ниту еден верник не може да има повеќе права од оние што не се верници или верник од една вероисповед да има повеќе права од некој од друга вероисповед. Следната недела почнуваат рамазанските пости, кои ќе траат еден месец. Значен дел од нив се одвива во време кога треба да има полициски час. Како ќе се поставиме сега, така државата мора да се постави и кон припадниците на друга вероисповед. За припадниците на која било вероисповед, правилата, прописите, уредбите на Владата, важат и за нив, важат и за мене, важат за кој било во оваа држава и мора да се почитуваат без резерва. Не може да се прогледува низ прсти на една категорија луѓе, а за друга да не важи“, рече Пендаровски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Финансиската полиција за 9 месеци откри криминали од 30 милиони евра што е доказ дека расчистуваме со криминалот

Финансиската полиција за 9 месеци откри криминали од 30 милиони евра што е доказ дека расчистуваме со криминалот, и правиме чекор напред во градењето на темелите на промените, изјави премиерот Христијан Мицкоски по повод одбележување на денот на Управата на финансиската полиција.
„Кога ја презедовме одговорноста за управување со државата, знаевме дека ќе мораме да се соочиме со еден од најголемите предизвици – да ја вратиме правдата таму каде што била протерана, да изградиме институции што не се плашат, туку делуваат. Наша обврска е да воспоставиме систем кој ќе ги штити чесните, а ќе ги изведува пред лице на правдата оние што ја краделе државата. Денес, токму тука, испраќаме јасна порака – тоа време дојде“, рече Мицкоски.
Како што рече, сериозен е податокот што од 1 септември 2024 до 10 јуни 2025 година, Финансиската полиција поднела 36 кривични пријави, со кои е откриена штета или е утврдена и противправна имотна корист во висина од речиси 30 милиони евра. Овие пари се на граѓаните, и ова е пример како се штити имиџот на државата, рече премиерот.
Зад бројките, изјави Мицкоски, се кријат конкретни злоупотреби и поединци кои мислеле дека државата е нивен имот. И во таа битка за правда нема партиска припадност нема етничка припадност. Правдата е слепа, но достижна, додаде премиерот според кој бројките се најсилен доказ дека државата се буди и дејствува, нема веќе недопирливи и молк.
„Да не се заборави дека борбата против криминалот не е борба на една институција. Тоа е борба за душата на државата, за заедничката иднина. Каква иднина ќе оставиме за нашите деца, зависи од тоа сега што ќе го направиме. А Македонија е уморна од чекање и нема втора шанса, ова всушност е последната шанса. Ние не градиме само економија и патишта – ние градиме правда. Ние не зборуваме само за развој – ние зборуваме за ослободување од стравот, од неказнивоста, од мафијата во клучните сектори. На сите кои ја злоупотребиле довербата – им порачуваме: Ќе одговарате. На сите кои чесно работат во институциите – им порачуваме: Продолжете храбро. Вие сте чувари на државата. И на граѓаните – да знаете: Оваа Влада стои зад вас. Не зад криминалците. Не зад тајкуните. Туку зад секој човек што верува во правда“, додаде Мицкоски.
Македонија
Николоски изјави дека Арсовска е надлежна за постапување за дивоградбите, градоначалничката го нарече неписмен

Министерот за транспорт и врски, Александар Николоски и градоначалничката Данела Арсовска не се согласуваат околу надлежноста за дивоградбите во Чаир.
Одговарајќи на пратеничко прашање за дивоградбите во Собранието, Николоски рече дека Министерството за транспорт и врски има надлежност да постапува само за градби од А категорија, а за градбите за кои говори секојдневно градоначалничката од Град Скопје надлежен е Градот.
Според Николоски, настапите на градоначалничката Данела Арсовска се спектакли, бидејќи како градска власт, таа има право да постапи ако се утврди дека одредени објекти се дивоградби.
„Мислам дека е коректно да се информира јавноста дека целосна надлежност има градоначалникот на Град Скопје со соодветната градежна инспекција и наместо да се прават спектакли, нека излезат со градежна инспекција и нека утврдат. Доколку има дивоградби, истите треба да се срушат. Доколку не сака да ги сруши инвеститорот, треба градот да распише тендер за фирма за рушење и таа фирма да ги сруши, а потоа трошоците паѓаат на товар на оној кој бесправно градел. И да поднесе сооветна пријава до надлежното обвинителство и кривично да се одговара, а целокупниот имот доколку е изграден на земјиште на Република Македонија, затоа што има и такви индиции што се изнесуваат во јавноста, се конфискува“, рече Николоски.
Додаде дека секојдневните спектакли во јавност, а ниедно од правните дејствија не се направени, може да не носи до други заклучоци дали позадината е мотвирана од политичката партија ДУИ и од одредени релации што градоначалничката ги има со високи функционери на ДУИ.
Арсовска се огласи преку статус на социјалните мрежи: „Ќе му пише ли некој на неписмениов што глуми министер дека Град Скопје согласно закон е единствена од 81 општина што нема градежна инспекција (пак да потенцирам за неписмениов аман така е утврдено со закон).
„Има ли некој од неговите 500 партиски експерти, на корумпираниов што не можеше да добие безбедносен сертификат за да биде министер за надворешни работи или за одбрана, па мора да го трпиме да лупа глупости ко министер за транспорт да му каже дека негов орган е Државниот инспекторат за градежништво“, напиша Арсовска.
Понатаму додаде дека за да го сруши Вики (така го нарекува градоначалникот Висар Ганиу) на министерот му требаат интегритет и храброст.
Македонија
Викендов прскање против комарци во Скопје

Градот Скопје ги известува граѓаните дека на 28 и на 29.06.2025 година (сабота и недела) во раните утрински часови ќе се реализира авионска дезинсекција против возрасни форми на комарци, а на 30.06.2025 година (понеделник) ќе почне терестрична дезинсекција против возрасни форми на комарци.
Терестричната дезинсекција против возрасни форми на комарци на подрачјето на градот Скопје ќе се реализира од 30.06 (понеделник) до 03.07.2025 (четврток), во периодот од 22.00 до 03.00 часот, наредниот ден.
Доколку временските услови не го дозволуваат вршењето на дезинсекцијата, дезинсекција ќе се изврши првиот нареден ден, кога временските услови ќе бидат поволни, во истиот термин.
Се известуваат пчеларите навремено да ги преземат потребните мерки за заштита на пчелите.