Македонија
Пендаровски контра Заев: Амбасадорите имаат право да ги штитат бизнисите на своите граѓани

Амбасадорите имаат право да ги штитат приватните бизниси на своите граѓани, смета претседателот Стево Пендаровски.
Тој ги коментира вчерашните најави на експремиерот Зоран Заев дека ќе го тужи австрискиот амбасадор Георг Вуцас, кој претходно побара да се сменат судии и обвинители во случај со фирма поврзана со роднина на Заев.
Пендаровски вели дека и нашите амбасадори, кои ја претставуваат нашата држава во странство, имаат обврска да ги штитат интересите и на приватните бизниси на нашите граѓани во странство, а не само на институциите.
„Го следам случајот и слушнав коментари дека австрискиот амбасадор наводно се меша во нашите внатрешни работи. Но, тука не станува збор за никакво мешање во нашите внатрешни работи оти секој амбасадор има легитимно право и обврска да си ги штити интересите на својата земја. Вчера видовме реакција и од поранешниот премиер Зоран Заев, кој упати на институционална разврска, па очекувам македонските институции да утврдат дали навистина имало непочитување на меѓународна арбитража“, рече Пендаровски.
Вчера, поранешниот премиер Зоран Заев порача дека ќе го тужи австрискиот амбасадор ако уште еднаш го спомене неговото име во негативна конотација.
Неговата реакција доаѓа по соопштението што го испрати австриската амбасада до медиумите, во кое бара смена на судии и обвинители што постапувале во спор меѓу австриска и валандовска компанија и обвинува дека Австријците не може да наплатат долг од 4,5 милиони евра иако имало пресуда на Меѓународниот арбитражен суд во Виена.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Средба Исени – Филипиду: Со заеднички сили во управување со миграциите и борбата со илегалната миграција

Заменик Министерот за внатрешни работи Астрит Исени денеска оствари работна средба со делегација од Амбасадата на Република Грција во Скопје, Н.Е. Софија Филипиду. Во придружба на почитуваната Амбасадорка беа и Димитрис Каиридис, поранешен министер за миграција и азил, и полициското аташе на Република Грција во земјава, Димитриос Лиаскос.
На средбата Заменик Министерот Исени ја подвлече важноста, но и посветеноста на Министерството за внатрешни работи на Република Северна Македонија за продлабочување на меѓусебната соработка и на стратешко и на оперативно ниво, истакнувајќи притоа дека единствено со заеднички сили и волја можеме да постигнеме успех и да бидеме ефикасни во борбата против илегалната миграција и воопшто во управувањето со миграциите.
Двете страни воедно ја потврдија и неопходноста за соработување и содејство не само на билатерална основа, туку и во рамки на регионални и меѓународни иницијативи, каде што токму можноста за разменување на искуства, приоритети и предизвици може да даде голем придонес во управувањето со миграциите и во борбата со сите форми на криминал, истовремено овозможувајќи воспоставување и зајакнување на нови и постоечки партнерства.
Средбата заврши со уверување од двете страни за натамошна интензивна соработка во сите области на дејствување на Министерството за внатрешни работи.
Македонија
Словенија ја поддржува реформата на јавната администрација во Македонија

Министерот за јавна администрација на Република Словенија, Франк Пропс, во рамки на својата официјална посета на Скопје, одржа интензивни работни состаноци со претставници на Министерството за јавна администрација, со цел продлабочување на соработката и размена на успешни практики во јавниот сектор.
Во фокусот на разговорите беа реформата на јавната администрација, професионализацијата на административните службеници и европската интеграција.
Состаноците со Секторот за реформа на јавната администрација и Секторот за Академијата за стручно усовршување на административни службеници резултираа со конкретни заклучоци и чекори за соработка во следните области:
-Подобрување на системот за управување со човечките ресурси – усвојување на мерит-системот и најдобрите европски практики за селекција, напредување и обука на административните службеници.
-Јакнење на капацитетите на Академијата за обука – воведување на нови, практично ориентирани програми за стручно усовршување и професионален развој.
-Следење и евалуација на реформите – воведување механизми за мерење на ефектите од реформските политики и нивно прилагодување согласно европските стандарди.
Министерот Минчев нагласи дека реформата на јавната администрација не е само техничко, туку и суштинско политичко прашање кое ја одредува иднината на европската интеграција на државата.
„Професионална и ефикасна администрација е клучна за изградба на функционална држава. Нашата цел е создавање модерен јавен сервис кој ќе одговара на потребите на граѓаните, а не на партиските интереси. Во тој процес, поддршката од Словенија и од ЕУ е од суштинско значење“ – истакна тој.
Министерот Пропс ја потврди поддршката на Словенија за реформите, нагласувајќи дека Република Македонија треба да остане на европскиот пат и дека модернизацијата на администрацијата е клучна во тој процес.
„Реформите во јавната администрација се меѓу најсложените, но и најважните чекори во секоја држава што се стреми кон членство во ЕУ. Република Македонија има политичка волја и капацитет да успее во овој процес, а Словенија е подготвена да ја поддржи со своето искуство“ – рече министерот Пропс.
Официјалната посета на словенечката делегација испраќа јасна порака дека реформите се стратешки приоритет на Владата и дека нашата држава е подготвена да ја зајакне својата администрација во согласност со европските вредности.
Македонија
(Фотогалерија) Расцветаа јапонските цреши во Градскиот парк во Скопје

Пролетта ја донесе својата најубава страна во Градскиот парк во Скопје, а најголемо внимание кај посетителите привлекуваат расцутените јапонски цреши.
Овие елегантни дрвја, кои се препознатлив симбол на јапонската култура и традиција, и оваа година расцветаа во полн сјај, предизвикувајќи восхит кај граѓаните.
Јапонската цреша, чие оригинално име е Сакура, цути кон крајот на март или почетокот на април.
Расцветувањето на јапонските цреши се смета за симбол на почеток на еден нов живот.
Доколку сè уште не сте го посетиле Градскиот парк, сега е вистинското време.