Македонија
Пендаровски ја објави кандидатурата за нов мандат: „Не ме контролира никој, ниту ги диригира моите одлуки“

Претседателот Стево Пендаровски ја објави кандидатурата за нов мандат на претстојните претседателски избори.
Пендаровски рече дека во изминатиот период добил поддршка од граѓани, јавни личности, универзитетски професори, културни работници, луѓе што го познаваат и не го познаваат и на сите нив им се заблагодари за поддршката и довербата.
Пендаровски очекува на 3 март СДСМ да ја формализира поддршката за неговата кандидатура, а од понеделник ќе разговара и со десетте партии од таа коалиција, кои најавија дека ќе го поддржат во трката за претседател. Претседателот ги повика граѓаните од 3 март да го поддржат со собирање потписи.
„Зад себе имам мандат без ниту една стратешка грешка, без корупциска афера и случај на непотизам поврзан со мене, моето семејство, моите роднини и соработници. Ги предводев преговорите за членството во НАТО и во мојот прв мандат станавме членки на алијансата, а во вториот ќе станеме членка на ЕУ“, рече Пендаровски.
Како што додаде, не постои случај кога етничкото потекло било причина некого да деградира, а потврда во таа насока е и структурата во неговиот кабинет.
„Покажав дека претседателот може да биде независен од кои било центри на политичка моќ, вклучително и оние што го поддржале на избори. Никој не ме контролира или не ги диригира моите одлуки“, рече Пендаровски.
Претседателот говореше и за договорите со Грција и Бугарија, како и за рамковниот договор. Во таа насока рече дека постојат политички кандидати, кои најавуваат ревизија или поништување на рамковниот, преспанскиот или договорот со Бугарија.
„Рамковниот ја исполни својата историска улога и не ја поткопа внатрешната кохезија. Најмногу поради него станавме кандидат за членка во ЕУ. Договорот со Грција го овозможи членството во НАТО (…), а со Бугарија не беше спорен цели три години. Истиот тој договор стана проблем кога Бугарија под својата стара комунистичка националистичка гарда почна да измислува причини за блокада, кои во самиот договор ги нема“, рече Пендаровски.
Според него, тезите дека некој ќе ја промени преговарачката рамка со ЕУ и ќе направи подобар договор со Бугарија се политичка фатаморгана, исто како и идејата дека договорот со Бугарија ќе го почитуваат, но ќе бараат од Софија да го промени Уставот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Група инжинери со претстaвка до РКЕ: „Граѓаните да имаат реални сметки за струја базирани на реално мерење“

Новиот Закон за енергетика, јасно ја уредува обврската за мерење и фактурирање на електричната енергија според реална потрошувачка, но со тоа повторно се отвори прашањето за законитоста на членот 31 од Правилата за снабдување (донесени во 2018), кој дозволува издавање сметки врз основа на проценета, наместо реална потрошувачка во случаи на неотчитување на мерните уреди, велат од неформалната група Инжинери на Македонија.
Поднесена е претставка до Регулаторната комисија за енергетика, со која се укажува дека оваа одредба повеќе нема правна основа, бидејќи уредува прашање што сега е јасно дефинирано во Законот и тоа на поинаков начин. Укажаваат дека со тоа се крши хиерархијата на правни акти.
„Иако поднесовме амандман и добивме уверување од Министерството за енергетика дека спорниот став 2 од членот 185 ќе биде отстранет, тој сепак остана во Законот, дозволувајќи проценка на потрошувачката „кога мерењето не е извршено“. Но мерење постои бидејќи сите домаќинства имаат струјомери. Проблемот е административен а не технички. Затоа на последниот состанок со РКЕ нагласивме дека „мерење“ и „отчитување“ не се исто, па сметките мора да се издаваат само врз основа на реално измерени податоци. Најавата од претседателот на РКЕ дека ова ќе се реши со нов подзаконски акт е повторно правно проблематична – подзаконски акт не смее да ја менува или надминува содржината на закон, особено кога штетата ја трпат граѓаните“, велат од групата преку допис.
Со упатената претставка до РКЕ бараат: Итно бришење на членот 31 од Правилата за снабдување, без чекање да е донесат новите Правила; Забрана за издавање на сметки врз основа на проценка, кога струјомерот е исправен; РКЕ да го обврзе ЕВН на целосно почитување на Законот за енергетика и другите закони; Во случај на продолжување на прекршувањата, да се иницира постапка за раскинување на договорот за приватизација на дистрибуцијата од 2006 година, во согласност со одредбите од Законот за облигациони односи.
Клучно барање им е граѓаните да имаат реални сметки базирани на реално мерење.
Македонија
Променливо облачно време, попладне дожд

Времето денес ќе биде променливо облачно со сончеви периоди. Попладне ќе има повремени врнежи од дожд, наместа пообилни (10 до 15 l/m²). Локално ќе има услови за појава на нестабилност со пороен дожд и грмежи. Ќе дува слаб до умерен, а долж Повардарието повремено засилен ветер од северозападен правец.
Во Скопје, променливо облачно со сончеви периоди. Попладне ќе има повремени врнежи од дожд и ќе дува умерен, во делови од котлината повремено засилен ветер од северен правец.
Македонија
Прекинато водоснабдување во дел од Општина Карпош

Од ЈП Водовод и Канализација известуваат дека денеска поради дефект на шибер од ф – 80 мм на ул. Руѓер Бошковиќ бр. 15, во периодот од 09.00 часот па се до отстранување на дефектот без вода ќе останат корисниците лоцирани на потегот од бул. Осми Септември до раскрсница со ул. Никола Тесла. (општина Карпош).