Македонија
Пендиков пак не дојде на судење: судот не може да го најде, адвокатот го правда дека има здравствени проблеми
Натепаниот Христијан Пендиков не дојде ниту на денешното рочиште, на кое му се суди на Илија Спасевски. Судијата и пред јавноста посочи дека пропаднал обидот за да му се достави покана за рочиште на Пендиков. На ова адвокатот Стефан Карамишевски, бранител на Пендиков, рече дека оштетениот има здравствени проблеми.
„Денеска нема да присуствува судија бидејќи треба да се направат дополнителни проверки на некакви здравствени проблеми што тој ги има“, рече адвокат Стефан Карамишевски, бранител на Пендиков, па прашан од судијата Бојан Мартиноски: „Дали поради тие проблеми е спречен да доаѓа на судење“, адвокатот одговори потврдно и рече: „Ќе ви доставам дополнително…“
Судијата се интересира дали Пендиков останува оштетен во случајот, на што адвокатот рече: „Засега да, а се надевам и понатаму“.
„Од наша страна направен е обид да му се достави покана. Не е вратено ништо. Немаме уредна достава. Од вас сакав да слушнам“, рече судијата.
Засега не е познато дали Пендиков, кој има својство на оштетен, но и сведок, ќе дојде во охридскиот суд за да сведочи. По нападот, тој замина за Бугарија, каде што има обезбедување, а доби и стипендија и стан.
Христијан Пендиков, македонски граѓанин со бугарска самосвест, е и секретар на сега згаснатиот бугарскиот клуб „Цар Борис“ Според обвинението, Спасески, поради омраза по национална и етничка линија, го натепал Пендиков.
Охридското Обвинителството поднесе обвинителен предлог против едно од лицата за кои се смета дека го претепаа секретарот на бугарскиот културен клуб „Цар Борис“ во Охрид, Христијан Пендиков. Тој се бранел со молчење во текот на истражната постапка.
„На 19 јануари во кафе-бар во Охрид обвинетиот најпрвин пристапил до масата на која седел оштетениот и му забележал затоа што се изјаснувал како Бугарин. Подоцна, кога оштетениот го напуштил објектот и се движел кон своето возило, обвинетиот и другото непознато лице почнале да го следат, го нападнале и го удирале со рацете и нозете по главата и телото нанесувајќи му тешки телесни повреди. Во текот на истражната постапка сега обвинетиот се бранеше со молчење, но сите околности беа проверени и потврдени со изјави на сведоци на настанот и со обезбедените снимки од видеонадзорот“, соопшти Обвинителството кога го поднесе обвинителниот акт.
Тепачката се случи на почетокот на јануари.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
(Видео) Со два хеликоптера на МВР изгаснат пожарот во Крушевско
Денеска, два хеликоптера од Одделот за воздухопловни единици го изгаснаа шумскиот пожар кој попладнево изби во атарот на крушевското село Пуста Река.
„По добиено барање од ЦУК, на пожарот двата хеликоптера исфрлија над 40 тона вода и во координација со пожарникарите, пожарот е целосно изгаснат“, соопшти МВР..
Македонија
Времена забрана за движење на тешки товарни возила на патиштата во државата
Од 1 јули до 31 август на државните патишта во Македонија се воведува летен времен режим на сообраќај со кој се забранува движење на тешки товарни возила со вкупна маса над 15 тони, за време на деновите од викендот и за денови при екстремно високи температури.
Термините се следни:
– петок од 17:00 – 22:00 часот,
– сабота од 09:00 до 18:00 часот и
– недела од 09:00 до 22:00 часот.
На магистралниот пат А2 делница: Скопје – Охрид – Скопје се забранува движење на тешки товарни возила чија вкупна маса преминува 7,5 тони за време на викендите, во следните интервали:
– петок од 15:00 – 22:00 часот,
– сабота од 07:00 до 12:00 и од 18:00 до 24:00 часот и
– недела од 07:00 до 22:00 часот.
Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е умерен.
На ГП Табановце се бележи зголемена фреквенција на возила, времето на чекање за влез во Македонија е околу 20 минути. На останатите гранични премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево
Македонија
Средба Тошковски-Агелер: во фокусот борбата против организираниот криминал и корупцијата
Денеска министерот за внатрешни работи Панче Тошковски, во Министерството за внатрешни работи оствари работна средба со амбасадорката на Соединетите Американски Држави, Анџела Агелер.
Министерот Тошковски изрази благодарност кон амбасадорката на САД за поддршката што Владата на Соединетите Американски Држави постојано и ја дава на Република Северна Македонија, конкретно на Министерството за внатрешни работи во јакнење на капацитетите и сите процеси кои се спроведуваат преку проектите наменети за полицијата, со акцент на обуки на персоналот и набавка на опрема.
Како една од стратешките цели на кои Министерството за внатрешни работи на Република Северна Македонија ќе биде фокусирано во следниот период министерот Тошковски ја посочи борбата против организираниот криминал и корупцијата, како приоритет што е еден од главните столбови на владината програма.
Агелер му се заблагодари на Тошковски за континуираната одлична соработка на Република Северна Македонија со Соединетите Американски Држави во повеќе сфери од општествениот живот, пренесувајќи ја заложбата на американската амбасада и Владата на САД за поддршка и соработка и во наредниот период.