Македонија
Пенов со порака за младите: Вие ќе го продолжите патот што го градиме со нашите партнери и пријатели од Европската Унија

Направете нешто добро за вашиот пријател, за вашето училиште, за вашата општина. Правејќи добри и корисни работи, секој ден учите нешто ново иако убеден сум дека веќе знаете многу работи, што ние возрасните сè уште ги учиме, им порача министерот за локална самоуправа, Ристо Пенов, по повод Денот на европската соработка, во Општина Центар.
„Она што сега го правиме со нашите сограѓани, со нашите соседи од Грција, со нашите партнери и пријатели од Европската Унија, ќе го продолжите вие. Реализираме проекти со кои е подобруваат условите во детските градинки, во училиштата, проекти за заштита на животната средина, за подобрување на здравствената заштита, за отворање нови можности за едукација и вработување на младите. Програмите за територијална соработка што ги спроведуваме со поддршка на Европската Унија се важни за сите нас, вклучувајќи ги и најмладите. Градиме вредности што се темел на нашата заедничка европска иднина. Затоа е важно и добро е што денеска со нас ги имаме и најмладите. Тие се новите генерации за кои вреди да се работи и да се создава амбиент во кој ќе може да се реализираат и да бидат задоволни од постигнатите резултати“, додаде тој.
Пенов појасни дека во рамките на деновите на европска соработка посебен акцент е ставен на одбележувањето на Европската година на вештините.
„Во ова време на брзи промени, особено во областа на технологијата, многу е важно да создаваме услови младите луѓе да стекнуваат нови вештини, што ќе им помогне да бидат поконкурентни на пазарот на труд. Во овој процес исто така ја имаме поддршката од Европската Унија и преку отворањето на можноста студенти да волонтираат во имплементацијата на проектите за територијална соработка. Ова е добар начин да ги градиме нашите капацитети, но и голем мотив за младите луѓе можноста за себереализација да ја препознаат овде, во државата“, појасни Пенов.
Настанот е организиран во рамките на одбележувањето на Денот на европската соработка со учество на ученици од основно образование, наставници и партнерите од Грција, со кои заедно се спроведуваат ИПА-програмите за територијална соработка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сообраќајот се одвива непречено, по суви коловози

Сообраќајот на државните патишта се одвива непречено, по претежно суви коловози. Интензитетот на сообраќај на патните правци надвор од градските средини е умерен. На граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Мостот на река Вардар на регионалниот пат Р1312, кај Башино село е затворен за секаков вид на сообраќај.
Македонија
Денес во Дебар Маало настан по повод 73. роденден на големиот драмски автор Горан Стефановски

По повод 73. роденден на големиот драмски автор Горан Стефановски, денеска, кај спомен-клупата во Дебар Маало ќе се одржи настанот „Горан е тука“.
Како што стои во соопштението на Општина Центар, на одбележувањето ќе настапи музичката група „Аудио Скопје“ и ќе се читаат одбрани текстови од и за Горан, во изведба на Саша Димитриевска, Мирјана Трпковска – Костовска и Трајанка Илиева – Вељиќ.
Со свои настапи, додаваат, ќе се приклучат и пријатели од неговата младост, актери и уметници, Дарко Вељиќ ќе изведе пантомима, додека неговиот син Игор Стефановски ќе приреди музички сет како симболичен поздрав до ликот и духот на својот татко.
-Горан Стефановски не беше само писател – тој беше совеста на едно време, гласот што не потсетува кои сме и каде одиме. Неговите зборови сè уште одекнуваат во културниот простор на Македонија, во нашите мисли, во улиците на Дебар Маало. Со секој збор што го напишал, тој создал светови во кои се огледува нашето минато и иднина. За нас е чест што преку овој настан, дел од Програмата за култура за 2025, му оддаваме почит на еден од најголемите умови што ги имала оваа земја. Придружете ни се во овој свечен и искрен омаж на човекот чиј дух продолжува да живее преку неговите реченици и идеи. Горан не е само спомен – тој е присуство. Горан е тука, вели градоначалникот на Општина Центар Горан Герасимовски.
Организатор на настанот е Здружението на граѓани Тим Театрос К од Скопје, кое со години го негува сеќавањето на Стефановски.
Македонија
Денес и утре облачно, од вторник сонце

Времето во Македонија денеска ќе биде променливо облачно и нестабилно со повремени локални врнежи од дожд и грмежи. Наместа процесите ќе бидат поинтензивни во форма на невреме со пообилен пороен дожд, грмежи, силен ветер и услови за изолирана појава на град.
Во Скопје, променливо облачно, попладне во делови од котлината ќе биде нестабилно со пороен дожд, грмежи, засилен ветер и услови за изолирана појава на град.
Утре времето ќе биде променливо облачно и посвежо со повремен локален дожд, претежно во западните делови. Ќе дува слаб до умерен ветер од источен правец. Минималната температура ќе се движи од 5 до 11, а максимална од 15 до 22 целзиусови степени.
Од вторник ќе имаме сончево време со мала локална облачност. Максималните температури ќе се движат од 18 до 25 целзиусови степени.