Македонија
Перински во посета на Босилово и Ново Село: Подобрени се условите за настава во село Секирник, Смоларските водопади и Пирго бележат зголемен број на туристи
Министерот за локална самоуправа, Златко Перински, денеска ги посети општините Босилово и Ново Село во кои се реализираат проекти за унапредување на југоисточниот дел од земјава, финансиски поддржани од Министерството преку Бирото за регионален развој.
На подрачје на Општина Босилово, во село Секирник, се подобруваат условите за следење на настава во подрачното основно училиште „Кирил и Методиј“, а во Ново Село, Смоларските водопади и излетничкото место Пирго кај Мокриево, веќе бележат зголемен број на туристи како резултат на изградените нови содржини на двете дестинации.
Министерот во посета на струмичкиот регион беше заедно со директорот на Бирото за регионален развој, Даут Мемиши, директорот на Центарот за развој на југоисточен плански регион, Ѓоко Камчев и градоначалниците на Босилово и Ново Село, Ристо Манчев и Ѓорѓе Божинов.

Од посетата на училиштето во село Секирник, беше констатирано дека во завршна фаза е реконструкцијата и адаптацијата на училишната зграда, преку проектот „Подобрување на енергетската ефикасност на јавни објекти во Југоисточниот регион“. На објектот е поставен нов кров, нова фасада, фотоволтации, реновирани се санитарните јазли.
„Сето ова ќе овозможи учениците и наставниот кадар да имаат соодветни услови за следење и реализација на наставата, а истовремено ќе се намалат трошоците за одржување на објектот. Ова училиште ќе биде одличен пример за енергетско ефикасен објект и искористување на соларната енергија како обновлив извор на енергија. Со ова истовремено придонесуваме и за подигнување на јавната еколошка свест,“ истакна министерот Перински, по посетата на училиштето во Секирник, чија инвестиција чини околу 7.200.000 денари, од кои нецели 5.600.000 денари се обезбедени преку Бирото за регионален развој, а останатите од страна на локалната самоуправа.
Оттаму, министерот се упати кон Ново Село, кај Смоларските водопади и излетничкото рекреативно место Пирго кај Мокриево, каде неодамна заврши имплементацијата на проектот „Југоисточниот регион – можност за нови туристички авантури“ преку партерно уредување и изградба на нови содржини на двете локации.

Кај Смоларските водопади неодамна се санирани постојните патеки, дрвените огради, изграден е нов пешачки мост пред водопадите.
„Со оглед на тоа дека особено во последните години туристичкиот развој има потенцијал да придонесе значително за економскиот раст и развој на земјата, реализацијата на ваков тип на проекти е од голема важност особено за промовирање на регионот. Важноста на овој проект лежи и во можноста за искористување на природните убавини, историските локалитети и културното наследство на државата со цел привлекување туристи. Ваквите проекти не само што го зголемуваат туристичкиот потенцијал на одреден регион, туку и придонесуваат за балансиран развој на целата земја, поттикнувајќи рамномерен раст и создавање на нови можности во помалку развиени области,“ истакна директорот на Бирото, Мемиши.
На излетничко-рекреативен локалитет Пирго изградена е патека до кулата, поставени се летниковци, проширен е капацитетот на постојниот амфитеатар, а просторот се збогати и со одбојкарско игралиште на песок, како и детско катче со десетина реквизити.
„Неизбежно беше да се подобри постоечката инфраструктура, но и да се збогатат содржините и на двата локалитети. Благодарение на реализираниот проект, веќе бележиме зголемен бројот на посетители, како од регионот, така и на странски туристи. Ова значително влијае и на условите за поттикнување на туризмот во Општина Ново Село и регионот,“ истакна директорот на Центарот за развој на југоисточниот плански регион, Камчев. Тој посочи дека сега и двете излетнички локации станаа полесно достапни и за лицата со посебни потреби.

Според министерот Перински, несомнено е дека сега со реализираниот проект „Југоисточниот регион – можност за нови туристички авантури“ создадени се услови за зголемен број на туристи и подобрување на туристичката понуда, што има и економски придобивки за локалното население.
„Развојот на Југоисточниот регион не застанува тука. Наша стратешка определба е рамномерен развој на сите региони. Тоа го ветивме на граѓаните, тоа и го остваруваме,“ истакна министерот Перински.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Утре сончево време со температура до 21 степен
Времето утре наутро ќе биде постудено со услови за појава на магла по одделни котлини и речни долини. Преку денот времето ќе биде сончево со мала до умерена локална облачност. Ќе дува слаб ветер од јужен правец, информира УХМР.
Минималната температура ќе биде во интервал од -3 до 4, а максималната ќе достигне од 16 до 21 степен.
Во Скопје, утрото постудено, во делови од котлината магливо. Преку денот времето ќе биде сончево со мала до умерена облачност. Ќе дува слаб југоисточен ветер. Минималната температура ќе се спушти до 2, а максималната ќе достигне до 18 степени.
Под влијание на висок воздушен притисок следува период на стабилно и суво време со постудени утра, а дневната температура ќе биде во пораст, особено во деновите од викендот. Претпладне по одделни котлини и речни долини ќе има услови за појава на магла
Македонија
Божиновска и Јоксимовиќ: Забрзана изградба на гасниот интерконектор Македонија–Србија, се редефинира енергетската карта на регионот
Во рамки на 14. Меѓународен форум за енергија и одржлив развој (IFESD-14), што се одржува во Скопје, министерката за енергетика, рударство и минерални суровини, Сања Божиновска, оствари работна средба со Јована Јоксимовиќ, помошничка министерка за рударство и енергетика на Република Србија, задолжена за меѓународна соработка и европска интеграција.
Во фокусот на разговорите беше изградбата на гасниот интерконектор меѓу Македонија и Србија, проект од стратешко значење за енергетската безбедност и диверзификација на снабдувањето со гас во регионот.
Двете соговорнички се согласија дека проектот треба да се реализира во забрзана динамика, со цел да се овозможи поврзување на гасните системи на двете земји и пристап до нови извори на гас.
На маргините на форумот dополнително, во Министерството за енергетика на Македонија се одржа работен состанок на кој се дискутираше координацијата на институциите и операторите во двете земји за реализација на проектот. Ба разгледани процедурите и техничките чекори за понатамошно убрзување на активностите.
„Гасниот интерконектор со Србија е еден од најважните регионални инфраструктурни проекти што ќе овозможи вистинска енергетска стабилност и сигурност. Овој проект не е важен само за Македонија и Србија – тој е значаен и за цела Европа. Со оваа нова енергетска врска, двете земји добиваат пристап до алтернативни извори и рути, а Европа добива посилен и подобро поврзан Балкан. Ова е чекор што ја позиционира нашата земја како активен и одговорен партнер во новата енергетска карта на Европа. Нашата заедничка цел е овој проект да се реализира во најкраток можен рок – затоа што секој ден е важен за нашата енергетска иднина. Со заеднички напори ќе го реализираме овој проект, во тесна координација и постојана комуникација со нашите партнери од Србија “ изјави Божиновска.
„Гасниот интерконектор со Македонија е проект кој има значење подалеку од нашите граници. Тој е дел од визијата за регион кој е енергетски поврзан, сигурен и усогласен со европските цели. Србија и Македонија заедно покажуваат дека со партнерство и заедничка стратегија можеме да обезбедиме стабилна и предвидлива енергетска иднина. Соработката меѓу нашите две земји во областа на енергетиката е пример како регионалното партнерство може да донесе конкретни резултати. Соработката со колешката Божиновска и со македонскиот тим е интензивна и исклучително конструктивна. Уверена сум дека со заедничка координација и поддршка на нашите оператори ‘Србијагас’ и ‘Номагас’, ќе создадеме нова енергетска оска на стабилност меѓу двете земји. Имаме јасна динамика, завршени студии и поддршка од европските институции. Следниот чекор е координирана акција за изградба. Заеднички ќе работиме на тоа интерконекторот да стане реалност во најскоро време,“ истакна Јована Јоксимовиќ, помошничка министерка за меѓународна соработка и европска интеграција во Министерството за рударство и енергетика на Србија.
Македонија
Утре без вода делови од Карпош
Од ЈП Водовод и Канализација известуваат дека утре ( Четврток )поради изведување на водоводен приклучок ф-100мм на ул. Софиска 7, прекинато водоснабдување ќе имаат корисниците од следниве улици: Софиска, Бриселска, Петар Драганов, Његошева, Копенхагенска и Стокхолмска.
Водоснабдувањето ќе биде прекинато од 09:00 часот до завршување со работните активности. (општина Карпош).

