Македонија
Перински во посета на Дебар и Центар Жупа: Со инвестиција во патната инфраструктура создаваме услови за развој на руралниот туризам

Министерот за локална самоуправа, Златко Перински, и директорот на Бирото за регионален развој, Даут Мемиши, денеска ги посетија општините Дебар и Центар Жупа, кои се партнери во проектот за реконструкција на патната инфраструктура со цел за подобрување нa туристичката понуда во Југозападниот Плански Регион. На посетата присуствуваше и директорот на Центарот за развој на Југозападниот Плански Регион, Ваљон Каба.
„Соодветната патна инфраструктура е од исклучителна важност за развојот на општините. Дебар и Центар Жупа изобилуваат со природни убавини и културно-историски споменици. Новата современа инфраструктура ќе ги направи овие локации подостапни и ќе создаде услови за развој на руралниот туризам овозможувајќи подобро туристичко искуство за домашните и странските посетители. Верувам дека со успешната реализација на проектот регионот ќе стане попосетен, а локалната инфраструктура ќе придонесе за поефикасен и непречен транспорт на туристи, како и за поддршка на локалната економија и туризмот“, истакна министерот Перински.
Со проектот направена е реконструкција на улицата 206 во населбата Венец во Дебар, активност за која Бирото од жпрограмата за рамномерен регионален развој одвои средства во износ од 1.524.107 денари, а за реконструкцијата на локалниот пат до село Мал Папрадник во општина Центар Жупа се обезбедени средства во износ од 9.177.930 денари.
„Патната мрежа и општинската локална инфраструктура е од особено значење за давање квалитетни туристички услуги од страна на локалните фактори. Таа е клучна за поефикасен, побрз и непречен транспорт на туристи, локалното население и транспорт на добра поврзани со локалната економија и туризмот. Непреченото и квалитетно туристичко искуство и доживување се од исклучително значење за туристичката и другите сродни економски дејности и активности во Југозападниот Плански Регион“, изјави директорот на Бирото за регионален развој, Даут Мемиши.
Дебарското Езеро, познато и како Шпиље, е важен природен ресурс во регионот, кој со својата убавина и околина го позиционира овој крај на мапата на бањскиот туризам. Општините Дебар и Центар Жупа активно работат на развојот на туризмот, а геотермалните извори во Бањишта и Косоврасти додаваат дополнителна вредност придонесувајќи за привлекување туристи.
„Со гордост гледам на успешната реализација на проектот, кој значително го подобрува целокупното функционирање на регионот. Особено сме задоволни што Дебарското Езеро и геотермалните извори во Бањишта и Косоврасти се искористени како важни ресурси за развој на туризмот и бањскиот туризам,“ изјави директорот на Центарот за развој на Југозападниот Плански Регион, Ваљон Каба.
Градоначалникот на општина Дебар, Хекуран Дука, и градоначалникот на општина Центар Жупа, Аријан Имбраим, исто така присуствуваа на средбата и изразија задоволство од реализацијата на проектот и резулатите од имплементираните активности.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Министерството за локална самоуправа со швајцарска поддршка набави ИТ опрема за Центрите за развој на планските региони

Во рамки на проектот „Одржлив и инклузивен рамномерен регионален развој“ – 2 фаза, Министерството за локална самоуправа успешно спроведе постапка за набавка на ИТ опрема за сите осум Центри за развој на планските региони. Овој проект, поддржан од Владата на Швајцарија, претставува значајна инвестиција во подобрување на капацитетите на Центрите и нивната способност да обезбедат поефикасен и поквалитетен сервис за граѓаните.
Во Министерството за локална самоуправа, денеска симболично беше извршено примопредавање на опремата, при што директорите на Центрите едногласно истакнаа дека таа значително ќе им помогне во обезбедување на побрз и поефикасен пристап до информации, како и голема поддршка во напорите за одржлив развој во сите региони низ земјава.
Набавената опрема, која вклучува преносни и персонални компјутери, монитори, мултифункционални принтери и NAS системи е целосно приспособена на потребите на Центрите за развој на планските региони. Вкупната вредност на оваа донација изнесува 1.295.500,00 МКД и ќе има директно позитивно влијание на работењето на овие институции.
Воспоставувањето на силни и добро опремени центри претставува основа за продолжен раст и развој, кој ќе ги подобри условите за живот на сите граѓани, а посебно на оние во помалку развиените региони, велат од министерството.
Македонија
(Видео) Филипче: Ако се обединиме на патот кон ЕУ, нема пречка која нема да ја совладаме

Патот кон Европската унија трае предолго, но не смее да се откажеме, мораме да се обединиме бидејќи кога сме заедно ги обединуваме сите капацитети и нема пречка што не можеме да ја совладаме, оцени денеска Венко Филипче, претседателот на СДСМ на дебатата на Комисијата за европски прашања и Националниот совет за евроинтеграции за придобивките од Реформската агенда 2024 – 2027.
Тој во своето обраќање на отворањето на дебатата истакна дека Македонија дала премногу жртви без поголем резултат на патот кон Унијата но не смее да се откаже затоа што не постои никој друг извор на средства кој вложува повеќе во човечкиот капитал и најмногу тоа се гледа кај соседите кои напредуваат во преговорите.
„Сметам дека премногу долго трае нашиот пат кон ЕУ сме дале многу жртви не сме виделе многу голем резултат. Причините сите ги знаеме меѓутоа се поставува прашањето треба ли сега да се откажеме. Не постои никој друг извор на средства ниту заем којшто ќе вложи во клучната работа, а тоа е човечкиот капитал и само така ќе видиме видливи резултати кога ќе инвестираме во отворена економија, во економија којашто е базирана на знаење. Се поставува прашањето што треба да направиме. Мислам дека треба да се направи споредба. Треба да се направи споредба со некои земји коишто се приклучија во ЕУ како тие имаат пристап до сериозно големи фондови тоа се европските фондови за развој, како нивните земји практично се менуваа, пред нивните очи а и ние ги гледаме тоа се земји соседи Бугарија, понатаму Романија, Хрватска итн“, рече Филипче.
Притоа Филипче потенцираше патот кон ЕУ мора да се води заедно и обединети затоа што тоа е единствениот клуч како да се избориме против пречките кои се испречуваат при патот во евроинтеграциите.
„Време е да гледаме низ една друга перспектива да влеземе да работиме и да се бориме што и да е на масата каква и пречка да е пред нас исправена мораме да се обединиме поради тоа што кога сме заедно ги обединуваме сите капацитети. Нема пречка што не можеме да ја совладаме поради тоа што најлошото сценарио е сите овие проблеми да едноставно да ги ставиме на страна и да ги оставиме да ги решаваат следните генерации поради тоа што тоа никој нас нема да ни го прости“, рече Филипче на дебатата за придобивките од Реформската агенда.
Македонија
Тошковски да не ги штити неговите началници, за трагедијата во Кочани мора да има одговорност, велат од СДСМ

Изминуваат 37 дена од трагедијата во Кочани, а наместо вистинска правда и одговорност сведоци сме на селективна истрага и молк за одговорноста на актуелните функционери од ДПМНЕ и началниците кои ги има поставено Тошковски, истакнуваат од СДСМ.
Како е можно истрагата целосно да ги игнорира службениците, началниците, раководителите на различни позиции во СВР Штип и ОВР Кочани кои на 16 март 2025 година – на денот на пожарот – имале директна одговорност да спречат трагедија, но тоа не го направиле, прашуваат од опозициската партија.
„Седум командири, началници и заменик-командири на полицијата имале јасни законски надлежности, за безбедноста на просторот, за присуството на малолетници, за употреба на пиротехничките средства.
Полицијата присуствувала во објектот, видела малолетници, видела пиротехника, видела поголем број присутни а не презела ништо.
Ако тие постапеле, трагедијата ќе можела да биде спречена. Животи ќе беа спасени.
Се поставуваат прашањата:
-Зошто началничката на ОВР Кочани, Марија Цветковска Маневска, не е дел од истрагата, иако лично била надлежна за безбедноста во Кочани?
-Зошто не е опфатен началникот на крим-полицијата во Кочани, Томо Донев?
-Зошто Сашо Тасев, началникот на СВР Штип, како и раководителите на крим полицијата во Штип не се опфатени со истргата?
Дали ова не е намерна заштита на кадрите што ги именувал Тошковски“.
Истрагата, како што напоменуваат, не смее да биде политичка операција на прикривање и спасување кадри на ДПМНЕ и затоа Тошковски треба да поднесе оставка а истрагата да се прошири со актуелни функционери кои на денот на трагедијата биле на позиции.
Според СДСМ, болката на семејствата не смее да се дозволи да биде поголема со селективна правда, тоа е неправда.
СДСМ, додаваат од таму, ќе продолжи да се бори за целосна и правична истрага – без заштита на актуелни функционери. Мора да им одговорност, мора да има правда за Кочани.