Македонија
Перински во посета на специјализираната здравствена установа во Отешево: По четири децении, пациентите и персоналот добија современи услови за третман и работа

Министерот за локална самоуправа, Златко Перински, денеска го посети Заводот за превенција, лекување и рехабилитација на хронични, респираторни, неспецифични и алергиски заболувања – Отешево, во кој за првпат од постоењето се презедоа мерки за подобрување на условите за третман на пациентите и за работа на медицинскиот персонал, благодарение на инвестицијата на Министерството и Швајцарската агенција за развој и соработка.
Објектот веќе работи со полн капацитет, реконструиран е кровот, 18 соби, делот за приемна дневна терапија, лабораторија за спирометрија, набавен е сет од дигитална апаратура за физикална терапија, извршена е реконструкција и на тоалетите.
„Лично се уверив, дека првпат, после четири децении, пациентите конечно имаат соодветни услови за престој, а персоналот за непречено извршување на тековните обврски. Сега пациентите не треба да стравуваат дека во собите ќе им прокиснува и при ситен дожд. Овозможен им е и интернет пристап, а купена е и ставена во функција опрема со која се дигитализирани и олеснети услугите за пациентите. Особено ме радува што денеска сведочам за соодветните стандарди кои треба да ги нуди оваа специјализирана институција, единствена од тој тип во државава,“ истакна министерот Перински, кој го посети Заводот заедно со директорот, д-р Благоја Китановски и директорот на Центар за развој на Пелагониски плански регион, Јосиф Балтов.
Сите беа согласни дека, според својата функционалност и начин на делување во своето подрачје, Заводот нема само регионално, туку и национално значење, затоа што во него доаѓаат пациенти од целата држава, но и од регионот.
„Болницата е и воздушна бања која помага и во пост КОВИД рехабилитација, што е од особено значење ако се има предвид големиот број на граѓани со последици од пандемијата,“ посочи Китановски, кој истакна дека пациентите решението за своите здравствени проблеми го наоѓаат во оваа установа, не само поради специјализираноста, туку и поради местоположбата.
„Самиот преспански микрорегион е туристичка атракција како за домашни, така и за странски туристи, притоа зголемувајќи ја атрактивноста на цел пелагониски регион. Сето ова е предуслов за развој и на здравствениот туризам,“ посочи Јосиф Балтов, директорот на Центар за развој на Пелагонискиот плански регион.
„Сега, кога установата ги поседува соодветните стандарди во секој поглед, а и локациските фактори се во наш прилог, верувам дека со понатамошна заедничка соработка ќе придонесеме и за развој на здравствениот туризам. Имаме услови, имаме визија, верувам во позитивни резултати,“ додаде Перински.
Установата постои повеќе од 42 години и на пациентите им овозможува физикален третман, кинезитерапија, вежби за дишење, дренажи, кондициски вежби, инхалации и други методи според највисоките светски стандарди. Сите овие третмани, до пред реализацијата на проектот, се изведуваа во отежнати услови поради немање соодветна опрема и инфраструктура.
Осовременувањето на установата чинеше 23.483.676 денари, Министерството партиципираше со 13.203.086 денари, а 10.280.590 денари обезбеди Швајцарската агенција за развој и соработка.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Привремена промена во сообраќајот на делот од државнот пат А2 – делница Желино – Тетово

Од денес (24.04.2025) ќе има привремена промена во сообраќајот на делот од државнот пат А2 – делница Желино – Тетово, помеѓу бензинската станица Макпетрол и северниот влез на Тетово. На овој дел од патот ќе се врши геодетско снимање и една сообраќајна лента ќе биде затворена во неколку фази. Работите ќе траат до нивно завршување, извести АМСМ.
Сообраќајот на државните патишта се одвива непречено, по наместа влажни коловози.
Интензитетот на сообраќај на патните правци надвор од градските средини е умерен. На граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Променливо облачно и нестабилно со повремени локални врнежи од дожд и грмежи

Времето денеска ќе биде променливо облачно и нестабилно со повремени локални врнежи од дожд и грмежи. Наместа процесите ќе бидат поинтензивни во форма на невреме со пообилен пороен дожд, грмежи, силен ветер и услови за изолирана појава на град. Минималната температура ќе биде во интервал од 8 до 12, а максималната ќе достигне од 18 до 25 степени.
Во Скопје, променливо облачно со повремен дожд. Попладне ќе биде нестабилно со пороен дожд, грмежи и засилен ветер. Минималната температура ќе се спушти до 10, а максималната ќе достигне до 25 степени.
Времето во наредните денови
До крајот на оваа седмица ќе се задржи променливо облачно и нестабилно време со повремени врнежи од дожд и појава на грмежи. Локално ќе има поинтензивни процеси во форма на невреме со пообилен пороен дожд, грмежи, силен ветер и изолирана појава на град.
Македонија
Горан Минчев со граѓаните на Тетово: „Локалната промена почнува со Вас“

Генералниот секретар на Движењето ЗНАМ – За Наша Македонија, Горан Минчев, во рамки на кампањата „Заедно повеќе знаеме“, одржа средба со граѓаните, членовите и симпатизерите во Тетово.
Минчев порача дека Тетово заслужува транспарентно и ефикасно управување, развој на инфраструктурата и враќање на довербата во локалната власт.
„Граѓаните се нашите партнери – заедно ќе изградиме програма што одговара на вистинските потреби на Тетово. Време е општините да престанат да бидат партиски плен и конечно да почнат да работат за граѓаните“, изјави Минчев.
Тој истакна дека ЗНАМ нуди луѓе со знаење и интегритет, а не политички експерименти, и најави дека дијалогот со граѓаните ќе продолжи низ цела Македонија.