Македонија
Перински: Општините Теарце, Врапчиште и Јегуновце постигнаа енергетска и финансиска ефикасност

Општините Теарце, Врапчиште и Јегуновце постигнаа енергетска и финансиска ефикасност како резултат на паметното улично осветлување поставено во рамки на проектот „Одржлив и инклузивен рамномерен регионален развој“. Со поддршка на Министерството за локална самоуправа и Владата на Швајцарија, на подрачје на трите општини извршена е замена на 1412 стандардни светилки со паметни ЛЕД светилки. Резултатите на проектот беа презентирани денеска во Општина Теарце во присуство на министерот Златко Перински и амбасадорката, Вероник Улман, градоначалниците на Општините Теарце, Врапчиште и Јегуновце, Нухи Незири, Исен Шабани и Димитар Костадиноски, а присуствуваше и директорот на Центарот за развој на Полошки плански регион, Фатмир Саити.
На видео презентацијата на резултатите од проектот, вреден 2.488.500 денари, беше истакнато дека на подрачје на општина Теарце заменети се 889 постојни светилки со паметни ЛЕД светилки, на подрачје на Врапчиште поставени се 323, а на подрачје на општина Јегуновце извршена е замена на постојни 200 светилки со паметни ЛЕД светилки. Како резултат на имплементацијата на проектот, за период од пет месеци во 2024 година, Општина Теарце заштедила речиси 12 отсто електрична енергија во споредба со истите месеци во однос на 2021 година, додека заштедата на Општина Врапчиште сега е над 20 отсто во однос на 2022 година.
„Придобивките од проектот се многукратни, како за Општините, така и за граѓаните. Со нив се намалува емисијата на CO2, Општините заштедуваат на електрична енергија и трошоци за одржување со што се придонесува за зголемување на оперативната ефикасност за управување со осветлувањето и ефикасноста во планирање на идните заштеди на енергија“, посочи директорот на ЦРППР, Саити, кој ги презентираше постигнатите резултати од поставеното ЛЕД осветлување.
Според министерот Перински, проектот е уште еден доказ за поддршката која ја дава Министерството за локална самоуправа за унапредување и развој на сите единици на локална самоуправа низ сите осум плански региони, заедно со Владата на Швајцарија со која, како што истакна Перински, Министерството има одлична соработка.
„Општинските управи и граѓаните на Теарце, Врапчиште и Јегуновце веќе ги чувствуваат придобивките од реализираниот проект кој има за цел долгорочно ефикасно одржување на системите за осветлување. Општините сега имаат намалени трошоци за електрична енергија што создава услови за подобро менаџирање на буџетите. Новите ЛЕД светилки условија подобрена и соодветна видливост на јавните површини, што ја зголеми сигурноста за движење на пешаците и возилата, а намален е и ризикот од несреќи. Сето ова го подобри квалитетот на живот на граѓаните, а е од економско значење за Општините“, изјави министерот Перински.
Амбасадорката Улман не го криеше задоволството од постигнатите резултати од проектот и од соработката на трите општини.
„Задоволство ми е што денеска сум овде и ги гледаме резултатите од проектот и соработката на трите општини. Во случајов, постигнати се повеќекратни бенефити, заштеда на електрична енергија, поголема безбедност за граѓаните, а со ЛЕД светилките ја заштитуваме и животната средина поради намалената емисија на јаглерод диоксид. Ова е многу добар модел кој може да го реплицираат и останатите општини“, посочи амбасадорката Улман.
Општина Теарце е една од трите општини, која веќе ги чувствува бенефитите од паметното осветлување, меѓудругото, засега бележи заштеда на електрична енергија од 12 отсто. Градоначалникот Незири посочи дека паметни ЛЕД светилки се поставени во речиси сите населени места кои гравитираат на подрачје на Општина Теарце, односно во 13 села.
Со проектот се изврши стандардизација на осветлувањето на патната мрежа во Јегуновце, соодветно се осветли локалниот пат кон граничниот премин Јажинце, како и дел од патот кон регионалниот автопат Тетово – Гостивар, два сообраќајни правци кои се многу фрекфентни и голем дел од месното население ги користи секојдневно.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Скопје
Пожарот кај хотелот „Њу Стар“ локализиран, ЦУК бара итни мерки за дивата депонија во Визбегово

Пожарот кој избувна во близина на хотелот „Њу Стар“ во скопската населба Визбегово е локализиран, но на терен и понатаму дежураат две екипи на Територијалната противпожарна единица на Град Скопје.
Како што информира Центарот за управување со кризи (ЦУК), во денешната интервенција биле ангажирани вкупно седум противпожарни возила и 20 пожарникари. Пожарот зафатил површина од околу 5000 квадратни метри, при што биле опожарени жито, еден магацин со градежни материјали, како и дворот на хотелот.
„Денеска, при повторно разгорување, пожарот се прошири до хотелот „Њу Стар“, како и до околните куќи, со што директно беа загрозени животите на граѓаните“, стои во објавата на ЦУК на Фејсбук.
Оттаму апелираат до сите надлежни институции и локалните самоуправи итно да се вклучат со конкретни чекори и да се стави крај на проблемот со дивите депонии, кои, според нив, претставуваат сериозна опасност по животната средина и јавното здравје.
ЦУК информира дека директорот Мухамед Али денеска испратил ново барање до надлежните институции со цел итно преземање активности за конечно решавање на овој проблем.
„Проблемот со оваа дива депонија трае подолг временски период и претставува реална закана за здравјето, безбедноста и добробитта на граѓаните, како и сериозна оперативна оптовареност за БППЗ, која често е ангажирана на истата локација“, посочуваат од ЦУК.
Оттаму потсетуваат дека во текот на изминатата недела директорот Али повеќекратно испратил официјални барања за интервенција, но засега нема конкретен одговор од надлежните.
Македонија
Мицкоски ја доби тужбата против Славјанка Петровска за клевета

Граѓанскиот суд во Скопје донел правосилна пресуда во корист на премиерот Христијан Мицкоски, утврдувајќи дека пратеничката од СДСМ и поранешна министерка за одбрана, Славјанка Петровска, јавно ширела невистини и клевети против него.
Како што информира премиерот преку објава на социјалните мрежи, судот ѝ наложил на Петровска не само да се извини, туку и да ја објави пресудата во медиумите.
„Ова е уште една потврда дека на лагата ѝ се кратки нозете. Судот потврди дека поранешната министерка и актуелна пратеничка ширела лаги и клевети против мене. Вистината мора да излезе на виделина“, напиша Мицкоски.
Тој ја искористи приликава и за поширока критика на политичката култура на неговите опоненти.
„Очигледно, лажењето како синдром на политичката култура на СДСМ не престанува да биде нивен заштитен знак. Со оваа пресуда се потврдува не само дека лажат, туку и дека не се промениле. Продолжуваат да го потценуваат народот“, порача премиерот.
Според Мицкоски, оваа судска победа не е лична, туку борба за вистината и достоинството на секој човек кој се спротивставува на политичките манипулации.
„Ова не е моја лична битка, ова е битка за принципи, за вистината, за достоинството на секој поединец кој не дозволува неказнето да му се лепат лаги“, стои во неговата објава.
Тој додава дека продолжува да работи со посветеност и дека „лагите ќе паднат, а вистината победува“.
Скопје
Град Скопје: Обвинителството го отвори првиот случај за дивоградбите во Чаир

Основното јавно обвинителство ја започна постапката по првата пријава за фалсификати поврзани со градби во Општина Чаир, информираа денеска од Град Скопје.
Според соопштението од прес-службата, истрагата се однесува на сомневања за фалсификување на документи и незаконска легализација, а се поврзува со поранешниот градоначалник на општината, Висар Ганиу.
„Основното јавно обвинителство ја започна постапката по првата пријава со фалсификатите. Таму веќе се водат уште две постапки претходно започнати за Висар Ганиу, првата за фалсификување на целата архивска книга со броеви и барања за легализации, а втората за уште еден случај каде што незаконски се легализирале објекти со соучесник“, стои во соопштението.
Од Град Скопје испратија и повик до Основното јавно обвинителство за гонење на организиран криминал и корупција, со барање конечно да започне постапка против, како што велат, „организираната криминална банда“ во Чаир.
„Очекуваме и Основното јавно обвинителство за гонење на организиран криминал и корупција да се одважи и да почне да постапува против организираната криминална банда во општина Чаир, која овозможувала градење незаконски на небезбедни згради со црни пари од нелегални извори“, велат од Град Скопје.
Во реакцијата се посочува и дека некои од лицата кои се појавуваат како сопственици на овие објекти сега се милионери, а официјално се прикажани како градители на зградите уште од пред 5, 6, 10, па и 11 години.