Македонија
Перински со градоначалниците на општините од Североисточниот плански регион: Со соработка можеме да направиме многу повеќе за сите општини во регионот

„Задоволен сум што во кратко време успеав да остварам лични средби со сите градоначалници од кои изворно можев да се информирам за функционирањето на секоја општина. Градоначалниците секојдневно се соочуваат со предизвици и Владата и јас како министер за локална самоуправа имаме план како преку соработка да ги подобриме работите. Го остваруваме ветувањето за голема финансиска поддршка на капитални проекти во општините, затоа што тоа им е потребно на граѓаните“, рече министерот Перински.
На состанокот беше истакнато дека иако Североисточниот плански регион, според степенот на развиеност е најнеразвиен, општините во регионот имаат потенцијал за развој и поддршката од Владата им е неопходна за да реализираат капитални проекти кои што решаваат важни прашања за граѓаните, но се и во функција на локалниот развој. Станува збор за плански регион кој што има потенцијал за рурален развој, за развој на туризам, како и за развој на мали бизниси. Потребно е инвестирање во патната и во комуналната инфраструктура заради создавање на примарни услови за побрз економски развој. Затоа, беше речено, општините многу сметаат на поддршката од Владата, а тоа е и силна мотивација за подготовка на проекти кои што ќе бидат финансирани во континуитет.
Министерот Перински ги охрабри градоначалниците дека нема да бидат оставени сами.
„Министерството за локална самоуправа ќе воспостави ресурсен центар кој што ќе биде поддршка на општините во подготовката на проекти, како и за зајакнување на нивните капацитети за подобро и поефикасно вршење на работите од нивна надлежност“, рече министерот Перински.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Таравари отиде во Турција каде ги посети пациентите од трагедијата во Кочани

Министерот за здравство Арбен Таравари денеска ја посетил болницата „Чам ве Сакура“ во Истанбул, каде што се лекуваат двајца од младите повредени во пожарот во Кочани.
-Во оваа болница првично биле примени шест пациенти, од кои четворица сега се пуштени на домашно лекување откако им се подобрила здравствената состојба. Двајцата преостанати пациенти, Мартин и Борис, се во стабилна состојба и продолжуваат со закрепнувањето, се наведува во соопштението.
За време на посетата Таравари, придружуван од претставници на Конзулатот на Македонија во Истанбул, се сретнал и со родителите на пациентите и изразил „поддршка и солидарност во овие тешки моменти“.
-Тој изрази посебна благодарност до д-р Мустафа Туран и конзулот на Северна Македонија во Истанбул, Идриз Фазлиоски, за покажаната грижа и посветеност. „Свежата болка на Кочани е донекаде ублажена од Мартин и Борис, кои се подобри и наскоро ќе ги пречекаме дома. Ви благодариме, драга Турција, за целата грижа и гостопримство, нагласил Таравари.
Министерот за здравство вчера во Едрене, Турција, учествувал и се обратил на Балканскиот здравствен бизнис-форум при што соопштил дека 165 пациенти од Македонија во 2024 година биле лекувани во здравствени установи во Турција.
Македонија
Кај спомен-клупата во Дебар Маало посветена на Горан Стефановски денеска се одржа настанот „Горан е тука“

Кај спомен-клупата во Дебар Маало посветена на Горан Стефановски денеска се одржа настан „Горан е тука“ по повод 73 години од раѓањето на познатиот драмски автор.
На местото каде што во 2019 година беше засаден чинар во негова чест – во триаголниот парк спроти кафеаните „Наџак“ и „Идадија“ – љубителите на театарот, пријателите, семејството и почитувачите на делото на Стефановски се собраа да му оддадат почит.
Кај спомен-клупата посветена на уметникот се одржаа уметнички изведби кои потсетија на делото на Стефановски и на неговата трајна вредност за македонската култура.
Настанот опфати читање избрани текстови, изведени од Саша Димитриевска, Мирјана Трпковска-Костовска и Трајанка Илиева-Вељиќ, музички сет на Игор Стефановски, синот на драматургот, пантомима на Дарко Вељиќ, настап на групата „Аудио Скопје“, живи статуи и учество на пријатели и колеги од театарот.
Градоначалникот на Општина Центар Горан Герасимовски истакна дека „Горан не беше само писател – тој беше совеста на едно време“ и дека „со секој збор создаваше светови во кои се огледува нашето минато и иднина“.
-Горан не е само спомен, тој е присуство. Преку новите културни сцени што никнуваат низ Центар, сакаме да ја пренесеме пораката дека културата е жив организам што нè обликува, ни дава идентитет и ни ја носи душата на времето. Чест ми е што ова центарско катче го носи токму неговото име. Горан е тука, во зборот, во мислата, во сцената што никогаш не згаснува. Ви благодарам што сте дел од ова заедничко сеќавање, истакна Герасимовски.
Настанот беше во организација на Здружението на граѓани „Тим Театрос К“, со поддршка од Општина Центар.
Горан Стефановски е роден на денешен ден во 1952 година во Битола. Почина на 27 ноември 2018 година во Кантербери, Обединето Кралство.
Македонија
Премиерот уверува дека Владата е стабилна и силна

Владата е стабилна и силна, и ги исполнува очекувањата на граѓаните, и покрај бројните предизвици и општата економска катастрофа која беше наследена. Општ став е дека се вложуваат сите сили Македонија да се стави на брза трка за економски раст и развој, соопшти денеска владејачката ВМРО-ДПМНЕ по седницата на Централниот комитет на партијата.
Како што се наведува во соопштението по средбата, генералниот секретар Ѓорѓија Сајкоски го информирал претседателот и партијата дека општинските комитети се силно мотивирани и подготвени за избори, на кои се очекува огромна победа.
„Претседателот на ВМРО ДПМНЕ Христијан Мицкоски истакна дека Македонија ја очекуваат успеси и добри резултати кои се последица на реформите преземени во изминатиот период, и дека целта е економска стабилност и просперитет на сите граѓани“, се посочува во соопштението.
Мицкоски исто така информирал и дека во идниот период продолжуваат испитувањата и мерењата на јавното мислење за кандидатите на ВМРО-ДПМНЕ, кои покажуваат неколукратна предност пред политичките конкуренти, но и дека треба да се сполни одговорноста на преземените ветувања пред граѓаните.