Македонија
Петровска–Борел: ЕУ со 9 милиони евра ќе ја поддржи модернизацијата на Армијата на Македонија

Денеска во Министерството за одбрана, министерката Славјанка Петровска го пречека високиот претставник на ЕУ за надворешна и безбедносна политика, Жозеп Борел кој престојува во посета на Северна Македонија.
Високиот претставник на Унијата, Борел за време на свечениот пречек се ракуваше со дел од припадниците на Армијата кои учествувале во операцијата на ЕУ во БиХ и мисијата на ЕУ во Централноафриканската Република и им се заблагодари за придонесот кон регионалната и глобалната безбедност.
На средбата помеѓу двете делегации стана збор за одбранбената соработка помеѓу Северна Македонија и Европската Унија, која има засилена динамика што резултираше со подготвеноста на Унијата преку Европскиот мировен фонд со 9 милиони евра да го поддржи процесот на опремување и модернизација на Армијата на Република Северна Македонија.
Министерката Петровска му се заблагодари на високиот претставник на Унијата, Борел, за поддршката од Европскиот мировен фонд за модернизација и зајакнување на капацитетите на Армијата.
„Северна Македонија го започна пристапниот процес во Унијата, а нашата надворешна политика е целосно усогласена со политиката на Унијата. Ние припаѓаме на Европа и затоа сме амбициозни во заедничките напори за интензивирање на одбранбената соработка. Средствата кои Европскиот мировен фонд ги издвои за унапредување на опремата на Армијата на Северна Македонија ќе ги зацврстат капацитетите на Армијата, особено на Лесната пешадиска баталјонска група“, рече министерката Петровска.
Во контекст на нашиот придонес кон регионалната безбедност, Петровска порача дека припадниците на Армијата даваат и личен придонес кон стабилноста на регионот и на Босна и Херцеговина преку 17-годишното учество во операцијата на ЕУ во оваа земја, ЕУФОР-АЛТЕА и успешната контрибуција во борбените групи на Унијата во 2012 година предводена од Германија, во 2014 година предводена од Белгија и во моментов, односно првата половина на 2023 година, предводена од Грција.
„Северна Македонија е одговорен и активен партнер на Европската Унија во зацврстувањето на стабилноста и безбедноста на регионот. Седумнаесет години сме дел од операцијата АЛТЕА во Босна и Херцеговина, со што покажавме дека сме одговорна земја која не отстапува од примарната цел – мирен, стабилен, безбеден Западен Балкан“, подвлече Петровска.
Високиот европски претставник, Борел, ја поздрави поддршката на Република Северна Македонија за Украина, како држава која ја брани сопствената територија, порача дека Унијата е посветена на развојот на одбранбената соработка со Северна Македонија и оддаде признание за нашиот долгогодишен придонес кон регионалната и глобалната безбедност.
Со одлуката Европскиот мировен фонд да додели 9 милиони евра за унапредување на опремата на Армијата на Северна Македонија, Европската Унија дава свој придонес за зајакнување на Армијата која активно учествува во мисиите и операциите на ЕУ. Се радувам што имав можност да поразговарам со жените и мажите припадници на Армијата, кои служеле во мисии предводени од ЕУ. Ви честитам и благодарам и се надевам дека ќе продолжите со вашето учество во мисии, – рече Борел и потенцираше дека тоа е јасен показател на посветеноста на Европската Унија за зајакнување на соработката во безбедноста и одбраната, со – како што рече, идните земји членки на Унијата од Западен Балкан.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Буџетот на Чаир, Бујар би го потрошил за една недела, државниот ревизор му ги извади валканите алишта на виделина

Кандидатот за градоначалник на Чаир од коалицијата „Вреди“, Изет Меџити, денеска реагираше на начинот на кој поранешниот министер Бујар Османи ги менаџирал јавните пари, предупредувајќи дека злоупотребите и вештачки надуените цени во тендерите се директна опасност за секоја институција и за буџетот на граѓаните.
„Ако само замислиме дека со вакви цени, со вакви рекетирања, Бујар ќе ја косеше тревата во Чаир исто како во салата ‘Борис Трајковски’, тогаш е јасно дека буџетот на општината ќе се проголта за една недела. Со таков начин на лошо менаџирање, наставниците ќе останеа без плати, а граѓаните без основни услуги“, изјави Меџити.
Тој се повика на последниот извештај на Државниот завод за ревизија, кој како што оцени, констатирал сериозни злоупотреби при организацијата на дводневен самит, за кој биле потрошени околу два милиони евра државни пари.
„Овде не станува збор за мои зборови или политички обвинувања. Овде зборуваат фактите, документите и официјалните извештаи. А кога еден министер троши два милиони евра за дводневен самит, додека граѓаните се мачат со инфраструктура, образование и основни услови, тоа е непростливо“, нагласи Меџити.
Тој потсети и на времето кога Османи беше министер за здравство, споменувајќи дека во Гинеколошката болница во Чаир тогаш добил прекар „пациентот“ – што според него е симболичен показател за неуспешното раководење со институциите.
Меџити кој денес оствари посета на ОУ “Васил Главинов” порача дека Чаир заслужува транспарентно управување, реални инвестиции и грижа за граѓаните, а не злоупотреби и тендери со рекетирање.
„Граѓаните имаат право да знаат каде завршуваат нивните пари. Моја обврска како иден градоначалник е да ја вратам довербата и да го заштитам буџетот на Чаир од вакви злоупотреби“, заклучи тој.
Македонија
На Табановце се чека околу 30 минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 30 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.