Македонија
Петровска и Битиќи го отворија НАТО-индустрискиот ден: компаниите подетаљно може да се запознаат со процедурите за настап на НАТО-пазарот

Министерството за одбрана заедно со НАТО Агенцијата за поддршка и набавки и НАТО Агенцијата за комуникации и информации денеска во Скопје го организираат НАТО Индустрискиот ден на кој компаниите подетално можат да се запознаат со постапките и процедурите за настап на НАТО пазарот кој во моментов изнесува над 10 милијарди евра на годишно ниво.
На отворањето на НАТО Индустрискиот ден се обратија министерката за одбрана Славјанка Петровска, вицепремиерот за економски прашања Фатмир Битиќи, генералната менаџерка на Агенцијата за поддршка и набавки Стејси Камингс и шефицата за набавки во Агенцијата за комуникации и информации, Џенифер Аптон.
„Кога говориме за НАТО, мислиме на безбедност и стабилност, но подеднакво важна е и можноста македонските компании, рамноправно да се учествуваат со сите останати компании во земјите члени во нудењето на производи и услуги за потребите на Алијансата. Станува збор за значаен пазар од над 10 милијарди евра на годишно ниво кој не смееме да го пропуштиме. Мораме да бидеме амбициозни, да се натпреваруваме со квалитет и со капацитети и да докажеме дека македонските компании технолошки и развојно можат да одговорат на барањата и да бидат конкурентни со компаниите во сојузничките земји“, рече министерката.
Петровска подвлече дека сè поголем број компании во Северна Македонија изразуваат интерес да се впишат во регистарот на економски оператори и да добијат потврда за исполнетост на услови за учество во постапките за набавки за потребите на НАТО и земјите – членки.
„Наш заеднички предизвик е зголемено учество во НАТО пазарот. Свесни дека секој почеток е тежок, Министерството за одбрана е партнер кој е подготвен да им помогне на компаниите, пристапот до овој пазар да биде поедноставен, но и поефикасен и поуспешен“, рече Петровска. Додаде дека наскоро ќе биде испратен претставник од нашата земја во Агенцијата за поддршка и набавки со што дополнително ќе се олесни пристапот на македонските компании на НАТО пазарот.
Министерката информираше дека секоја година расте бројот на компании кои преку Министерството за одбрана се впишуваат во регистарот на компании кои можат да се пријават на тендерите на НАТО. Ако во 2021-та година тој број бил осум, во 2023-та дваесет и една, а до денеска вкупно 44 компании ја имаат таа можност.
Вицепремиерот Битиќи во своето обраќање порача дека НАТО е многу повеќе од политички и безбедносен сојуз, тој во себе содржи и економска мрежа од можности чие искористување во најголем степен зависи од нас.
„Пред домашните компании се отвори простор да учествуваат во тендерски постапки на овој пазар. Тоа е шанса да пристапат и да бидат дел од поширока мрежа на економска соработка и трговски партнерства. Ова ќе ги засили нивните капацитети за иновации, квалитет и ефикасност, ќе ја подигне нивното ниво на конкурентност и за 500 милионскиот европскиот пазар“, рече вицепремиерот.
Битиќи упати благодарност до министерката Петровска која, рече, успешно ги развива партнерските односи со НАТО и отвора нови корисни перспективи за нашата држава. Со раководењето на овие процеси, министерката Петровска успеа политичките и безбедносните бенефиции да ги прелее во економијата, рече вицепремиерот.
Генералната менаџерка на Агенцијата за поддршка и набавки, Стејси Камингс се заблагодари за организацијата на НАТО Индустрискиот ден.
„Веќе имаме примери на учество на дел од компаниите од вашата земја кои што успешно учествуваа на тендерски постапки, исклучиво договори, меѓутоа денеска имаме една подлабока можност да зборуваме за механизмите, политиките, процесите и начинот на којшто голем број на компании од вашата земја може да учествуваат на тендерите, односно да бидат конкурентни со другите компании од другите земји членки на НАТО“, рече Камингс.
Шефицата за набавки во НАТО Агенцијата за комуникации и информации, Џенифер Аптон рече дека НАТО планира раст од 61% на глобалниот заеднички финансиран буџет и програми со индикативни бројки кои предвидуваат импресивно зголемување од 227% до 2030 година.
„Ова е значителен раст за да ја задоволиме оваа растечка побарувачка, ја препознаваме потребата од искористување на можностите на индустријата и олеснување на обезбедувањето на резултати со потребната брзина. Со голем ентузијазам стојам пред вас денес со намера да ги инспирирам вашите индустрии, непрофитни организации да ги истражат безбројните можности што ги нуди НАТО за нивната вредна работа и експертиза“, рече Аптон.
На НАТО Индустрискиот ден учествуваат компании од прехранбената, фармацевтската, енергетската индустрија, ИТ секторот и други.
——————————
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Петровска: Тошковски ја контаминираше истрагата за Кочани

„Трагедијата во Кочани точно е дека е резултат на системски пропусти, ама системот, колеги, има име и презиме или имиња и презимиња и тоа токму на денот на трагедијата. На денот на трагедијата вие министер лично и дел од раководството на Министерството за внатрешни работи покажавте дека не се водите по правото и по законите, туку по основ на брат, братучед, партиски другар и партиска наредба“, истакна пратеничката на СДСМ Славјанка Петровска при обраќање на собраниската седница, посветена на интерпелацијата на министерот за вантрешни работи Панче Тошковски.
Петровска нагласи дека „Тошковски, како искусен правник, долгогодишен адвокат ги познава законите, особено Законот за внатрешни работи и Законот за полиција, но свесно на денот на трагедијата не посочи одговорност во Министерството за внатрешни работи“.
„Напротив, ги заштитивте тие кои се прво повикани и кои во најмала рака го прекршиле ова што предмалку го прочитав, а го прочитав од закон, не од политички памфлет, не од партиско соопштение, туку од законот за полиција. Според вас полициски службеник кој е пензиониран пред две-три години е виновен за тоа што се случи во Кочани, ама актуелните началници, оние пред да ги разрешите тие не биле виновни. Не знаеле што им се случува на територијата на подрачјата за кои по закон се должни да знаат и истото да го спречат“, нагласи Петровска, додавајќи дека на денот на трагедијата и деновите потоа „Тошковски свесно оддавал службена тајна од истрагата на лице кое не е овластено и му ги направил достапни информациите од истрагата кои беа злоупотребени се злоупотребувала до денес за политички цели“.
„Еве со ова вие ја контаминиравте и ја попречивте истрагата и затоа меѓу другото се и нашите тврдења дека истрагата е селективна Исто како што дозволивте од денот на трагедијата до отприлика седум дена подоцна раководните полициски службеници од СВР Штип и полициска станица Кочани да продолжат да доаѓаат на работните места и со тоа им овозможивте да кријат докази, да преправаат записници, се во нивен интерес и во интерес на тие кои треба да ги заштитите. Под притисок исклучиво на експертската јавност тие беа променети. Е затоа денес семејствата на починатите, загинатите и повредените дојдоа во Скопје и затоа побараа средба не само со вас, побараа средба и со нас и со сите пратеници овдека во Собранието, затоа што меѓу другото ние сме нивни избраници“, нагласи пратеничката на СДСМ Славјанка Петровска.
Македонија
Мицкоски: Процесот на пристапување кон ЕУ мора да се темели на заслуги и реформи, со јасни критериуми, ова не е услуга што се дава произволно, туку е праведно признание

Премиерот и претседател на ВМРО-ДПМНЕ, Христијан Мицкоски, се обрати на конгресот на ЕПП.
„Мојата Влада останува длабоко посветена на конзервативните вредности: вредностите на семејството, одговорноста, економската слобода и почитувањето на владеењето на правото. Од овие принципи сме водени дома и го инспирираат нашиот ангажман со Европа. Замислуваме заедничка европска иднина, цврсто стоиме на овие трајни вредности.
Сепак, искреноста ме принудува отворено да се осврнам на предизвиците со кои се соочуваме. Европскиот проект ветува еднаквост, правичност и можности – но, понекогаш, ние доживуваме поинаква реалност. Нашиот народ, гордите македонски граѓани кои ги претставувам, од прва рака ја почувствуваа тежината на двојните стандарди. Стандарди кои ја поткопуваат довербата, го намалуваат ентузијазмот и ризикуваат да го ослабат самиот европски дух што го застапуваме“, рече Мицкоски.
„Мојата нација направи значителни жртви и реформи, цврсто посветена на нашиот европски пат. Сепак, постојано бевме сведоци на менување на целите и дополнителни услови, кои се применуваат селективно, прикривајќи ја транспарентноста и правичноста што ги ветува Европа. Овој пристап не ја зајакнува Европа – го слабее нашиот колективен кредибилитет и ги намалува нашите заеднички цели.
Од клучно значење е лидерите на ЕПП, и во институциите на ЕУ и во земјите-членки, да станат движечка сила зад проширувањето на Западен Балкан во Европската унија. Вашето лидерство и проактивен ангажман значително ќе го подобрат кредибилитетот и ефективноста на процесот на проширување.
Јасно да кажеме: интеграцијата на Западен Балкан во Европската унија не е само чин на добротворност – тоа е стратешки императив. Тоа обезбедува мир, стабилност и безбедност не само за нашиот регион, туку и за цела Европа. Процесот на пристапување мора да остане заснован на заслуги, воден од јасни критериуми и транспарентни проценки. Ова не е услуга што се дава произволно, туку е праведно признание за напорите и реформите.
Цврсто верувам дека нашата колективна иднина лежи во обединето европско семејство. Наша заедничка одговорност е да го поддржуваме интегритетот на овој процес, потврдувајќи ја нашата посветеност на правичност и еднаквост. Македонскиот народ заслужува да види дека неговата посветеност и жртви вистински се почитуваат и се признаваат.
Заедно, да ја обновиме нашата посветеност: Европа силна и обединета, изградена на вредности, доследност и меѓусебно почитување“, изјави премиерот Мицкоски.
Македонија
(Видео) Меџити: И покрај нашите понуди тие одлучија да бидат заедно со ДУИ и со Ахмети, Таравари има пофалби за владеењето на ДУИ, а избега од тоа владеење

Првиот заменик претседател на Владата и министер за животна средина и просторно планирање Изет Меџити на прес-конференција извести дека вечерва нема да се одлучува кој ќе биде претседател на коалицијата ВЛЕН.
„Денеска треба претседателството на ВЛЕН да се конституира, за другото, формирање на штаб, влегуваме во кампања за локални избори, анкети, штабови, избор на кандидати, листи ќе бидат предмет на новото претседателство на ВЛЕН“, кажа Меџити.
Во однос на тоа кога ќе биде изборот за претседател, Меџити одговори дека работат на тоа.
На прашањето дали ќе има предвремени парламентарни избори, министерот одговори дека не гледа потреба за тоа.
„Избори ќе има локални во октомври, може да се мериме, граѓаните ќе го кажат своето мислење и за нив и за нас. Не гледам потреба за предвремени избори, ни бројките го наложуваат тоа, ниту ситуациите, има стабилна Влада која што можеби има најголем број на пратеници во историјата на Македонија“, кажа Меџити.
Министерот на прес-конференцијата информираше дека ВЛЕН ќе има заеднички кандидати, заеднички листи, заедничка програма на претстојните локални избори.
„Немало пример во историјата на државата, но можеби и во регионот, каде што една коалиција функционира во владата, а на локални избори да оди со посебни листи. Тоа го нема ниту во македонскиот, ниту во албанскиот блок. Тоа е само да се приближат до Демократската унија за интеграција, да се вратат кај ДУИ, и покрај нашите понуди тие одлучија да бидат заедно со ДУИ и со Ахмети. Тоа се гледа од изјавите на Таравари којшто има пофалби за владеењето на ДУИ, а избега од тоа владеење.
Но, тоа е нивна работа. Тие треба да објаснат кај членството зошто требаше да се подели Алијанса за да избега од ДУИ. Немаше да има потреба, ќе имаше една Алијанса, а не сега дел од Алијанса да се врати таму. Ставот на ВЛЕН е дека ВЛЕН ќе има заеднички кандидати, заеднички листи, заедничка програма. ВЛЕН се отвора кон невладиниот сектор, кон најдобрите, најшколуваните, најпрофесионалните Албанци. Ќе имаме и независни кандидати коишто ќе имаат поддршка од ВЛЕН. Не мора да има партиски дрес за да биде кандидат за градоначалник поддржан од ВЛЕН. Се отвораме кон граѓаните, кон цивилниот сектор, кон професионалците и мислам дека на тој пат ќе опстоиме и ќе биде доволно за уште еднаш да ја потврдиме победата од парламентарните на локалните избори“, изјави Меџити.
Претходно Министерот за здравство и лидер на едното крило од Алијансата за Албанците, Арбен Таравари, кажа дека не отстапува од одлуката на локалните избори да одат со сопствени советнички листи иако на власт дојдоа како дел од коалицијата „Вреди“.