Македонија
Петровска: Како најнова членка на Алијансата од исклучителна важност е придонесот во доменот на стратегиските комуникации

„Само две години по формалното членство во НАТО, нам ни е доверена оваа одговорност да бидеме домаќини на најголемата Конференција за комуникатори во Алијансата и за нас како најнова членка на Алијансата е од исклучителна важност да дадеме свој придонес во доменот на стратегиските комуникации“, рече министерката за одбрана Славјанка Петровска по денешниот брифинг со претставниците на медиумите на кој информираше за претстојната НАТО – Конференција за комуникатори која ќе се реализира во Скопје следната недела.
Министерката посочи дека очекува отворена интелектуална, политичка и стратегиска дебата од која треба да произлезат идеи и практични решенија за голем број отворени прашања од областа на стратегиските комуникации, како алатка на лидерите и како поддршка во напорите на Алијансата за „одбрана и одвраќање“ на сите потенцијални безбедносни предизвици во НАТО и земјите – членки.
Директорот за комуникации во Сојузничката команда за трансформација, Џеј Џанзен истакна дека станува збор за конференција на која што има претставници од 30 земји членки, сојузници, кои што тука во Скопје, во Република Северна Македонија, како најмлада земја сојузник, ќе го демонстрираат единството на земјите членки на НАТО.
„Фактот дека овие 300 претставници на земјите членки и земји партнери се присутни тука во Скопје, за време на оваа конференција, ја покажува кохезијата на воената Алијанса во однос на начинот на кој ние учиме за себе и ја почитуваме нашата разноликост. Во исто време комуникациите се користат и против нас и заедно треба да дискутираме, соработуваме, учиме и споделуваме, зашто кога сме здружени можеме да ги надминеме овие предизвици, да ги обезличиме и да ги истакнеме работите кои што се важни за нас како Алијанса. Преку нашето присуство тука покажуваме дека заедно сме посилни“, рече Џанзен.
На Конференција ќе се разговара за информациските активности за време на руската инвазија на Украина, соработката со партнерите во оваа област, новиот Стратешки концепт на Алијансата и дигиталните комуникации.
На отворањето на Конференцијата освен министерката Петровска, ќе се обратат и премиерот Димитар Ковачевски, како и помошничката на генералниот секретар на НАТО за јавна дипломатија, Баиба Браже, а со видео обраќања ќе се обратат и командантите на двете НАТО Команди: генералот Кристофер Каволи, командант на Командата за операции и генералот Филип Лавињ, командантот на Командата за трансформација.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
До 15 септември сите службени возила ќе имаат таблици во боја

Сите државни институции и јавни правни лица имаат обврска најдоцна до 15 септември 2025 година да ги заменат регистарските таблици на службените возила со нови, специјални таблици во боја. Оваа одлука е донесена на денешната владина седница, по иницијатива на директорот на Службата за општи и заеднички работи, Ивица Томовски.
Од СОЗР појаснуваат дека целта на оваа мерка е зголемување на транспарентноста, отчетноста и воспоставување контрола во користењето на службените возила.
Обележувањето на возилата ќе овозможи граѓаните лесно да ги разликуваат од приватните, со што ќе се спречи нивна злоупотреба за лични, приватни или партиски цели.
Во наредниот период ќе биде отворена и телефонска линија на која граѓаните ќе можат да пријавуваат неправилна употреба на службените автомобили. Секоја пријава ќе биде евидентирана и ќе се постапува согласно законските процедури.
Во завршна фаза е и изготвувањето на централен регистар за сите службени возила, кој ќе обезбеди дополнителна контрола и увид во нивното користење.
Македонија
Со 71 глас „за“, изгласана интерпелација на државниот обвинител Љупчо Коцевски

Собранието денес ја изгласа интерпелацијата на државниот обвинител Љупчо Коцевски, поднесена од партијата „Левица“. Со 71 глас „за“, без воздржани и без гласови против, Собранието констатира дека наводите во интерпелацијата се основани.
Партијата Левица ја поднесе интерпелацијата минатиот месец поради селективност во истрагата за пожарот во Кочани, политичко влијание во работата на Обвинителството, функционален хаос во Вишото јавно обвинителство Скопје и непостапување по службена должност за дивоградбите во Скопје.
Пред почетокот на седницата, на прес-конференција, пратеникот од СДСМ, Јован Митрески кажа дека партијата нема да учествува во гласањето оти интерпелацијата за јавниот обвинител, Љупчо Коцевски, нема правни последици туку дека е негова одлука дали ќе остане на функцијата. Митрески нагласи дека како пратеничката група на СДСМ и Коалицијата останува на принципиелниот став дека јавното обвинителство мора да биде независно, ослободено од политичко влијание и притисок и сите одлуки мора да се по словото на законот и никако поинакви.
Македонија
СДСМ: Лицето што го споменуваат ВМРО-ДПМНЕ никогаш не бил личен шофер на Зоран Заев

Додека државата буквално гори, додека македонските шуми, пасишта, полиња се претвораат во пепел, ВМРО-ДПМНЕ штанца лаги од белата палата. Прво беа скакулците криви, кравите, СДСМ, Заев, утре ќе измислат некој друг, реагираат од СДСМ, на прес-конференцијата на Миле Лефков кој обвини дека шоферот на Заев е уапсен за подметнување пожар во Струмица.
„Очајни, бедни обиди за дефокус и тоа со истиот лик Миле Лефков. Вистината е лесно проверлива: лицето што го споменуваат никогаш не бил личен шофер на Зоран Заев ниту пак телохранител.Не можат да организираат итна интервенција на терен и да ги изгасат пожарите, па организираат лаги. Единствени виновни за пожарите се ВМРО-ДПМНЕ и Мицкоски кои се неспособни.Изгоре над 20% од територијата на државата. Нема нови возила, нема опрема, нема пожарникари, нема авиони. Има само лаги, прес-конференции и луксузни патувања“, велат од СДСМ.
Додека пожарите јадат шуми и домови, додаваат од таму, тие трошат народни пари на морски плодови, егзотично овошје и приватни авиони. Додека граѓаните гасат пожари со кофи и лопати, владата на ВМРО-ДПМНЕ троши милиони на телефони, ама нема денар за спасување животи и имот.