Министерката за одбрана, Славјанка Петровска, и секретарот за одбрана на САД, Лојд Остин, по средбата во Пентагон ги поставија темелите за развој на одбранбената соработка помеѓу сојузниците – Северна Македонија и САД за следните десет години.

Новиот патоказ, кој беше потпишан во Пентагон, ги дефинира областите во македонско-американската одбранбена соработка, кои ќе бидат приоритетни во следната деценија и преку кои ќе се развиваат одбраната и Армијата.

„Северна Македонија, денеска, е земја членка на НАТО и ние заедно со Соединетите Американски Држави стоиме рамо до рамо во справувањето со заедничките безбедносни предизвици. Минатата година САД ни дадоа огромна поддршка, која не беше само финансиска. Разменувавме знаење и искуство, вежбавме и се обучувавме заедно и ние се гордееме што заедно придонесуваме кон безбедноста на НАТО и регионот“, рече Петровска на состанокот.

Северна Македонија, порача американскиот секретар за одбрана, Остин, е долгогодишен и одличен пријател на САД со кого споделуваме исти интереси и вредности. Се гордеам што имаме долгорочно и силно билатерално партнерство, рече Остин и додаде дека патоказот за соработката во следните 10 години покажува дека можеме да работиме заедно на модернизацијата и заедно да се справиме со глобалните предизвици“.

Во однос на руската агресија врз Украина, Петровска порача дека Северна Македонија од самиот почеток ја осуди оваа непровоцирана и неоправдана инвазија и додаде дека нашата поддршка за Украина не е само политичка туку е и во донации на воена опрема.

Остин, пак, изрази благодарност за сето она што Северна Македонија го направи во поддршка на украинскиот народ, за зацврстувањето на источното крило на алијансата преку учеството во мултинационалните сили на НАТО во Латвија, Бугарија и во Романија, како и за безбедноста на регионот преку учеството во НАТО-мисијата на Косово, КФОР.

На средбата стана збор и за европските интеграции на земјите од Западен Балкан, при што министерката Петровска и секретарот за одбрана, Остин, заклучија дека потребни се брзи чекори напред и јасен сигнал дека процесот се движи кон главната цел – членство во Унијата.