Македонија
Петровска: Посветени сме на унапредувањето на стандардот на припадниците на Армијата

Министерката за одбрана, Славјанка Петровска, во придружба на началникот на Генералштабот, генерал- потполковник Васко Ѓурчиновски, денеска во Кичево ги посети припадниците на Четвртиот пешадиски баталјон на Првата бригада и единицата за логистичка поддршка, сместени во касарната „Чеде Филиповски-Даме“.
Петровска беше информирана за активностите на армиските припадници во оваа касарна, како и за успешната реализација на теренската вежба, која се одржа во јуни, чија цел е подготовка на армиските припадници за учеството во борбената група на Европската Унија – HELBROC 23/1. Припадниците на четвртиот пешадиски баталјон минатиот месец успешно ја завршија и вежбата „Талос-2“ во Грција, каде што покажаа дека се оперативно подготвени во согласност со стандардите за учество во вежбата Immediate Response 23 на Криволак, како и во мисијата предводена од Европската Унија, кои ќе се одржат во 2023 година.
Министерката Петровска порача дека Министерството останува посветено на унапредувањето на условите за работа и стандардот на припадниците на Армијата, факт што може да се види преку последните измени во Законот за служба во Армијата, со кои се предвидуваат голем број поволности за припадниците на Армијата.
Петровска истакна дека процесот на модернизација и опремување тече во согласност со предвидената динамика и дека армиските припадници со нивното место во општеството и довербата што ја имаат кај граѓаните тоа го заслужуваат.
Министерката упати честитки до припадниците за досегашниот придонес во мировните мисии ИСАФ, „Одлучна поддршка“, АЛТЕА, УНИФИЛ и КФОР, за нивниот континуиран придонес кон глобалната и регионалната безбедност и стабилност.
Во моментот припадници од овој баталјон заедно со припадници од артилерискиот баталјон реализираат подготвителна обука за следната ротација во мисијата КФОР.
За време на посетата, министерката Петровска и началникот на Генералштабот, Ѓурчиновски, беа придружувани од командантите на Оперативната команда и на 1. пешадиска бригада, генералите Бесник Емини и Сашко Лафчиски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Бројот на вработени намален за 17.000 – погубни економски политики на ВМРО-ДПМНЕ

Фрапатни се податоците кои покажуваат дека по доаѓањето на ВМРО-ДПМНЕ на власт во 2024 година во земјава има над 17.000 помалку вработени, обвини СДСМ.
Според партијата, тоа е директен резултат на погубните економски политики, хаосот и несигурноста, како и напуштање на политиките кои ги востастави СДСМ за стабилна и одржлива економија.
„Со оваа неспособна Влада: пазарот на труд се стеснува, продуктивното население е разочарано и заминува, Фондот за пензиско осигурување е под притисок, бидејќи денес 1,63 вработени обезбедуваат една пензија, наместо 1,74 како што беше пред само една година. Владата нема стратегија, нема визија, нема мерки за задржување и отворање на нови работни места“, велат од СДСМ.
Од таму обвинија дека ова се последици од владеењето на Мицкоски и дека се зголемува несигурноста за младите, пензискиот систем се доведува во ризик, а приватниот сектор е оставен сам да се снаоѓа.
Македонија
Регионална иницијатива за превенција од пожари на Западен Балкан

Во услови на зголемени ризици од пожари, започна регионална иницијатива за подигање на свеста за управување со пожари на ниво на предел во земјите од Западен Балкан. Иницијативата, поддржана од Министерството за земјоделство, шумарство и водостопанство, има за цел да го поттикне интегрираното и одржливо управување со екосистемите, наместо традиционалниот пристап што се фокусира исклучиво на гаснење.
Пожарите оставија сериозни последици врз природата, економијата и животот на граѓаните, а над 90% од нив се предизвикани од човечка невнимателност — факт што укажува дека превенцијата е клучна.
Преку интерсекторска соработка, јакнење на локалните капацитети и активности на терен, иницијативата тежнее да создаде предели и заедници отпорни на пожари.
„Природата е наша заедничка одговорност. Со здружени напори можеме да постигнеме нула пожари предизвикани од човечки фактор,“ велат од Министерството.
Македонија
Гром го предизвикал пожарот во велешката фабрика, велат од „Мирана“

Удар од гром е причината за пожарот што синоќа избувна во дел од производствениот погон на „Биокосмос“ во Велес, информираат од компанијата „Мирана“ преку официјално соопштение.
Од ударот се оштетени дел од просториите на „Биокосмос“ и, како што посочуваат од таму, тие привремено ќе бидат надвор од употреба додека не се санира штетата.
Фабриката „Мирана“, која се наоѓа во истиот индустриски комплекс, не била зафатена од пожарот и производствениот процес таму продолжува непречено.
Во пожарот нема повредени лица.
Центарот за управување со кризи претходно денес информира дека пожарот бил целосно локализиран рано утрово, околу 4 часот. Според информациите на ЦУК, огнот зафатил магацински простор со фрижидери и канцеларии со документација, а на неколку места сè уште се забележува слабо чадење.
Иако пожарот е ставен под контрола, службите сè уште се на терен за да спречат повторно разгорување, со оглед дека на одредени локации сè уште се јавуваат чадења.