Македонија
Петровска: Успехот кој го постигнавме како Армија е со силна поддршка од Националната гарда на Вермонт
Министерката за одбрана Славјанка Петровска се обрати на свеченоста во Министерството со која се одбележа триесет годишното партнерство помеѓу Армијата на Република Северна Македонија и Националната гарда на Вермонт, при што порача дека ова партнерство не е само потпишан документ, туку подадена рака и постојана поддршка низ 30-те години.
„30 години одбележани со над 350 активности, вежби, обуки, тренинзи низ кои поминале повеќе од 1.800 армиски припадници. Припадниците на македонската Армија ни тогаш, а ниту денес не разочараа и не потфрлија, напротив учеа и учат да се надградуваат, да споделуваат знаења и заедно со припадниците на Националната гарда на Вермонт го градат и чуваат нашето сојузништво“, рече таа.
Петровска се осврна и на заедничкото учество во наменските сили Феникс во 2010 година, каде за прв пат припадници на Националната гарда беа распоредени во мисија заедно со партнерска нација.
„Тоа е една исклучителна мисија, тешка комплицирана, опасна но сепак успешна – заедничката мисија на македонските и американските војници во Авганистан во 2010 година“, истакна министерката.
Командантот на Националната гарда на Вермонт, генерал-мајор Грегори Најт, кому министерката Петровска му врачи и државно знаме во рамка, порача дека активно учествува во ова партнерство долги години и дека отпорноста и посветеноста на луѓето од Вермонт и од Северна Македонија го направија ова партнерство и пријателство толку успешно.
„Долгогодишните пријателства што ги започнавме ние, постарата генерација, ќе продолжат и со нашите помлади офицери и подофицери додека тие ги развиваат кариерите во нивните соодветни организации. Она што е важно е да го пренесеме нашето знаење и искуство“, рече Најт.
На свеченоста беше прикажано видео со лични сведоштва на неколку припадници на Армијата од заедничкото учество во мисијата Феникс, а на амбасадорката на САД, Анџела Агелер, Баталјонот за специјални сили, Извидувачко-разузнавачкиот баталјон и Баталјонот на воената полиција, како и на неколку сектори во Министерството за одбрана и вработени во Канцеларијата за одбранбена соработка на САД им беше врачена плакета за нивниот придонес во развојот на партнерството. На свеченоста беше поставена и изложба со фотографии од заедничките активности на двете вооружени сили. Од 1993 година, реализирани се над 350 активности вклучувајќи над 1800 припадници на Армијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Денеска сончево и топло, промена на времето со пороен дожд и грмежи од први мај
Управата за хидрометеоролошки работи информира дека времето денеска ќе биде сончево и релативно топло со мала до умерена локална облачност. Ќе дува слаб до умерен ветер претежно од североисточен правец. Минималната температура ќе биде во интервал од 3 до 10, а максималната ќе достигне од 21 до 27 степени Целзиусови.
Во Скопје ќе биде сончево и релативно топло со мала облачност и со слаб североисточен ветер. Минималната температура ќе се спушти до 8, а максималната ќе достигне до 26 степени, велат од УХМР.
Стабилното и суво време, сепак, нема да се задржи долго. Веќе од средината на следната седмица, повторно се очекува дожд.
Промената на времето ќе започне уште во среда, на први мај, кога во попладневните часови ќе има услови за локална појава на краткотраен пороен дожд и ретки грмежи. Поголема нестабилност со дожд и чести грмежи се очекува во четврток.
Македонија
Апасиев од Тетово: Под власта на учките од ДУИ, поддржани од корумпираната македонска елита, секое второ дете од Полог се раѓа во Швајцарија
,,Етнотрибализмот ни го сервираат како европска вредност. Ние создадовме општество на квоти, коешто ни донесе секое второ дете од Полог да се раѓа во Италија, во Швајцарија или надвор од Македонија“, вели претседателот на Левица, Димитар Апасиев.
„Првиот концепт кој што ни го нудат е концептот на дејтонизација. Либанизација на Македонија, бејрутизација на Скопје. Тоа е нивната агенда, спонзорирана од западните амбасади. Ни понудија модел на бинационален грабеж.
Ние сме единствена земја во светот со еден Парламент и две Влади. Но помина времето кога Македонецот беше инфериорен во сопствената држава. Левица е принципиелно против Бадентер и против Балансер“, истакна претседателот на Левица, Димитар Апасиев.
Македонија
Мицкоски: СДСМ и ДУИ имаа две сценарија, прво, тивок бојкот за претседателските избори, второ, Ахмети добил бел лист од Ковачевски да напише што сака
Државата ни ја одземаа. Народот изгуби контрола над системот, институциите се киднапирани од стотина души на ДУИ кои управуваат со се. Додека тие од СДСМ им се верни слуги во секој криминал и тендер. И навистина е лицемерно од ДУИ и СДСМ да велат дека носеле храбри одлуки што е храброст да продадеш име, устав, да проблематизираш историја, и повторно да бидеш пред портите на ЕУ. Затоа што и тие од ЕУ знаат дека криминалци владеат со државата, рече Христијан Мицкоски, претседател на ВМРО-ДПМНЕ на вчерашниот митинг во Кочани.
Мицкоски укажа дека од СДСМ и ДУИ се подготвени на се за да ги задржат фотелјите и привилегиите.
„Затоа излезот го бараат во двете сценарија. Првото е тивкиот бојкот за претседателсите избори кој го заговараат. Додека се удираат во гради дека ќе згазеле во вториот круг, всушност тие сакаат да одработуват на тивок бојкот и спласнување на атмосферата на изборите. Второто сценарио е она на Ковачвски кој ја дал најдарежливата понуда до Али Ахмети. Ахмети има добиено бел лист на хартија од Ковачевски на кој само треба да ги напише институциите и министерствата кои сака да ги добие“, кажа Мицкоски.
Мицкоски порача дека излезот од сето ова е масовна излезност на изборите, како и масовна и недвосмилена поддршка за ВМРО-ДПМНЕ која е единствената сила за промени.
„Таа поддршка ни е потребна и за да нема уцени, ниту притисоци. Да имаме сила за промени, а таа сила можете само вие да ја дадете, народот на Македонија. Во првиот круг тука победата беше убедлива. 8079 гласа на 3900 за поранешнот претседател Пендаровски. Сега поддршката нека биде уште поголема за да може да жолтиот картон од првиот круг да биде црвен. Имаме незавршена работа, која ќе се финализира со огромна победа на 8 мај“, изјави Мицкоски.
Мицкоски се обрати и до неопределените, како и оние кои гласаа за кандидатите кои не се дел од вториот круг.
„Цунамито не огромниот бран на промени е започнат. Приклучете се и бидете дел од оваа генерација која одучува за сопствената иднина. Има надеж и ние заедно ќе се избориме. Сите оние кои пак во првиот круг гласаа за некој од другите опозициски кандидати кои сега се надвор од трката за претседател. Дојдете и поддржете ја единствената и главната сила за промени Гордана Силјановска Давкова и ВМРО-ДПМНЕ. Да не се ситнат промените. Приклучете се таму каде што е огромното мнозинство кое ја носи новата надеж за иднината на државата“, кажа Мицкоски.
Мицкиски на крајот им порача на граѓаните. „Ова не е Македонија што ја сакаш и ја заслужуваш. Овие избори се последна шанса за спас. Ширете ја пораката на промените. Тоа не се промени за освети не се промени за поделби. Тоа се промени во кои надежта го победува стравот. Заедништвото ги победува поделбите“.