Македонија
Пет години безбедносните служби го прислушувале Мицкоски, наместо за безбедноста на државата, работеле да се одржат на власт Заев и Филипче, велат од ВМРО-ДПМНЕ

СДС не бирале средства и методи за да остане на власт колку што можат подолго. Злоупотребувале институции, државни средства и цел безбедносно разузнавачки апарат. Со цел одржување на власт, СДС ги ставиле во партиска функција за политички цели безбедносните служби да следат и прислушкуваат политички противници, бизнисмени, новинари и јавни личности, велат од ВМРО-ДПМНЕ.
„Како тогаш најголема опозициска партија, СДС со помош на нивните кадри поставени во агенциите за разузнавање и за безбедност, пет години го следеле и прислушкувале претседателот на ВМРО-ДПМНЕ, Христијан Мицкоски.
Тоа го правеле со единствена цел политичка елиминација на Мицкоски, како единствен којшто може да им се спротивстави и да ги победи на избори, нешто што и се случи и покрај недемократските, да не речеме тоталитарни, мерки.
Со следењата и прислушкувањата сакале да го запрат нивниот пад од власт и да го придушат и замолчат секој слободен и кон нив критичен глас на новинарите и јавните личности, како и да уценуваат стопанственици.
Во периодот од 2019 до 2024 година, СДС владееле со злоупотреба на службите како да се партиска алатка за останување на власт.
Трагично е да се гледаат СДС, кои од уста не ја вадеа демократијата, како ги злоупотребувале службите и со најнедемократските методи ги ограничувале правата на слободно движење и изразување на граѓаните загарантирани со Устав и закон“.
Од партијата на власт додаваат дека цели пет години, службите биле користени за да се одржат на власт Зоран Заев и Венко Филипче и кликата околу нив, наместо за безбедноста на државата и граѓаните.
Уште потрагично, како што велат, е тоа што за сето ова, асистенција им правел сегашниот главен обвинител Коцевски, кој бил одговорен за следење на издавањето на ПИ мерките, кој според ВМРО-ДПМНЕ, е главната алка во синџирот на СДС за следење и прислушкување на претседателот Мицкоски, новинари и бизнисмени.
„Тоа е истиот тој Коцевски кого СДС толку силно го бранеа во Собрание за време на гласањето на интерпелацијата против него, а веќе се гледа зошто го бранеа и не гласаа за негово разрешување.
Бараме и очекуваме ЈО да се надмине себеси и за овој скандал од невидени размери да отвори сеопфатна истрага која ќе ги опфати сите кои ги злоупотребиле институциите и ќе ги извади пред лицето на правдата“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Дурмиши-Колумбија: Ќе обезбедиме поддршка на женското лидерство, младите и социјалниот развој

Министерот за економија и труд, Бесар Дурмиши, денес оствари средба со постојаната координаторка на Обединетите нации во Северна Македонија, Рита Колумбија. На средбата се разговараше за продлабочување на соработката помеѓу Владата на Република Северна Македонија и Обединетите нации, вклучително и ресорните министерства, преку заеднички проекти и активности кои имаат за цел унапредување на економскиот и социјалниот развој.
Фокусот на разговорот беше ставен на зајакнување на положбата на жените во општеството, особено во делот на економскиот развој, претприемништвото и развојот на лидерските способности. Посебно внимание беше посветено и на политиките за родова еднаквост и превенција од дискриминација, како клучен предуслов за инклузивен и одржлив раст.
Истовремено, беа дискутирани и иницијативи за развој на политики за поддршка на младите, преку обезбедување поголем пристап до квалитетно образование, обуки за современи вештини, можности за вработување и активно вклучување во процесите на одлучување.
Дурмиши и Колумбија разговараа и за значењето на претстојниот Втор светски самит за социјален развој, кој ќе се одржи од 4 до 6 ноември во Доха, Катар. Самитот ќе претставува глобална платформа за обновување и засилување на клучните обврски од Копенхагенската програма за акција – искоренување на сиромаштијата, создавање пристојни работни места, промоција на социјалната инклузија и еднаквоста.
На настанот се очекува учество на шефови на држави и влади, како и на претставници од граѓанското општество, приватниот сектор и академската заедница. Дополнително, ќе биде усвоена политичка декларација која ќе ги обврзе земјите-членки да преземат конкретни чекори во унапредувањето на социјалните политики и во исполнувањето на Агендата 2030 за одржлив развој.
На средбата беше изразена заедничка заложба за интензивирање на партнерството меѓу Владата и Обединетите нации, со цел преку конкретни иницијативи да се поддржи економската независност на жените, да се создадат нови можности за младите и да се унапреди квалитетот на животот на сите граѓани.
Македонија
Унапредување на условите во поликлиниката Шуто Оризари ќе биде еден од приоритетите во рамки на заложбите на Стратегијата за инклузија на Ромите, најави Алиу

Министерот за здравство, Азир Алиу денеска ја посети поликлиниката Шуто Оризари, заедно со Министерот без ресор задолжен за интеграција и имлементација на Стратегијата за инклузија на Ромите, Шабан Салиу.
– Нашата заложба е достапна здравствена заштита за сите пациенти, а паралелно со тоа и унапредување на условите во јавните здравствени установи низ државата. Поликлиниката Шуто Оризари во следниот период ќе биде еден од приоритетите за унапредување во различни аспекти, секако со поддршка од Министерот без ресор задолжен за интеграција и имлементација на Стратегијата за инклузија на Ромите. Во духот на оваа стратегија, заеднички се залагаме за подобрен пристап до интегрирани, квалитетни, превентивни и куративни здравствени услуги за лицата од овој регион, истакна министерот Алиу при посетата.
Македонија
Крај на нефункционалните институции, доста беше јавниот сектор да биде сервис за партиските кадри и распределба на привилегии, најави Минчев

Намалување на членовите на управните и надзорните одбори, укинување и спојување на непотребните институции и воведување јасни правила за професионално управување, најави министерот за јавна администрација, Горан Минчев, порачувајќи дека започнува процес на рационализација на јавниот сектор.
Според него, доста беше јавниот сектор да биде сервис за партиските кадри и распределба на привилегии.
Како што оценува, управните и надзорните одбори со години беа структури со преголем број членови, со сомнителни критериуми и без отчетност. Тоа, за Минчев е неприфатливо.
„Ќе воспоставиме ред, помалку одбори, помалку членови и избор само на професионалци со знаење, стручност и компетенции, а не со партиска книшка“, потенцира Минчев.
Најави дека ќе се стави крај и на нефункционалните институции.
Како што вели, во државата има институции кои постојат само на хартија, со по неколку вработени и преклопени надлежности.
Тој оценува дека тоа се симболи на неефикасност и расфрлање на државните пари.
„Со нивно спојување и оптимизација ќе обезбедиме рационализација, помалку трошоци, подобра координација и поефикасни услуги за граѓаните“.
Најавувајќи модерна и професионална администрација, Минчев појасни дека се подготвува нов закон за висока раководна служба со кој ќе биде искоренета партизацијата при избор на функционери.
Нагласи дека никој повеќе нема да биде назначен по партиска книшка, туку според знаење, искуство и стручни вештини.