Македонија
Повозрасниот демиркапиец го пријавувал помладиот за тропање во зградата во која се случи убиството

Повозрасниот демиркапиец претходно го пријавувал својот млад сосед за тропање од горе, велат од МВР по убиството и самоубиството во Демир Капија.
„Последното пријавување е на 19 јануари годинава. Повозрасниот го пријавил помладиот со поплака за тропање“, велат од МВР.
Двајцата имале нарушени меѓусоседски односи, но во минатото немало големи инциденти или тепачки. По пријавата, помладиот сосед бил повикан во полицијата и предупреден.
Претходно, МВР потврди дека демиркапијците се на возраст од 72 и 34 години, а двајцата биле пронајдени со прострелни рани.
„Денеска, во 6.50 часот, во Полициската канцеларија Демир Капија било пријавено дека во своите домови со прострелни рани биле пронајдени Б. М. (34) и М. К. (72), двајцата од Демир Капија. Смрт кај двајцата констатирал лекар од Итната медицинска помош, а во координација со јавен обвинител на местото се врши увид“, соопштија од МВР.
Според првичните информации, повозрасниот демиркапиец, по претходна расправија, пукал во соседот што живеел над него во зграда, па се самоубил.
ОЈО Кавадарци врши увид во зградата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Непречен сообраќај по влажни коловози низ државата

Сообраќајот на државните патишта се одвивa непречено, по влажни коловози, извести АМСМ.
Интензитетот на сообраќај на патните правци надвор од градските средини е умерен. На граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Без струја дел од Гази Баба

Од ЕВН Македонија АД известуваат дека денеска без електрична енергија ќе останат:
– во периодот од 09.00 до 12.00 часот, корисниците од улица Трубарево – крак 2, општина Гази Баба.
Македонија
Променливо облачно со повремени врнежи од дожд

Времето денеска променливо облачно со повремени врнежи од дожд, пообилни во источните делови (над 15 l/m2). Ќе дува слаб до умерен ветер од северен правец.
Минималната температура ќе биде во интервал од 4 до 10, а максималната ќе достигне од 12 до 17 степени.
Во Скопје, променливо облачно со повремени врнежи од дожд. Ќе дува слаб до умерен ветер од северен правец. Минималната температура ќе се спушти до 9, а максималната ќе достигне до 16 степени.
Во сабота времето ќе биде променливо облачно со сончеви периоди и со услови за локална појава на нестабилност со пороен дожд, грмежи и засилен ветер.
Во недела ќе има брз продор на студена воздушна маса од север и врнежи од дожд, на планините и на повисоките места од снег.
Ќе дува засилен северен ветер, температурите значително ќе опаднат и врнежи од снег се очекуваат и во некои од пониските места.
Во понеделник наместа ќе провејува слаб снег, а утринските температури на повеќе места ќе бидат негативни.