Во инцидентот што синоќа се случи во скопската населба Шуто Оризари повреди добил и службеник што презел службени дејства на местото на настанот, соопшти МВР.

Од полицијата претходно јавија дека на улицата Индира Ганди биле нападнати двајца полициски службеници кои не биле на должност. Тие со возило пристигнале и биле претепани од страна на жителите во наслебта.

„Инцидентот се случил кога малолетничка наводно видела дека непознати лица насилно внеле женско лице во комбе, но не знаела за кого станува збор. Таа тоа му го кажала на возрасен маж, кој пријавил во полиција. Се собрала поголема група граѓани и во тој момент наишло возило во кое имало три лица, од кои двајца полициски службеници од Полициската станица Чаир, кои не биле на работа. Насобраните ги нападнале лицата што биле во возилото и тие се пренесени во болница за укажување лекарска помош“, соопшти МВР вчера.

Како што јави МВР, со полициските службеници што не биле на работа во возилото имало уште едно лице на 39-годишна возраст. Двајца од нив добиле тешки телесни повреди и биле пренесени во Градската општа болница „8 Септември“ и комплексот клиники „Мајка Тереза“. Трите лица се од Долно Блаце.

Во текот на вчерашниот и денешниот ден нема пријава за исчезнато или грабнато лице од ниту едно семејство на подрачјето на Скопје, велат од Министерството.