Македонија
Поддршка во вредност од околу 210.000 евра: Тасевски на примопредавање на опрема за граничната полиција од Германија

Во рамки на соработката помеѓу Министерствата за внатрешни работи на Сојузна Република Германија и Република Северна Македонија денеска амбасадорката Петра Дрекслер предаде дополнителна полициска опрема на Министерство за внатрешни работи на Република Северна Македонија, претставувано од директорот на Бирото за јавна безбедност, Сашо Тасевски, при што во Центарот за обука на Министерството за внатрешни работи во Идризово, се спроведе официјална церемонија за примопредавање на опремата, на која соодветно беше презентирана донираната опрема.
Пред одржувањето на церемонијата се реализираше и билатерална средба помеѓу амбасадорката Петра Дрекслер и директорот на Бирото за јавна безбедност Сашо Тасевски, на која беше разговарано за одличната оперативна соработка помеѓу полициите на двете земји, која се спроведува помеѓу соодветните служби во рамки на Бирото за јавна безбедност и Канцеларијата за врски на германската Сојузна полиција во рамки на Амбасадата на Сојузна Република Германија во Скопје, како и за намерата за продолжување на поддршката од германска страна за Министерството за внатрешни работи во иднина.
Поддршката е со вкупна вредност од околу 210.000 евра и опремата е набавена од страна на Сојузната полиција. На Граничната полиција на Република Северна Македонија и се предаваат пет патролни возила, еден минибус, како и уреди за проверка на документи. Освен тоа, во Центарот за обука на МВР во Идризово со нов мебел и техника се опремени две училници за обуки.
Од 2020 година германската Сојузната полиција ги поддржува колегите од Република Северна Македонија со полициска опрема и тоа со вкупна вредност од преку два милиони евра.
Помошта во вид на опрема се реализира преку Канцеларијата за врски на германската Сојузната полиција во Скопје и со тоа се нуди поддршка на Гранична полиција на Република Северна Македонија уште поефикасно да се справи со предизвиците при сузбивањето на прекуграничниот криминал.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Трамп воведе царина од 33 отсто за Македонија, највисока во регионот за Србија

Помеѓу повеќе од 180 земји и територии погодени од одлуката на американскиот претседател Доналд Трамп за „реципрочна царина“ се и земјите во регионот.
Србија ќе подлежи на царини од 37 проценти – највисоки во регионот.
Следуваат Босна и Херцеговина, на која и е воведена царина од 35 отсто, Македонија со 33 отсто и Хрватска, која како членка на Европската Унија подлежи на царина од 20 отсто. За Црна Гора, Албанија и Косово се утврдени царини од 10 проценти.
САД воведоа само повисоки царини отколку за Србија на пет земји – Лаос (48 проценти), Мадагаскар (47 проценти), Виетнам (46 проценти) и Шри Ланка и Мјанмар, секоја по 44 проценти.
Трамп рече дека неговиот план ќе постави основна царина од 10 проценти, така што земјите и териториите кои имаат царини од 10 проценти за американските производи ќе имаат ист износ на царини.
Во продолжение погледнете го деталниот список на земји и царините што им се наметнати.
Македонија
ВМРО-ДПМНЕ: За народот минималец, за синдикалците на батерии максималец

За народот минималец, за синдикалците на батерии максималец кои работниците ги користат за свои интереси и дебело профитерство. Раководството на ССМ, синдикатот го претворија во алатка за дебело профитерство и лагоден живот со високи примања, велат од ВМРО-ДПМНЕ.
„Синдикалната активност, од активност за работничките права ја претворија во профитабилна активност која на раководствата им носи дебели плати. И сето ова додека зборуваат за минимална плата, без да имаат никакво чувство на грижа или пак трошка чувство на емпатија. Додека Слободан Трендафилов и луѓето околу него ги лажат и манипулираат работниците за минимална плата, тие имаат примања и неколкукратно поголеми од минималната плата. Ова е лицемерието на синдикалците на батерии како Трендафилов и луѓето околу него, за народот минималец, за синдикалците максималец. За ова не молчат и веќе го пријавуваат луѓето на кои им е преку глава од ваквото искористување и злоупотреба на работниците за свои цели и профитерства, и од односот на Трендафилов и луѓето околу него со Синдикатот како со своја фирма“, се наведува во соопштението.
Според партијата, тоа го потврдуваат и последните информации кои што ги доставиле револтирани свиркачи, од кои, како што велат, произлегува дека претседателката на Синдикатот на поштенски и телекомуникациски работници, Васе Депонова има годишни примања од 794.000 денари.
„И оваа исто како и Трендафилов со огромни примања, репрезентации и бенефиции зборуваат за минимална плата. Со примања кои надминуваат 1.6 милиони денари годишно, Трендафилов не може да биде синдикалец. Тој само го злоупотребува синдикатот и за таа цел користи неколку луѓе околу него, кои исто така ги врзал со големи примања. Слободан Трендафилов и луѓето околу него се разоткриени. Народот и работниците ги прочитаа и веќе никој не им верува. Знаат дека синдикалната активност им е за нивни лични интереси и профитерство и дека СДС се крие зад ССМ“, велат од ВМРО-ДПМНЕ.
Македонија
„Предупредувањата на Демократската Унија за Интеграција, денес во 14 часот ќе добијат облик“, велат од ДУИ

„На јавна сцена денес ќе ни биде демонстрирана моноетничката коалиција чија основна цел е да го преобликува политичкиот модел на државата од мултиетничка, во моноетничка демократија“, велат од ДУИ.
„Иако на јавноста ќе ѝ бидат презентирани поинакви точки, дозволете да ви го презентираме дневниот ред на денешната средба кој нема да го видите во јавноста:
Точка 1: Неказнивоста. Како да не одговарамат. Каков правосуден систем им треба за да можат да продолжат да се напаѓаат во јавноста, но суштински меѓусебно да се заштитат дури и кога во прашање ќе дојдат трагедии како онаа во Кочани
Точка 2: Како да се отстранат Албанците од сите нивоа на власт во државата, и потоа да се држат на периферијата на општествените текови
Овој план не е нов, туку е скорен пред три години преку ноторниот договор Мицкоски-Заев пред сѐ како заштитен чадор за транзициската олигархија во земјава.
Планот веќе се реализира преку укинувањето на Балансерот, моноетничкото одлучување на Уставниот суд, но и отстранувањето на Албанците од голем број високи позиции во државната управа.
Треба да се напомене дека реализацијата на овој план е невозможна без да се пронајдат „чесните Албанци“ кои треба да обезбедат лажна легитимација за мултиетнички консензус на ова политичко преструктуирање.
Го повикуваме целит политички и неполитички спектар на албанците во државава, вклучително и лидерите на коалицијата ВРЕДИ, заедно или секој посебно, да изразат јасен и гласен револт против овој обид за реструктуирање на државата и да не дозволат да бидат вовлечени во планот за целосна дисквалификација на Албанците од општествените текови“, соопштуваат од ДУИ.