Македонија
Поддршка од ЛДП за измените на Изборниот законик и заштита на правото на кандидирање на независни листи

Либерално-демократската партија како политичка опција која доследно се залага за демократија, владеење на правото и фер изборни процеси, внимателно го следи развојот на настаните поврзани со иницијативата на седум независни граѓански листи за итни измени на Изборниот законик, истакнуваат од оваа партија.
Според нив, по одлуката на Уставниот суд од март 2024 година, со која беше укината една од клучните одредби што го регулираа учеството на независните кандидати на избори, настаната е сериозна правна празнина.
Таа, како што оценуваат, доколку не се пополни навреме, може да го загрози спроведувањето на локалните избори во 2025 година, но уште повеќе, да го оспори едно од основните демократски права: правото да се избира и да се биде избран, загарантирано со член 23 од Уставот на Република Северна Македонија.
ЛДП смета дека не е прифатливо во едно демократско општество да постојат законски нејаснотии кои создаваат простор за злоупотреби и исклучување на граѓаните од политичкиот процес.
„Поддржуваме итно преземање конкретни чекори за надминување на овој вакуум.
Очекуваме Министерството за правда да формира експертска работна група без одлагање, со вклученост на претставници од граѓанските иницијативи, и парламентарните партии се со цел да се изнајде правично, инклузивно и одржливо законско решение“.
ЛДП, додаваат од таму, е подготвена да даде свој придонес во процесот и ќе го поддржи секој законски предлог кој произлегува од транспарентен и инклузивен дијалог, со крајна цел: изборен систем кој ги штити правата на сите граѓани и ја поттикнува нивната политичка партиципација.
„Нашето убедување е јасно — демократијата не е привилегија на партиите, туку право на сите граѓани. Локалната самоуправа е срцето на демократското учество, и затоа секој граѓанин треба да има можност да се кандидира и да биде претставен“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Нема подолги задржувања за влез и излез од државата

Сообраќајот на државните патишта се одвива непречено, по суви коловози, извести АМСМ.
Интензитетот на сообраќај на патните правци надвор од градските средини е зголемен. На граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Делови од Центар, Аеродром и Ѓорче Петров денеска без струја

Од ЕВН Македонија АД известуваат дека поради технички зафати во електродистрибутивната мрежа денеска, без електрична енергија ќе останат:
· од 08:00 до 14:00 часот, корисниците од улицата Јосиф Јосифовски Свештарот, општина Центар;
· од 08:00 до 15:00 часот, корисниците од улиците: 1 , 2, и 3 во село Долно Лисиче, општина Аеродром;
· од 08:00 до 15:00 часот, корисниците од дел од ул. 3-та Македонска Бригада, поточно објектите во околината на СУГС Владо Тасевски, oпштина Аеродром;
· од 09:00 до 13:00 часот, корисниците од дел од ул. Црногорска, општина Ѓорче Петров.
Македонија
Претежно сончево и топло, максималната температура до 37 степени

Времето денеска ќе биде претежно сончево и топло. Ќе дува слаб до умерен ветер од јужен правец.
Минималната температура ќе биде во интервал од 7 до 17, а максималната ќе достигне од 30 до 37 степени.
Во Скопје, сончево и топло со слаб до умерен ветер од јужен правец. Минималната температура ќе се спушти до 13, а максималната ќе достигне до 37 степени.
Времето во наредните денови
Во сабота попладне, во текот на ноќта и во недела претпладне ќе биде нестабилно со локален пороен дожд и грмежи. Ќе дува умерен, наместа засилен јужен, а во недела северозападен ветер, кој ќе услови опаѓање на дневната температура. Потоа следува период на стабилно и потопло време.