Македонија
Поддршка од Црна Гора за евро-атлантскиoт процес

Поздрави и поддршка од црногорскиот премиер Душко Марковиќ и од Црна Гора за натамошниот реформски и евро-атлантски пат на нашата држава пренесе амбасадорката на Црна Гора, Марија Петровиќ, која денеска се сретна со техничкиот премиер, Оливер Спасовски.
На средбата се потврдени одличните односи меѓу двете држави за кои е оценето дека одат во нагорна линија како на политички така и на економски план.
Пренесени се поздрави до премиерот Спасовски по стапувањето на должноста, со очекување дека за време на оваа Влада, ќе се случат очекуваното полноправно членство во НАТО и заслужениот исчекор во евроинтеграциите по сè што постигна државата изминатите две и пол години.
Оценето е дека периодот до изборите во април е значен и одговорен и сите политички фактори треба да придонесат кон натамошен евро-атлантски развој на земјата преку придонес во реформските процеси и организирањето и спроведувањето фер и демократски избори.
Премиерот Спасовски изрази благодарност до премиерот Марковиќ и до Црна Гора за поддршката во процесот на НАТО-интеграциите и констатира дека Република Северна Македонија и Република Црна Гора како рамноправни членки на НАТО ќе имаат можност за уште поголемо унапредување на односите меѓу државите во интерес на граѓаните на двете земји.
„Ова е значаен период кога очекуваме исчекори кон двете стратешки цели на нашата држава, како што се полноправното членство во НАТО и напредок во евроинтеграциите, и како Влада правиме сѐ што е потребно да продолжат реформите и напредокот во интерес на овие аспирации. Тоа за граѓаните и за државата значи и економија и подобар животен стандард“, рече премиерот Спасовски.
На состанокот е заеднички констатирано дека постојат услови за поголема економска соработка, на што ќе се посветат државите во иднина.
По изразената благодарност за поддршката од нашата држава на демократските процеси во Црна Гора, заеднички е оценето дека двете држави се развиваат демократски и дека ќе продолжат да си помагаат во духот на европските вредности и на европскиот развој на општествата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски со честитка до ЦДУ: Европа бара промени

Премиерот Христијан Мицкоски ја честиташе победата на ЦДУ на изборите во Германија преку социјалните мрежи.
„Овој успех е потврда за довербата што германските граѓани ја имаат во лидерството и во принципите на кои се темели ЦДУ – стабилност, развој и посветеност на вредностите на европската христијанска демократија.
Заедно да соработуваме за доброто и просперитетот на нашите граѓани. Европа бара промени“, напиша Мицкоски.
Македонија
Инспекцијата за животна средина на Град Скопје при вонреден надзор во општина Сарај затече запалена дива депонија

„Денес инспекцијата за животна средина на Град Скопје при вонреден инспекциски надзор во Општина Сарај затече запалена дива депонија составена од опасен отпад и градежен шут“, извести Град Скопје.
Локализиран е пожарот по брзата интервенција од страна на Противпожарната бригада на Град Скопје, а дополнително затечени се палења на стрништа во Крушопек и Лака, а сторителите се санкционирани. Во изминатата недела инспекторите за животна средина и комуналните инспектори на град Скопје имаат изречено казни на над 100 сторители“, велат од Град Скопје.
Македонија
Вонреден инспекциски надзор на реонот Смилковско Езеро, затекнати три лица кои согорувале отпад

Денес инспекцијата за животна средина на Град Скопје, изврши вонреден инспекциски надзор на реонот Смилковско Езеро, каде затече три лица со живеалиште во општина Бутел, како на дива депонија која сами ја направиле согоруваат отпад со што се загрозува животната средина и здравјето на граѓаните. Во изминатата недела инспекторите за животна средина на град Скопје и комуналните инспектори имаат изречено казни на над 100 сторители, извести Град Скопје.
„Нашите инспектори продолжуваат со засилениот инспекциски надзор на терен 24 часа, со цел намалување на аерозагадувањето и заштита на животната средина. Неселективно се изрекуваат казни за сите што не го почитуваат законот. Континуирано поднесуваме кривични пријави за исфрлање и согорување опасен отпад и загрозување на животната средина, за кривична одговорност против сторители затекнати како исфрлаат опасен отпад, азбестни плочи и друг градежен отпад, меѓу кои и опасен канцероген отпад.
На територијата на Скопје покрај Инспекторатот на Град Скопје, има уште вкупно 14 институции кои имаат надлежност и обврска да постапуваат при загадување на животната средина и загрозување на здравјето на граѓаните. Досега единствено градот Скопје реагира, додека останатите не постапуваат иако за истото имаат законска обврска“, соопшти Град Скопје.