Македонија
Под истрага 23 лица во акцијата „Адитив“

По двонеделна предистражна постапка што започна да се спроведува од 21.11.2024 година кога предметот е доставен на надлежно постапување на Основното јавно обвинителство за гонење на организиран криминал и корупција, денеска од раните утрински часови под раководство на двајца јавни обвинители се реализира голема полициска акција.
Единиците на МВР заедно со истражители од Истражниот центар на ОЈО ГОКК, врз основа на 77 барања за издавање наредби за претрес доставени до Основниот кривичен суд Скопје започнувајќи од 27.11. до 9.12.2024 година, извршуваат претреси на локации во Битола, Неготино, Велес, Кичево и Скопје. Издадени се три наредби до Управата за финансиско разузнавање и низа наредби за обезбедување податоци до надлежни институции и МВР. Јавните обвинители донесоа Наредба за спроведување на истражна постапка против 23 лица за кои постои основано сомневање дека сториле кривични дела против јавните финансии, платниот промет и стопанството и кривични дела против службената должност и против правниот сообраќај, соопшти обвинителството.
Во период од 13.04.2023 до 23.08.2024 година, дел од осомничените во својство на службени лица во АД ЕСМ и АД „Пошта на Северна Македонија“ создале група која имала за цел вршење на кривични дела Злоупотреба на постапката за јавен повик, доделување на договор за јавна набавка или јавно – приватно партнерство, Злоупотреба на службена положба и овластување и Перење пари и други приноси од казниво дело предвидено и казниво по чл.273 од Кривичниот законик. Во текот на 2023 и 2024 година припадници на оваа група станале и дел од осомничените, а со намера да прибават за себе или за друг имотна корист од поголеми размери или да предизвикаат штета од поголеми размери, осомничените свесно ги повредиле прописите за постапката за јавен повик, доделување договор за јавна набавка или јавно – приватно партнерство, со договарање со други можни учесници заради изигрување на постапката за доделување на договори за јавна набавка.
Така, откако организирале и извршиле пререгистрација на дејност на правните субјекти во нивна сопственост, осомничените управители и сопственици на правни лица, како учесници во постапки (економски оператори), меѓусебно се договарале да ги изиграат постапките за набавка на адитив за јаглен за потребите на АД ЕСМ – Подружница РЕК Битола и подружница РЕК Осломеј. На начин опишан во диспозитивот на наредбата, овозможиле кривично одговорно правно лице да го добие Договорот за јавна набавка за набавка на адитиви против формирање на згура/троска при согорување на јаглен во котел, адитив RPT 601, 190.000 кг. за потребите на РЕК Битола и 120.000кг. адитиви RPT 602 за потребите на РЕК Осломеј и да се стекне со имотна корист од големи размери во вкупен износ од 397.636.400,00 денари.
Потоа, со намера да го прикријат движењето на парите за кои знаеле дека се прибавени со кривично дело Злоупотреба на постапката за јавен повик, доделување на договор за јавна набавка или јавно – приватно партнерство од чл.275-в од КЗ, дел од осомничените организатори и дел од осомничените припадници на злосторничкото здружение во периодот од 24.11.2023 до 28.06.2024 година во Битола, Неготино и Скопје пуштиле во оптек, примиле пари, извршиле пренос на паричните средства и подигале готовина во вкупен износ 414.776.400 денари.
Акцијата е во тек, се обезбедуваат материјални докази врз основа на кои ќе се донесе одлука за примена на мерките на обезбедување на осомничените, за што јавноста ќе биде информирана во текот на утрешниот ден, соопштија надлежните.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Уште денес очекувам убави вести за македонските граѓани, рече Мицкоски за царините на Трамп

Премиерот Христијан Мицкоски очекува уште денес убави вести за македонските граѓани и економијата, во врска со царината од 33 отсто што САД ја воведе за увоз на македонските производи.
„На дневна основа работат тимови, и телефонски се слушаме. Очекувам многу скоро денеска убави вести за македонските граѓани и македонската економија“, изјави Мицкоски одговарајќи на новинарско прашање.
Тој рече дека Владата и институциите на САД се во постојана комуникација, со тамошното министерство за економија, финансии, Стејт Департментот, кабинетот на претседателот Доналд Трамп.
Министерот за надворешни работи, Тимчо Муцунски имал куса средба со државниот секретар, а на средбата станало збор и за царините, информираше Мицкоски.
Претходно неделава, американскиот претседател Доналд Трамп воведе нови царини за увозот од 180 земји, вклучувајќи ја и Македонија. За увозот од Македонија, Трамп одреди царина од 33 отсто.
Владата потоа уверуваше дека одлуката на САД за царинските трошоци, нема да има голем импакт врз нашата економија, а тие имаат план за надминување на ситуацијата. Македонската влада тогаш кажа дека нема потреба од паника и избрзани реакции и заклучоци.
Трговската размена меѓу Македонија и САД минатата година изнесувала 314 милиони долари, од кои што 118 милиони долари е извоз на Македонија.
Македонија
Mуцунски: Трагедијата во Кочани уште еднаш покажа колку е важна соработката со соседите

Министерот за надворешни работи и надворешна трговија, Тимчо Муцунски, во интервју за грчкиот дневен весник „Та Неа“ зборуваше за билатералните односи меѓу двете земји, поддршката по трагедијата во Кочани, како и за регионалната стабилност и безбедност и заедничките предизвици и приоритети во рамките на НАТО Алијансата.
Муцунски истакна дека трагедијата во Кочани е една од најтешките со кои се соочила државата во поновата историја, нагласувајќи дека европското единство повторно излезе на површина, а Механизмот за цивилна заштита на ЕУ се покажал како клучен инструмент за справување со последиците од оваа катастрофа. Тој во интервјуто ја повтори благодарноста до грчката влада и до грчкиот народ.
„Грчките болници ги примија првите пациенти евакуирани од нашата земја и продолжуваат да им обезбедуваат врвна нега. Поддршката во вакви моменти претставува силен одраз на вистинско пријателство меѓу нашите две земји – однос што мора да продолжиме да го негуваме и градиме“, истакна Муцунски.
Осврнувајќи се на билатералните односи, министерот ја истакна средбата со неговиот грчки колега Јоргос Герапетритис на маргините на Генералното собрание на ОН во септември 2024 година, како значаен чекор во зајакнувањето на дипломатскиот ангажман.
„Постои голем потенцијал за проширување на соработката – во трговијата, инфраструктурата и енергетското поврзување. Но, мора да ги продлабочиме и врските во областа на економијата и културата, каде што меѓусебното разбирање и заедничкиот развој можат да создадат долгорочна доверба и просперитет.
Поттикнување на деловни партнерства, туризам, студентски размени и културни програми може уште повеќе да ги приближи нашите народи. Како НАТО-сојузници и непосредни соседи, имаме заеднички интерес за зајакнување на регионалната стабилност и просперитет – особено преку целосна регионална интеграција во Европската Унија“, вели Муцунски.
Говорејќи за односите помеѓу двете држави, Муцунски во интервјуто оценува дека македонската влада е цврсто посветена на одржување одлични односи со сите наши соседи, а трагедијата во Кочани уште еднаш покажала колку е важна оваа соработка.
Во делот посветен на актуелната геополитичка состојба и партнерството во рамките на НАТО, министерот го нагласува значењето на единството меѓу сојузниците во услови на зголемени безбедносни предизвици.
„Единството останува темел на нашата заедничка стабилност и безбедност. Како членки на НАТО, сите носиме индивидуална и колективна одговорност за одржување на кохезијата и одбрана на вредностите што нѐ издвојуваат од авторитарните режими. НАТО и понатаму игра централна улога во обезбедувањето на безбедноста – не само за нашите две земји, туку и за поширокиот евроатлантски простор. Убеден сум дека оваа улога ќе остане клучна и во годините што доаѓаат. Соочени со сè покомплексни безбедносни предизвици, мора да пристапиме со единство. Колективната одбрана, отпорноста и одвраќањето се клучни за заштита на сите земји-членки. САД остануваат наш клучен сојузник и стратешки партнер. Ова партнерство се покажало многупати уште од нашата независност. НАТО обезбедува платформа за справување со суштински безбедносни прашања и за сите членки – вклучително и САД – да водат значајни консултации“, истакнува министерот во интервјуто.
Муцунски зборува и за претстојниот НАТО самит во Хаг, нагласувајќи дека земјите-членки ќе имаат можност да ја оценат моменталната состојба и да донесат одлуки по клучни прашања – инвестиции во одбраната, поддршка за Украина, регионални партнерства и стратешки предизвици.
„Убеден сум дека НАТО ќе биде подготвен да одговори на моментот и ќе продолжи да биде столб на нашата заедничка безбедност – посилен и пообединет во времето што доаѓа“, заклучува Муцунски во интервјуто за „Та Неа“.
Македонија
Исмаил од Левица: Мицкоски и Тошковски избегнаа да одговорат на суштински прашања за трагедијата во Кочани

Пратеникот од Левица, Реџеп Исмаил, обвини дека премиерот Христијан Мицкоски и министерот за внатрешни работи, Панче Тошковски, избегнале да одговорат на прашањата на пратениците во врска со трагедијата во Кочани. Во статус објавен на неговиот Фејсбук профил, Исмаил наведува дека на последната седница за пратенички прашања во Собранието, двајцата функционери оставиле низа отворени дилеми во врска со институционалното постапување:
„На кои прашања не дадоа одговори премиерот Мицковски и министерот Тошковски на Седницата за пратенички прашања во Собранието:
Премиерот Мицковски не одговори на следниве прашања:
Зошто Премиерот, на првата прес конференција после трагедијата во Кочани, го бранеше градоначалникот на Кочани, изјавувајќи дека тој не бил виновен – дали ова не е Владино прикривање на осномничени?
Зошто „кризниот штаб“ на премиерот не е формиран во согласност со Законот?
Зошто на првата прес-конференција Мицкоски објави писмени документи со кои ја загрози и компромитираше истрагата?
Дали сето ова Премиерот го направи со умисла или од небрежност?
Дали со тоа што претходно со одлуки на владата, во писмени постапки во кои по разни основи бараше разрешување на Јавниот обвинител на РМ, а сега, после трагедијата во Кочани кога вели дека нема проблем со Јавниот обвинител, во суштина му нуди заемна корист?
МВР – Тошковски не одговори на следниве прашања:
Зошто ниту еден од актуелните директори и раководители на институции во чиј мандат се случува инцидентот во Кочани, а кои по разни основи имаат одговорност и надлежност да постапат, а не постапиле – не се осомничени, односно не се опфатени со истрагата?
Дали дел од раководните лица на МВР во тој регион се активисти на партијата од која доаѓа Министерот Тошковски, односно членови на ВМРО ДПМНЕ?
Зошто МВР не го прекинала настанот во кабарето „Пулс” кога очигледно ги увидела следниве работи:
– Настанот не бил пријавен до СВР Штип и ОВР Кочани;
– Полицијата гледала и не реагирала на присуството на малолетни лица после полноќ како и точење на алкохол на малолетни лица;
– Полицијата очигледно видела дека има огромна дискрепанца помеѓу продадените билети и актуелната бројка на луѓе во објектот;
Дали е точна информацијата дека објектот почнува да се реновира токму по смената на началници со новата влада, јули 2024 година, и истиот се отвора во ноември истата година и тоа без лиценца, а сепак полицајците оделе во полициски акции во сега веќе дивото кабарe.
П.С. Министерот за внатрешни одговори само на едно прашање, дека чувствува морална одговорност, но тоа не му пречи да не даде оставка…” – напиша пратеникот од Левица, Реџеп Исмаил.