Македонија
Пожарите во Делчево и Пехчево сѐ уште се активни

Пожарите во Делчево и Пехчево сѐ уште се активни. Дежурни екипи интервенираа во текот на целата ноќ. Од Центарот за управување со кризи информираат дека во Делчево е прекината испораката со електрична енергија на филтер-станицата и на бунарските системи поради што ќе има прекин во водоснабдувањето.
Пожарот, кој почна на 2 август во атарот на с. Нов Истевник, маало Пасјак, сѐ уште гори и е во дијаметар од 15 км. До овој момент опожарени се речиси 800 ха борова шума и нискостеблести растенија. Пожарот го зафати маалото Балабанци во с. Нов Истевник, каде што зафати и три куќи, а тој бргу се шири и ја зафати и Курачка Маала, каде што досега изгореа три плевни.
Поради големиот пожар, регионалниот патен правец Делчево – Пехчево беше затворен за сообраќај. Со пожарот е зафатена површина од речиси 900 хектари со борова шума и нискостеблести растенија.
Екипите за гаснење пожар се на терен од раните утрински часови од 4 часот. Интервенира и војската.
Пожарот е сѐ уште активен и бргу се шири во правец кон маалото Пасјак и кон с. Тработивиште и се има префрлено на територијата на општина Пехчево. Екипа на ЕВН ја прекина испораката на електрична енергија на филтер-станицата и на бунарските системи поради што ќе има прекин во водоснабдувањето од бунарите со што значително ќе се намали протокот на вода во Делчево и повисоките делови од градот нема да имаат вода.
Поради сериозната состојба со пожарите во околината на Делчево и потребата од континуирано снабдување на ППЕ со вода, се апелира за рационално користење на водата. Поради тоа што има прекин на електричната енергија, не се врши хлорирање на водата и таа не е исправна за пиење и може да се користи само како техничка вода.
На територијата на општина Пехчево, кај месноста Бајаз Тепе, пожарот е сѐ уште активен и се шири кон селата Робово, Умлена и Чифлик. Поради силината на ветерот, пожарот го префрли регионалниот пат Берово – Делчево и се движи накај с. Црник. На терен интервенира и војската.
Зафатени се високостеблеста дабова и борова шума, нискостеблести растенија, смрека, стрништа и пасишта. Екипите работат на негово локализирање. Пристигната е и Специјалната противпожарна екипа од Словенија со 17 возила и 45 луѓе и таа е распоредени во атарот на селата Црник и Негрево. Опожарен е и 1 објект за чување стока и колиба во с. Црник, но на истата локација пожарот е ставен под контрола.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Зголемен интензитет на сообраќај поради летните одмори

На 27.08.2025 од 05:00 часот регионалниот пат Р-1106 Нова Брезница – Македонски Брод преку националниот парк Јасен ќе биде пуштен за сообраќај во термините од министерство за внатрешни работи. Се препорачува внимателно возење, почитување на сигнализацијата и прилагодување на брзината поради можни одрони на патот.
Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на граничните преминиод македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
На ГП Меџитлија откриени над 300 шишиња со хемиски препарати за прскање: спречен обид за криумчарење

Царинските службеници на граничниот премин Меџитлија спречија обид за криумчарење на поголема количина препарати за заштита на растенија.
Во раните утрински часови, на 26.08.2025 година, при вршење на редовна царинска контрола на патничко моторно возило Mercedes со македонски регистарски таблички, со кое патувало семејство што изјавило дека се враќа од одмор во Турција и преку Грција пристигнало на влез во нашата земја, од страна на царинските службеници биле откриени 322 шишиња хемиски препарати за прскање, од кои 300 шишиња инсектицид CORAGEN 20 SC и 22 шишиња фунгицид Bellis BASF со вкупна вредност од 16.058,00 евра.
Препаратите биле сокриени на повеќе места во возилото – во багажниот простор зад куферите со лични работи, во просторот за резервна гума и на задните седишта. Возачот не поседувал соодветна дозвола за увоз, иако станува збор за стока што подлежи на посебен режим на дозволи со што безбедноста на производите не е гарантирана .
Стоката е задржана, возилото со кое била транспортирана е одземено, а против лицето ќе биде поведена кривична постапка. Случајот е предаден на Одделението за истраги при Сектор за контрола и истраги за понатамошно постапување.
Македонија
Претежно сончево и топло со температури до 36 степени

Времето денеска, претежно сончево и топло. Ќе дува слаб до умерен ветер од јужен правец. Минималната температура ќе биде во интервал од 6 до 14, а максималната ќе достигне од 27 до 36 степени.
Во Скопје, сончево со мала до умерена облачност. Ќе дува слаб ветер од јужен правец. Минималната температура ќе се спушти до 12, а максималната ќе достигне до 36 степени.
Во следните два дена ќе се задржи претежно сончево и топло време со постепен пораст на дневните температури. Во сабота попладне, во текот на ноќта и во недела претпладне ќе биде нестабилно со локален пороен дожд и грмежи. Ќе дува умерен, наместа засилен југозападен, а во недела северен ветер, кој ќе услови опаѓање на дневните температури. Потоа следува период на стабилно и потопло време.