Поради одржување на претседателските избори, чиј втор круг ќе се поклопи со првичниот датум на одржувањето на 15. издание на „Визер – Скопски маратон“, 5 мај, организаторите донесоа одлука годинешниот маратон да се помести еден ден порано, односно во сабота, 4 мај.

„Датумот ние секогаш го одредуваме една година пред одржување на трката, тоа е една од нашите обврски што ги имаме кон меѓународните асоцијации ИААФ и АИМС. Па, оттаму не можевме да предвидеме дека на денот на одржувањето на 15. Скопски маратон може да се одржат избори во државата. Затоа, одлучивме по официјалното распишување на претседателските избори од страна на претседателот на Собранието, да го преместиме датумот на маратонот еден ден порано. Ова нема да биде ниту прв ниту последен пат да се случат вакви поместувања, како што во минатото било случај и на други маратони во светот. Иако пријавувањето за маратонот е отворено уште од 15 септември 2018, моравме да се одлучиме на ваква тешка одлука за нас во овој момент како би избегнале поголеми штети и последици во организацијата во следниот период. Свесни сме дека оваа непопуларна мерка можеби нема да им се допадне на некои од досега пријавените учесници, посебно на странските тркачи, но се надеваме дека ќе наидеме на нивно разбирање“, изјави Кире Синадиновски, спортски директор на „Визер – Скопски маратон“.

Од Сојузот на спортовите на Скопје им се извинуваат на сите досегашни пријавени учесници за новонастаната ситуација. Сите досега пријавени учесници ќе добијат електронска порака од организаторот, во која ќе биде наведен линк со анкетен прашалник во кој ќе се изјаснат дали ќе може да учествуваат на 4 мај или не за потоа да им се јават организаторите за следните чекори.

Повеќе информации може да се најдат на официјалната веб-страница на „Визер – Скопски маратон“.