Македонија
(Видео) Поплава во средното уметничко училиште во Скопје

Во средното уметничко училиште „Лазар Личеноски“ во Скопје вчера настанала поплава, откако избил вентилот за парно греење за време на часот по македонски јазик. Вода избивала од главниот вентил, учениците во паника почнале да се качуваат по клупите, а водата набрзо се разлеала по ходниците. Од видеата што ни ги испратија читатели може да се види што се случувало вчера во училиштето кое буквално е пред распаѓање.
Димитар Филиповски, директор на „Лазар Личеноски“, вели дека денеска штетата е санирана, но дека останува фактот дека објектот на училиштето е супстандарден.
„Откако изби вентилот, веднаш се јавив во БЕГ, експресно се реагираше, меѓутоа водата се разлеа по ходниците. Вентилот беше затворен и заменет, а техничкиот персонал ја собра водата. Факт е дека објектот е многу стар и супстандарден и последен пат е саниран пред десетина години. Ѕидовите се во распаѓање, има влага, нешто успеваме да санираме, но тоа не е доволно“, изјави Филиповски за „Макфакс“, откако го добивме на мобилниот телефон, бидејќи телефонот во училиштето беше „времено исклучен“.
Во „Лазар Личеноски“ учат 230 ученици и ова училиште, заедно со фискултурното и со музичкото спаѓаат под Министерството за образование, за разлика од останатите средни училишта кои се под Град Скопје.
Токму годинава „Лазар Личеноски“ одбележува 75 години постоење и на 7 јуни планирана е изложба на учениците и друга културна програма.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Затаиле данок од 5,5 милиони денари, кривична пријава за две лица од Струга

Управата за финансиска полиција поднесе кривична пријава против две физички и едно правно лице од Лабуништа, Струга, поради даночно затајување. Лицата со лажни фактури избегнале плаќање на данок од над пет милиони денари.
Првопријавениот Ш. У. во својство на сопственик и управител на правниот субјект Друштво за производство, трговија и услуги ИНТЕРЛА увоз-извоз ДООЕЛ с.Лабуништа Струга во периодот од 07.10.2010 – 10.02.2023 година, со цел да се стекне со противправна имотна корист за себе и за пријавениот правен субјект во текот на 2021 година употребил влезни фактури со невистинита содржина за наводно извршена набавка на стоки и услуги во вкупен износ од 36.926.920 денари со вклучен ДДВ во вкупен износ од износ од 5.632.920 денари, издадени и ставени на располагање од страна на второпријавениот А. Т. во својство на управител на правен субјект Друштво за производство, трговија и услуги РЕЛАКС САС ДООЕЛ Неготино во периодот од 29.04.2020 година до денес.
Првопријавениот Ш. У. во сметководстваната евиденција ги евидентирал влезните фактури и креирал побарување за ДДВ кое го употребил за пребивање односно намалување на обврските за ДДВ со што нанел штета на Буџетот на Република Северна Македонија по основ на ДДВ по пресметковна стапка од 15,2542% во износ од 5.632.920 денари.
Македонија
„Палењето на куќата на Пандов е обид за заплашување и замолчување, бидејќи криминалците повеќе немаат заштита од власта“, велат од ВМРО-ДПМНЕ

ВМРО-ДПМНЕ најостро го осудува палењето на куќата на директорот на Управата за извршување санкции Александар Пандов и повика на итна и брза реакција од страна на институциите.
„Овој чин е обид за заплашување и замолчување на Пандов бидејќи изминатиот период јавно говореше за сите криминални дејствија што се случувале, а за кои тогашната власт и раководство се обиделе да ги затскријат.
Пандов е мета на напад бидејќи застана во отворена борба против криминалот и корупцијата“, велат од ВМРО-ДПМНЕ.
„Криминалците повеќе немаат заштита од страна на власта. За ваквото девијантно однесување мора да има казна.
Времето на палење куќи, автомобили, уцени и закани заврши, за секој одговорен и инволвиран во вакви настани ќе следува одговорност. Правда мора да има!“, додаваат од ВМРО-ДПМНЕ.
Македонија
Државниот секретар Петрушевски на средба со амбасадорот на Црна Гора Миљаниќ

Вчера државниот секретар во Министерството за внатрешни работи, Сашо Петрушевски оствари работна средба со амбасадорoт на Црна Гора во Р.С.Македонија Н.Е. Зоран Миљаниќ.
На средбата заеднички беа потврдени одличните односи помеѓу двете земји и високото ниво на политички дијалог и соработка, како и посветеноста за натамошно продлабочување на истата, извести МВР.
Државниот секретар во МВР Петрушевски се заблагодари за постојаната поддршка од страна на Црна Гора, потенцирајќи ја важноста за продолжување на билатералната и регионалната соработка кои се од особено значење за двете држави.
Во фокусот на состанокот беа актуелните политички состојби во двете земји, можностите за продлабочување на соработката преку учество во регионалните и меѓународните иницијативи, со цел зајакнување на истата во контекст на справување со безбедносните предизвици и борбата против секаков вид на криминал, соопшти МВР.