Македонија
Попова: Додека траат пресметките, скопјани остануваат без лунапарк

Додека траат пресметките, скопјани остануваат без лунапарк, изјави денеска Ирена Попова од ВМРО-ДПМНЕ, на прес-конференција посветена за стопирањето на градежните активности во лунапаркот.
„Шилегов ја прекина градбата на лунапаркот во Скопје со изговор дека ќе бара јавен приватен партнер. Во меѓувреме не се работи, иако градежните работи беа во полн ек. Постојат две причини зошто престана да се гради: првата е изговорот на Шилегов дека градот нема пари, но ова е изговор, а не причина. Бидејќи Градот Скопје и Шилегов најавија дека ќе потрошат 8 милиони евра за дислокации на галиите и за рушење, што значи пари за лунапарк има. Втората причина е дали зад наоѓањето јавен приватен партнер се кријат бизнис-интереси на оваа криминогена власт. Кој треба да го добие овој простор и дали се планира проширување на овој простор, зафаќање нови површини од паркот и вметнување големи угостителски објекти со цел исполнување на бизнис-интересите на власта?“, праша опозицијата.
Од ВМРО-ДПМНЕ му порачаа на Шилегов, наместо со пуштање автобуски постојки, садење цвеќиња и дрвја, да се посвети на суштинските прашања и потреби на овој град.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Почувствуван земјотрес во Македонија

Телеметриската сеизмолошка мрежа на Република Северна Македонија, на сеизмолошките станици инсталирани ширум нашата територија, одржувани од Сеизмолошката опсерваторија при Природно-математичкиот факултет во Скопје, попладнево во 16 часот и 14 минути регистрираше земјотрес чиј епицентар потекнува од епицентралното подрачје Тетово-Гостивар, 39 км западно од Скопје, со Рихтерова локална магнитуда, ML2.7.
Според досегашните податоци со кои располага опсерваторијата, земјотресот е почувствуван во Тетово, Гостивар и блиската околина со интензитет од III степени според Европската макросеизмичка скала.
Македонија
МНР: Амбасадата во Прага е во координација со семејството на Чифлиганец за пренeсување на телото во Македонија

Министерството за надворешни работи и надворешна трговија информира дека на 2 август 2025 година, до македонската амбасада во Прага била доставена информација за тешка сообраќајна несреќа во која бил повреден македонскиот државјанин Душко Чифлиганец. Тој управувал мотор кога дошло до незгодата, по што со тешки повреди бил пренесен во болница.
На 3 август, семејството го известило дипломатско-конзуларното претставништво дека Чифлиганец им подлегнал на повредите.
Како што соопштија од МНР, Амбасадата во Прага е во континуирана комуникација со семејството со цел завршување на сите неопходни формалности и организација за пренос на телото во Македонија.
Македонија
Изгаснат пожарот кај Липково, гори на две локации

До 12 часот активни се два пожари на отворен простор, еден пожар е под контрола, а еден е изгаснат.
Активните пожари се наоѓаат во село Богомила во општина Чашка, каде гори мешана шума, како и во село Грешница во општина Македонски Брод, во деградирана нискостеблеста шума, соопшти ЦУК.
Пожарот кој е под контрола е во село Стровија во општина Долнени, зад местото викано Гајдарец-Клепало, во нискостеблеста шума.
Пожарот што е изгаснат се наоѓа во село Слупчане во општина Липково, каде горела ниска вегетација.