Дел од корисниците на улицата Киро Крстевски Платник во општина Центар утре од 9:00 часот ќе останат без водоснабдување поради изведување приклучок на водоводна мрежа со пречник од 80 милиметри на улицата Киро Крстевски Платник број 6.

Поради дефект на затворач на водоводна мрежа со пречник од 80 милиметри на улицата 36 бр. 12 во село Трубарево утре од 9:00 часот прекинато водоснабдување ќе имаат дел од корисниците од селото Трубарево, општина Гази Баба.

Како што информира Регионалниот центар за управување со кризи на град Скопје, корисниците ќе бидат без водоснабдување се додека екипите на ЈП „Водовод и канализација“ Скопје не завршат со интервенциите.

Дел од корисниците од улицата „Саса“ во населбата Пинтија во општина Кисела Вода утре од 8:30 до 12:00 часот ќе останат без напојување со електрична енергија.

Од 9:00 до 15:30 часот, без струја ќе бидат и корисниците од улицата Христо Татарчев, подулица број „13“ во истата општина, а од 9:00 до 15:00 часот корисниците од улицата 500 на потегот од број 24 до број 45 во село Марино, општина Илинден.

Како што информира Регионалниот центар за управување со кризи на град Скопје, причина за прекинот во снабдувањето со електрична енергија е изведувањето планирани зафати во електродистрибутивната мрежа од страна на екипи на ЕВН Македонија АД.

ТАВ Македонија, подружница на ТАВ Аеродроми, и Министерството за внатрешни работи денеска успешно реализираа вежба за итни ситуации и вонредни состојби на Меѓународниот Аеродром Скопје.

Денешната вежба за симулација на вонредна состојба имаше за цел да ги тестира во реално време одговорот и ефикасноста на плановите за итни ситуации и оперативниот план за постапување во вонредни состојби предизвикани од дејствија на незаконско постапување, координацијата, комуникацијата и подготвеноста на сите засегнати страни и да осигури дека се исполнети највисоките стандарди за безбедност и сигурност.

За време на вежбата, организирана од страна на аеродромскиот оператор, ТАВ Македонија, сите засегнати оддели на Меѓународниот Аеродром Скопје, и Министерството за внатрешни работи, а поддржани и во соработка со националните служби за одговор при итни ситуации и вонредни состојби предизвикани од дејствија на незаконско постапување, беше симулирана вонредна состојба со пратка од висока вредност, заложници и експлозија со импровизирана експлозивна направа, проследена со пожар во затворен простор во приемниот магацин при Карго центарот на ТАВ Македонија. Вежбата овозможи реална, практична можност за проценка и евалуација на координацијата за брз одговор и ефективноста на меѓуинституционалната координација меѓу одделите на скопскиот аеродром, Министерството за внатрешни работи, локалните и националните служби за итни ситуации и вонредни состојби и другите засегнати страни и чинители.

„Денес сме сведоци на заедничка вежба на аеродромските безбедносни служби на ТАВ Македонија и специјалните полициски сили при МВР – настан од исклучително значење за безбедноста на Меѓународниот аеродром Скопје и патниците. Со оваа вежба демонстрираме подготвеност, координација и професионализам во справувањето со потенцијални закани. Високото ниво на обука, брзината на реакција и соработката меѓу службите се клучни за заштита на аеродромската оперативна безбедност и обезбедувањето на воздухопловството. Ова не е само тренинг – ова е залог за сигурност, доверба и успешна превенција. Благодарност до сите учесници за нивната посветеност и професионалност. ТАВ Македонија продолжува да инвестира во обука и модернизација за да ги одржиме највисоките стандарди на безбедност“, изјави Перо Лупевски, заменик генерален директор за операции на ТАВ Македонија.

„Преку симулацијата на сценарио на заложничка криза, практично ги тестираме капацитетите на институциите на национално ниво, а исто така го тестираме нивото на подготвеност и брзината на реакција на службите, на владините институции како чинители и на аеродромскиот оператор ТАВ Македонија. Вежбата се одвиваше на исклучително професионално ниво, со соодветна брзина и реакција. Безбедноста на вакви витални инфраструктурни објекти и на секој поединец е од круцијално значење за нас како полиција, бидејќи со сето тоа, со зајакнување и почитување на протоколите за оваа проблематика и нивната имплементација, нѐ мапира нас како држава, но и аеродромот, на високо ниво европско па и светско ниво“, изјави Александар Јанев, директор на Бирото за јавна безбедност.

Вежбата која опфати сложена вонредна состојба предизвикани од дејствија на незаконско постапување, со потенцијална безбедносна закана, има за цел тест на сите засегнати страни за брза реакција и одговор, медицински тимови, кризни комуникации и протоколи за безбедност и обезбедување, и оценка на ефикасноста на плановите за итни ситуации и вонредни состојби на аеродромот, протоколите за комуникација и координацијата меѓу повеќето учесници.

Оваа редовна целосна вежба за реакција при итни ситуации и вонредни состојби е дел од посветеноста на ТАВ Македонија за почитување на регулаторните барања и континуирано подобрување на стратегиите за управување со кризи. Согледувањата добиени од вежбата ќе се искористат за усовршување на програмите за обука, ажурирање на процедурите за итни ситуации и вонредни состојби, дополнително подобрување на безбедноста и обезбедувањето на патниците и персоналот и зајакнување на соработката и координацијата со Министерството за внатрешни работи.

Директорот на Бирото за јавна безбедност, Александар Јанев, најави дека се размислува за комбинирање на повеќе мерки за подобрување на безбедноста во сообраќајот, а во исто време се преземаат активности за имплементација на системот „Безбеден град“. Системот, кој е во фаза на подготовка, ќе биде поддржан од нови законски измени кои се во владина процедура, а истовремено се вршат проверки за неговата функционалност.

„Не можеме да игнорираме дека се додека не ги почитуваме сообраќајните правила, без разлика на присуството на сообраќајни патроли, секој од нас е изложен на опасност“, изјави Јанев, реагирајќи на последните сообраќајни несреќи со жртви што се случија во изминатата недела.

Тој истакна дека во урбаните средини, каде што контролите се зајакнати, се намалил бројот на сообраќајни незгоди и прекршоци. Притоа, зголемен е бројот на детектирани прекршители, што укажува на позитивни ефекти од применетите мерки. Но, како што истакна, суштината лежи во промена на сообраќајната култура.

„Затоа што, ако не ги почитуваме сообраќајните правила, ние како учесници во сообраќајот, сме потенцијални жртви“, додаде Јанев.

Јанев објасни дека МВР има детектирано овој проблем уште пред појавата на актуелните сообраќајни инциденти. Тој најави дека се применуваат превентивни кампањи и рестриктивни мерки за безбедноста на сообраќајот, а дополнително ќе се зајакнат контролите преку „Безбеден град“.

Системот „Безбеден град“, кој веќе се подготвува, ќе вклучува технологија што ќе овозможи детектирање и санкционирање на прекршителите, а казни за прекршоци ќе започнат да се применуваат од 1 јануари 2026 година. Како што објасни министерот за внатрешни работи Панче Тошковски, во првите месеци граѓаните ќе добиваат предупредувања, а по влегувањето на системот во целосна функција, казните ќе станат законски обврзувачки.

„Системот ќе се прошири и на санкционирање на непрописно паркираните возила“, додаде Тошковски.

Директорот Јанев упати апел до сите учесници во сообраќајот, истакнувајќи дека сообраќајната култура и почитувањето на правилата треба да бидат на највисоко ниво за да се избегнат несреќи и загуби на животи.