Македонија
Порастот на ДДВ го полни буџетот со парите на сиромашните, велат од партијата Левица
„Повторно елитите на партиите од власта СДС и ДУИ, исполнувајќи ги желбите на нивните пријатели од олигархијата ги угнетуваат обичните луѓе и нивната економска моќ.
Неопходно е да се зголеми уделот на данокот во буџетот, но тоа мора да се направи даночејќи ги оние кои најмногу профитираат од инфраструктурата на Република Македонија. Левица, од позиција на власт, ќе воведе вистински данок на луксузни добра, ќе воведе прогресивно даночење на добивката на најпрофитабилните компании, ќе ја казни експлоатацијата со повисоки даноци за фирмите кои прават енормни профити, а исплаќаат ниски плати, и прогресивно ќе го оданочи личниот доход на олигархијата.
ДДВ-то, како данок на консумпција, диспропорционално повеќе задира во џебот на осиромашените и работниците, отколку на богатите слоеви во Републиката. Со новите покачување на стапката на ДДВ, на продукти кои во никој случај не се луксузни добра, јазот помеѓу сиромашните и богатите уште повеќе ќе се зголемува, додека државата ги покрива дупките во буџетот со пари од џебот на сиромашните.
Социјалдемократите, кои уште од својата програма во 2016 ветуваа пофер даноци за сите, два мандати не се способни да воведат прогресивен данок. Срамежливите обиди да се протуркаат и оние две стапки на данок на личен доход беа спречени од домашната олигархија, за сега дупките во буџетот се полнат преку зголемување на данокот на додадена вредност!
Буџетот на Македонија генерално се полни со помош на задолжувања. И оној мал дел што се полни од даноци, во голема мера се полни преку данокот на додадена вредност. Таквиот данок, не само што е класно-агностичен и не диференцира помеѓу сиромашни и богати, туку е и регресивен и откорнува поголем дел од приходите на работничката класа и од оние со пониски примања, отколку од богатите!“.
Соопштение на политичката партија Левица
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Зголемување на водостојот и излевање на Крива Река во село Опила
По добиената пријава во ЦУК, за зголемување на водостојот и излевање на Крива Река во село Опила во општина Ранковце, Секторот за операции и координација на ЦУК преку Регионалниот центар за управување со кризи Крива Паланка, веднаш ги извести Општина Ранковце и побара да се излезе на лице место и да се направи увид во состојбата.
ЦУК известува, по направениот увид од страна на Општина Ранковце, дека во еден дел околу мостот, за којшто е добиена пријавата, има излевање на реката на околните земјени патеки. Конкретно под вода е една нива и импровизирано игралиште. Причината за ваквата состојба е констатирано дека најверојатно е нерасчистеното корито од бујната распространетата вегетација.
Мерки за расчистување општина Ранковце ќе преземе веднаш по смирување на водата во речното корито и повлекување на истата, на веќе дефиниран простор, известува ЦУК.
Македонија
Вицегувернерката Митреска на Состанокот на БИС: Политиките на централната банка овозможуваат стабилизација на инфлацијата и зајакнување на отпорноста на банкарскиот систем
Мерките за справување со инфлацијата, коишто ги презема Народната банка, истовремено придонесоа и за дополнително јакнење на отпорноста на банкарскиот сектор, посочи вицегувернерката Ана Митреска, во дискусијата на 23. состанок на Банката за меѓународни порамнувања (БИС) за монетарната политика во Централна и Источна Европа.
Народната банка презема повеќе мерки за стабилизирање на инфлацијата. Покрај промената на основната камата, централната банка делуваше и преку операции на девизниот пазар, промени кај инструментот задолжителна резерва и преку макропрудентните мерки. „Макропрудентните мерки во основа беа користени за да се зголеми отпорноста на банкарскиот систем, но исто така претставуваа и поддршка на затегнувањето на монетарната политика во борбата против инфлацијата. Во неколку наврати беше зголемен контрацикличниот заштитен слој на капиталот на банките и беа воведени макропрудентни инструменти за квалитетот на кредитната побарувачка од физичките лица. Податоците покажуваат дека многу земји применија макропрудентни мерки, не само за задржување на финансиската стабилност, туку и за поддршка на монетарната политика. Во Европа, на пример, од почетокот на 2020 година досега, контрацикличниот заштитен слој на капиталот е зголемен од 0,25 п.п. до 2,5 п.п.“, посочи вицегувернерката Митреска.
Примената на комбинација на различни мерки за борба против инфлацијата беше значајно за задржување на финансиската стабилност. Историските податоци покажуваат дека при епизоди на раст на каматните стапки, можна е појава на ризици за финансиската стабилност. „Сепак, сегашниот циклус на монетарно затегнување беше придружен и со низа макропрудентни мерки, преку коишто се спречува појава на финансиски стрес“, посочува вицегувернерката Митреска. Притоа, таа истакна дека резултатите од стрес-тестовите за ефектите од зголемувањето на каматните стапки врз портфолиото на домашниот банкарски сектор покажале дека банките се добро подготвени за да ги надминат евентуалните предизвици, како и дека досега нема остварување на ризиците. Сепак, посочува дека поради постојана неизвесност, и централните банки, и банкарскиот систем во целина треба да се внимателни и подготвени за соодветна реакција во случај на нови шокови.
Македонија
Граѓаните на Куманово да не ја користат водата за пиење од Водоводот, алармира ЦУК
Денеска, до Центарот за управување со кризи до Секторот за операции и координација е побарана координација помеѓу институциите заради надминување на голем проблем за водоснабдување на градот Куманово.
Имено, по вчерашните обилни поројни врнежи од дожд и град во Липковскиот регион е предизвикано зголемување на нивото на Липковска Река, што има влијание на системот за водоснабдување – на филтер станицата на ЈП Водовод Куманово. Според информација од одговорното лице на филтер станицата се работи за количина на над 10.000 m3 заматена вода што влијае на процесот на прочистување и испорака на истата до граѓаните. Од тие причини, во моментот е појавена заматеност на водата во цевководниот преносен систем и е прекината дистрибуцијата до граѓаните, што најверојатно ќе трае во текот на целиот денешен ден, а по потреба, се до моментот на надминување на состојбата, известува ЦУК.
Од Центарот за управување со кризи, веднаш е побарано инспекциските служби и Центарот за јавно здравје од Куманово да излезат на лице место, направат увид, земат мостри за анализа и донесат соодветно решение за понатамошна постапка. Истовремено е известена и Општина Куманово за понатамошна постапка, во насока преземање мерки и активности за надминување на состојбата во интерес на граѓаните, а во моментот е воспоставена е комуникација со медиумите заради известување кон граѓаните на Куманово, соопшти ЦУК.
Најавено е дека во 12.00 часот ќе заседава Општински штаб со сите претставници од институции во Општина Куманово