Македонија
Портпаролот на Вреди објави дека неговиот татко е осомничениот за полов напад врз дете

Фари Хисени, портпарол на коалицијата Вреди привремено ќе ги замрзне политичките активности, откако денеска обвинителството поведе постапка против 58-годишен маж од Скопје за други полови дејствија врз малолетник, а потоа тој соопшти дека се работи за неговиот татко.
Обвинителството денес објави случај на полови дејствија од маж кон дете, а потоа на социјалните мрежи Хисеини напиша дека се работи за неговиот татко кој е осомничен во постапката.
Според опишаниот настан мажот во раните утрински часови денеска во парк во една населба го сретнал 16-годишното момче со кого претходно се познавале и го повикал да разговараат, по што започнал да го допира.
Малолетникот успеал да се извлече и го пријавил во полиција.
Хисени на својот профил на Фејсбук објави дека е длабоко шокиран и повреден од веста.
„Не можам да го најдам вистинскиот збор да го опишам овој момент! Ако оваа информација е точна, тоа ќе биде страшен удар, не само за мене туку и за целото мое семејство. Само помислата да се соочам со ова ми ја пече душата! Како луѓе, ние сме одговорни само за нашите постапки и за вредностите што ги поддржуваме, но тоа не ја менува мојата решеност да дејствувам. Затоа, за да не создадам некакво недоразбирање или погрешен впечаток, решив привремено да ги замрзнам моите политички активности. Не сакам од моја позиција да се согледа дека можам на кој било начин да влијаам врз институциите што го истражуваат ова чувствително прашање“, пишува Хисени.
Тој додава дека целиот свој живот е активист за човекови права, борејќи се против неправдата и насилството во сите нејзини форми.
„Не можам да бидам рамнодушен кон неа, без разлика од кого доаѓа. Исто така, во овие тешки моменти, понизно барам да се почитува приватноста на моето семејство што е можно повеќе. Ни треба простор за мирно да се соочиме со оваа ситуација, далеку од очите на мислењето кое само ја влошува оваа ситуација во која се наоѓаме уште повеќе!“, пишува тој.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Тошковски: Припадниците на МВР денеска примија плата зголемена за 10 отсто

Припадниците на МВР денеска примија плата зголемена за 10 отсто, информира министерот за внатрешни работи, Панче Тошковски.
„Изминативе години сосема оправдано имаше критики дека платите во МВР се ниски, а очекувањата и одговорностите големи. Често се укажуваше на разлики во однос на некои сродни служби, а чувството на потценетост беше реално и оправдано. Ова зголемување не е доволно, но е еден од многуте чекори што ќе следат во насока на враќање на достоинството и угледот на полицаецот. Целта е јасна – да изградиме модерна, професионална и силна полиција која ќе биде вистински сервис на граѓаните. Продолжуваме понатаму кон обезбедување на подобри услови, поголема поддршка и вистинско вреднување на трудот што секојдневно се вложува“, напиша Тошковски во објавата на социјалните мрежи.
Македонија
Оставката на Папазов помина на владина седница

Владата ја прифати оставката на градоначалникот на Кочани, Љупчо Папазов.
Советот на општината ќе треба да назначи в.д. градоначалник на Кочани, откога одлуката ќе биде објавена во „Службен весник“.
Инаку, Папазов ја поднесе оставката по пожарот во дискотеката „Пулс“ каде животот го загубија 59 лица, а околу 200 беа повредени и префрлени низ клиниките во земјава и странство.
Папазов по оставката беше приведен и одреден му беше притвор. Во куќен притвор се и неговите двајца претходници од градоначалничката фотелја.
Според истрагата, тројцата осомничени градоначалници на Кочани во периодот од 2012 година до 16 март кога се запали дискотеката, не ги извршиле своите правни обврски во согласност со Законот за заштитата и спасувањето, со што овозможиле кабарето „Пулс“ незаконито да продолжи со вршење угостителска дејност. За целиот овој период, како што беше истакнато, Општината примала уплати по основ на надоместок за угостителски објект.
Македонија
„Вреди“: Посакуваме Бектеши да ја докаже невиноста, не сакаме ниту еден Албанец да биде одговорен за Кочани

Коалицијата „Вреди“ посакува ексминистерот за економија од редовите на ДУИ, Крешник Бектеши да ја докаже својата невиност во случајот со лиценцата за дискотеката „Пулс“ во Кочани, без оглед на ривалството со Интегративците.
„Без разлика што сме лути политички противници, не сакаме ниту еден Албанец да биде одговорен за трагедијата во Кочани. Но, за тоа одлучуваат правосудните органи, а не политичките чинители“, велат од „Вреди“.
Понатаму додаваат дека ДУИ веќе се претвориле во партија чија единствена идеологија е одбрана на своите поранешни функционери. За таа нивна цел, како што додаваат, се подготвени да ги бојкотираат локалните избори и да се обидат да предизвикаат политичка криза.
„Кога ДУИ зборува за систем, треба да одговори на што точно мисли. На системот кој нивниот режим го создаваше 22 години, додека беа дел од сите Влади на СДСМ и ВМРО-ДПМНЕ? На Јавното Обвинителство на Ислам Абази? На бегалците од правдата Артан Груби и Прпарим Бајрами? На системот на владеење кој од голобради функционерчиња на ДУИ направи милионери на грбот на Албанците? На системот во кој имаше селективна одговорност за трагедиите со модуларната болница во Тетово, Ласкарци, Беса транс?“, се додава во соопштението на коалицијата на албанските партии која е дел од владејачката гарнитура.
Понатаму заклучуваат и дека колку и да се препелка ДУИ, колку и лажно да се претставуваат како фактор меѓу Албанците, политичкиот крај на ова нивно корумпирано раководство пристигнува.