Португалскиот министер за надворешни работи, Жоао Гомеш Кравињо, кој е во официјална посета на Македонија, рече дека им верува на бугарските политичари во дадениот збор и потпис и дека не верува оти ќе се случат нови блокади во текот на преговорите.

„Мислам дека е од суштинско значење во меѓународната политика да веруваме во дадениот збор и на потпишаното. Не гледам причина зошто би се иницирало истото прашање. За разни прашања, ако почнат блокади, без оглед на она што е договороно, ќе се парализира целото функционирање“, рече Кравињо.

Тој објасни зошто францускиот предлог бил подобар од португалскиот, кој беше широко прифатен од македонските власти и од претседателот Пендаровски, со образложение дека е добра основа за решение со Бугарија.

„Што го прави францускиот предлог подобар? Во политиката не е целта да се постигне сѐ, туку она што е возможно. Ѝ оддавам признание на македонската влада за надминување на тешкотиите и што го помрдна процесот напред. Ова е историски момент, кој нѐ прави среќни, ние во текот на португалското претседелство создадовме услови за да се стигне до овој момент. Со елементи од нашиот предлог стигнавме до овој историски момент. Португалија и понатаму ќе ја поддржува вашата земја во текот на целиот процес. Пристапувањето на Македонија е од суштинско значење за ЕУ. Можеме да го понудиме нашето искуство од преговорите на другите аспиранти за влез во ЕУ“, истакна Кравињо и додаде дека Португалија и Македонија сега ќе се фокусираат на билатералните односи и соработката во економијата, образованието и одбраната.

Орце Костов