Македонија
Посебен оперативен тим ќе ги решава дојавите за бомби, ќе се заштитуваат и државни сервери во институциите

Владата ќе стави акцент на сајбер безбедноста, откако државата е под заложништво на лажни дојави за бомби изминативе два месеци. Се формира работна група со експерти, кои ќе детектира слабости кај критичната инфраструктура во државата, а која може да биде мета на сајбер напади. За ваков чекор, Владата се одлучи дури половина година откако дел од серверите на институциите беа мета на напади.
„Оперативниот тим ќе го раководи Бирото за јавна безбедност. Ќе има претставници на АНБ, Агенцијата за разузнавање и Секторот за воена безбедност при Министерството за одбрана. Ќе членуваат експерти доминантно од ИТ технологиите, се она што се зборуваше во јавноста – ВПН мрежи, делот на целиот процес врз кој овие хибридни закани кои се спроведуваат. Ќе имаат помош и од ад-хок експерти кои доаѓаат од други институции со соодветно знаење, а кои не можат да бидат членови поради сензитивноста на работата. Преку стручни мислења, ад-хок експертите ќе помагаат. Ќе биде во координација со стратешките партнери, САД и НАТО“, рече премиерот Димитар Ковачевски.
Тој очекува и резултати.
„Хибридните закани, најголем дел доаѓаат преку ВПН сервери од странство. Тој тим ќе треба да изработи и дијагностика на системите кои ги имаме како критична инфраструктура во државата, во делот на сајбер безбедноста и хибридните закани. Тоа ќе биде основа за подготовка на среднорочен и долгорочен план за унапредување на институциите. Ќе имаат значајна работа, не се сомневам во стручноста на експертите со кои располагаме“, додаде премиерот Ковачевски.
Македонија, два месеци е мета на хибридни напади. Дојави за поставени бомби имаше во десетици институции, училишта, но и во трговски центри.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Предложен притвор за таткото што тепаше играчи на фудбалскиот натпревар во Штип

Основното јавно обвинителство Штип денеска поведе итна постапка против едно лице за кривично дело – Насилство.
Осомничениот извршил грубо насилство на 24 август на стадионот „Бело Брдо“ во Штип, за време на фудбалски натпревар меѓу младинските екипи на фудбалските клубови „Брегалница“ и „Шкупи“.
Со дејствијата тој ја загрозил сигурноста на две деца родени 2010 година, играчи за тимот на „Беласица“, нанесувајќи им телесни повреди. Освен тоа, кај оштетените, останатата присутна публика и во јавноста предизвикал чувство на несигурност, загрозување и страв.
Настанот се случил во 89-тата минута од натпреварот, која судијата поради прекршок (фаул) доделил втор жолт картон со што го исклучил од игра синот на осомничениот, кој играл за „Шкупи“.
Незадоволен од одлуката, најпрво синот се однесувал неспортски и со тупаници и со удар со нога се обидел да се пресмета со еден од фудбалерите на „Брегалница“. Тогаш на теренот влегол таткото и со тупаници и клоци започнал да ги удира двете деца, нанесувајќи им телесни повреди – повеќе набиеници и скршеница на нос без дислокација. На игралиштето влегле и други лица од публиката, кои спречиле натамошна ескалација на настанот.
Јавниот обвинител до судијата на претходна постапка од Основниот суд во Штип поднесе предлог за определување мерка притвор за осомничениот, имајќи го предвид видот и сериозноста на кривичното дело против јавниот ред, опасноста од бегство на осомничениот и можноста за повторување на делото.
Македонија
Седум пожари денеска во Македонија, три изгаснати

На територијата на Македонија имаше вкупно седум пожари на отворен простор, од кои два се активни, два се под контрола и изгаснати се три пожари, информира Центарот за управување со кризи.
Активни се еден пожар во Општина Долнени, во село Долгаец каде гори мешана шума и еден пожар на влезот на Крушево каде гори депонија.
Под контрола е пожарот во Јасен, и еден пожар на планината Кожуф каде гори висока шума.
Изгаснати се пожари во Општина Штип: с. Судик (стрниште); Општина Дебар: с. Елевци (ниска вегетација) и во Општина Куманово: нас. Гоце Делчев (ниска вегетација).
Македонија
ВМРО-ДПМНЕ почнува со кампања за собирање предлози од граѓаните

Од среда, 27 август, ВМРО-ДПМНЕ ќе почне седумдневна теренска кампања за собирање на идеи и предлози за проекти од граѓаните, кои ќе бидат опфатени во програмите на кандидатите за градоначалници.
Од 27 август до 3 септември во временски период од 17 до 21 часот, во сите општини низ државата, на плоштадите или прометните локации во истите ќе бидат поставени штандови дел од акцијата „Предложи! Вистинската идеја за вашата општина!“ каде граѓаните на посебен формулар за оваа акција ќе можат да напишаат своја идеја која сакаат да ја видат реализирана како проект од идните градоначалници на ВМРО-ДПМНЕ.
Во истиот временски интервал ќе бидат отворени и сите штабови низ државата каде членовите на партијата и граѓаните исто така ќе може да ја дадат својата идеја или предлог за проект.
Истовремено во истиот период граѓаните ќе можат да ги достават своите идеи и предлози за проекти по електронски пат, на адресата: [email protected]. Каде ќе бидат разгледани исто како и предлозите и идеите од штандовите и штабовите од тимот експерти кои ќе ги пишуваат програмите.
Од ВМРО-ДПМНЕ велат дека очекуваат масовен одзив на граѓаните, се со цел што е можно подетални и содржајни програми со проекти кои извираат директно од нив и нивните потреби.