Македонија
Посебен режим на сообраќај поради трката „Прв до врв“ во Скопје

Денеска со почеток во 09.45 часот, во организација на Здружението за спорт и рекреација „Прв до врв“ од Скопје, ќе се одржи спортско-рекреативна трка „Прв до врв“, со траса на движење на велосипедската трка со почеток од пред Музеј на град Скопје на ул.„Св. Кирил и Методиј“, лево по бул.„Св. Климент Охридски“, во продолжение по бул.„Мајка Тереза“, лево по ул.„Тодор Александров“, во продолжение по локален пат за Средно Водно до врвот на Водно („Милениумски крст“).
Трасата на движење на планинарите, пак, е со почеток од пред ОУ„Кочо Рацин“ на булеварот „Мајка Тереза“, право по ул.„Тодор Александров“ и кај ул.„Салвадор Аљенде“ десно, по ридско пешачките патеки кон Средно Водно, а од Средно Водно кон врвот на Водно („Милениумски крст“).
Министерството за внатрешни работи ќе преземе мерки за посебен режим на сообраќајот на горенаведените сообраќајници, а сообраќајот ќе се пренасочува по околните сообраќајници.Воедно, МВР апелира до граѓаните да ги почитуваат наредбите што ги издаваат полициските службеници по сообраќајниците каде што ќе се одвива трката, се вели во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Не чувствувам вина, јас ги спасив сите што можев“, кажа Столе Боев обезбедување на дискотеката „Пулс“

Столе Боев, обезбедување на дискотеката „Пулс“ изјави вечерва дека не чувствува вина.
„Јас ги спасив сите што можев и многу ми е криво и мака за тие што не можев тие да ги спасам. Со голема болка и тага изразувам сочувство до семејствата на починатите. Голем дел од нив се мои пријатели и другари кои на сопствени раце ги извадив. Не знаете на мене како ми е, ама тоа е“, кажа Боев.
Тој одговори дека гневот во Кочани не е кон нив.
„Луѓето што протестираат се од кај нас, бараат правда за нас, слобода, ние успеавме се да направиме, јас сум дел од обезбедувањето што успеа да ги извади сите преживеани“, додаде Боев.
Македонија
Бектеши и Трајковски со лисици стигнаа во судот во Кочани

Поранешниот министер за економија Крешник Бектеши и поранешниот директор на Државниот пазарен инспекторат Горан Трајковски вечерва се донесени во судот во Кочани каде што ќе дадат исказ пред судија на претходна постапка во врска со трагедијата во дискотека „Пулс“.
Во судот покрај нив влезе уште едно лице, а во исто време излезе друго, со лисици на рацете и со покриено лице.
Распитот на Љупчо Папазов, градоначалникот на Кочани кој си поднесе оставка заврши.
Претходно државниот обвинител, Љупчо Коцевски, информираше дека за вкупно 14 лица е побаран краткотраен притвор.
Сите се гонат за тешки дела против безбедноста. Предвидената казна е од три години затвор до максимални 20 години.
Во пожарот во дискотеката загинаа 59 млади лица, а повеќе од 150 се здобија со повреди и се лекуваат во државата и во неколку други земји, меѓу кои Бугарија, Србија, Грција.
Македонија
Уште четворица пациенти од Македонија пристигнаа на ВМА во Белград

Четворица пациенти од Северна Македонија кои беа тешко повредени во пожарот во Кочани штотуку пристигнаа на ВМА во Белград.
Како што објави српски Телеграф, пациентите се во стабилна состојба.
Станува збор за три девојки и едно 22-годишно момче. Тие се препратени на клиника за пластична хирургија.
59 лица загинаа во пожар што избувна ноќта меѓу саботата и неделата во дискотеката „Пулс“ во Кочани.