Македонија
Последна надеж за 4-годишната Сибора од Скопје, која боледува од канцер, е хуманоста на граѓаните

Семејството на 4-годишната Сибора Малетај од Скопје, која боледува од канцер на глава со дијагноза (EWING SARCOM/PNET), со апел до сите хумани граѓани бара да се соберат средства за хируршка интервенција и лекување на малото девојче во Турција.
„Републичкиот фонд за здравство на Македонија не ни дозволува, односно не исплаќа парични средства за хируршка интервенција и лекување во странство“, наведуваат од семејството и додаваат дека операцијата првично изнесува 35.000 евра и е последна надеж за оздравување на Сибора.
Над четиригодишното девојче досега се извршени две операции на канцер на глава – првата операција е извршена во приватната болница „Аџибадем Систина“ во Скопје, а втората кон крајот на месец декември 2018 во Турција во приватна болница на „Аџибадем“ во Истанбул.
Како што иформираат од семејството, овие скапи операции биле извршени без никаква парична помош на Републичкиот фонд за здравство, односно само со парични средства на семејството на Сибора и помошта од хуманите граѓаните на Македонија.
„При извршена хирушка интервенција во Турција е отстранет канцерот од главата, но, за жал, по месец дена болеста немилосрдно пак се појавува кај малата храбра Сибора, во еден дел од абдоменот“, информираат од семејството.
Додаваат дека последната надеж за нејзино заздравување е во рацете на хуманите граѓани на Македонија.
Имено, од приватната болница „Санте плус хоспитал“ во Скопје даваат надеж за хируршка интервенција во друга болница со светско реноме во Турција.
За таа цел граѓаните кои имаат броеви на „Македонски телеком“, може да донираат по 100 денари со повик на телефонскиот број 070/143-131.
„Ги молиме сите хумани граѓани на Македонија да ѝ помогнеме на 4-годишната Сибора со парична помош за нејзината последна надеж за хируршка интервенција во Турција. Се надеваме дека со Божја помош и ваша помош малата прекрасна Сибора ќе биде излечена и среќно ќе го помине својот живот“, истакнуваат од нејзиното семејство.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ЗНМ: Апелите од Министерството за здравство се на граница на цензура

Здружението на новинари на Македонија (ЗНМ) со загриженост ја следи јавната комуникација на Министерството за здравство, во која се упатуваат апели до медиумите кои се ограничувачки по својата содржина и претставуваат обид за воспоставување на лоша институционална пракса во односите со медиумите.
„Како ЗНМ, го осудуваме обидот на Министерството да наметнува практични правила за тоа како медиумите треба да известуваат, особено кога тоа се однесува на чувствителни настани од јавен интерес. Таквите инструкции, иако формално претставени како апели, во суштина се форма на институционален притисок и можна цензура, што е спротивно на основните демократски принципи и правото на слобода на изразување“, велат од ЗНМ.
Потсетуваат дека членот 16 од Уставот гарантира слобода на јавното информирање и забрана на цензурата, а прашањата поврзани со новинарската етика и професионализмот припаѓаат исклучиво на саморегулаторната сфера. За тие прашања постојат Советот за етика во медиумите и Судот на честа при ЗНМ, кои се единствено надлежни да оценуваат евентуални повреди на етичките норми.
„Ги повикуваме новинарите и медиумските работници да продолжат да известуваат со професионализам, етика и чувствителност, особено кога се работи за трагични настани и ранливи групи. Но истовремено, укажуваме дека секој обид за институционално ограничување на пристапот до информации и начинот на известување е неприфатлив и штетен по јавниот интерес“, велат од Здружнието.
ЗНМ останува отворено за дијалог со институциите со цел унапредување на транспарентноста и заемната соработка, но цврсто стои во одбрана на уредувачката независност, медиумската слобода и правото на јавноста да биде информирана – како темелни вредности на секое демократско општество.
Македонија
Евакуација во Психијатриската болница Бардовци, пожарот го зафати дворот

Попладнево избувна пожар во населбата Геге кој се прошири кон населбата Бардовци и зафати дел од површината на дворот на Психијатриската болница Бардовци, обраснат со висока сува трева и дрвја.
Од Центарот за управување со кризи (ЦУК) информираа дека пожарот претставувал опасност да се прошири во целиот комплекс на болницата. Пациентите и персоналот веднаш биле евакуирани, безбедно изнесени надвор од кругот на болницата.
ЦУК под водство на директорот Мухамед Али, побарал дополнителни сили од Бригадата за противпожарна заштита (БППЗ) и координирал со Хеликоптерската единица на Министерството за внатрешни работи (МВР). Првично се разгледувала можноста за пренасочување на воздушната поддршка, која дејствувала во општина Чучер Сандево – Блаце, за да помогне во гаснењето на пожарот во Бардовци.
Во моментот, пожарот е ставен под контрола и нема потреба од дополнителна воздушна поддршка. Хеликоптерот на МВР останува ангажиран кај Блаце, општина Чучер Сандево.
На лице место, заедно со директорот на ЦУК, Мухамед Али, беше и директорот на болницата, Иса Абдулаи, кои ја координираа целата акција.
Македонија
Хеликоптер го гасне пожарот кај Блаце

Хеликоптер на Министерството за внатрешни работи е веќе вклучен во акцијата за гаснење на пожарот кој избувна над магистралниот пат Скопје – Граничен премин Блаце.
Пожарот избил на потегот пред тунелот, од десната страна на коловозот. Зафатил тежок и непристапен терен, па по дојава на бројот за итни случаи 112, Центарот за управување со кризи (ЦУК) веднаш побарал воздухопловна поддршка. Хеликоптерската единица бргу се активирала, а акцијата на терен се координира заедно со припадници на противпожарните служби и други надлежни институции.