Македонија
По пет години се одржа Меѓувладината комисија за трговско-економска и научно-техничка соработка со Русија

Денеска во Охрид Меѓувладината комисија за трговско-економска и научно-техничка соработка помеѓу Република Северна Македонија и Руската Федерација одржа седница на којашто се разгледаа можностите за соработка помеѓу двете држави во неколку економски области.
Претставниците од двете страни на Меѓувладината комисија разговараа за соработка во областа на трговијата, eнергетиката, туризмот, транспортот, земјоделството, образование, наука и култура, иновации и високи технологии, надворешна соработка.
За поголемиот дел од овие области Комисијата постигна согласност во интерес и на двете страни и во следниот период Комисијата ќе продолжи со работа.
Министерот за земјоделство, шумарство и водостопанство, Трајан Димковски, којшто е ко-претседавач на Комисијата од македонска страна, посочи дека 9. седница на Меѓувладината комисија за трговско – економска и научно- техничка соработка се одржува по 5 години пауза.
„Како држави покажавме интерес за заедничка соработка, тоа се покажа и на вчерашниот бизнис-форум на којшто присуствуваа не само делегации, туку и претставници од коморите на двете држави, коишто разговараа и имаа можност да да се запознаат за потенцијалите за инвестиции со цел да се јакне економската соработка со поддршка од двете влади. Ние од македонска страна ги запознавме што ние планиравме во делот на инвестициите во земјоделството, ги запознавме со планот за инвестиции во откупно-дистрибутивни центри , исто така за можностите за инвестиции во земјоделско земјиште и друго. Се надевам со овие соработки ќе иницираме интерес и од нивна страна, како и јакнење на економските врски помеѓу фирмите“, изјави министерот Димковски.
Заменик-министерот за трговија и индустрија на Руската Федерација и претседател на Комисијата од руската страна, Алексеј Груздев, посочи дека двете држави имаат потенцијал за соработка во повеќе области како што е транспортот, патната инфраструктура, земјоделството, додавајќи дека на бизнис-форумот беа понудени интересни проекти помеѓу бизнис-заедницата од двете држави.
Според последните податоци од Државниот завод за статистика, трговската размена со Русија бележи висок раст. Во првите осум месеци од оваа година, трговијата изнесува 121,4 милиони долари или за 27,3 отсто повеќе од истиот период во 2018 година. Во исто време, извозот на Македонија изнесуваше 30,3 милиони американски долари односно 22,7 отсто повеќе од минатата година истиот период.
Во периодот јануари-септември 2019 остварен е извоз на земјоделско прехранбени производи во вредност од 21,8 милиони долари, наспроти 15,1 милиони долари истиот период 2018 година, што претставува зголемување од 44 отсто.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Муртезани: Блиската и плодна соработка со Австрија и Словенија е дел од една поширока европска приказна за заеднички напредок, стабилност и споделени вредности

Министерот за европски прашања, Орхан Муртезани, денеска одржа заедничка прес-конференција со Сојузната министерка за Европа, интеграција и семејство на Република Австрија, Клаудија Плаколм и со Државната секретарка за европски прашања на Република Словенија, Нева Грашич, во рамките на нивната работна посета на Скопје.
На прес-конференцијата, министерот Муртезани ја истакна блиската и пријателска соработка со Австрија и Словенија, нивната континуирана и принципиелна поддршка за европскиот пат на Северна Македонија, како и заедничката посветеност на продлабочување на партнерството во рамките на европската агенда.
Во своето обраќање, министерот посебно изрази благодарност за солидарноста и помошта што двете држави ја пружија при гаснењето на пожарите во земјава, нагласувајќи дека таквите гестови претставуваат вистинско пријателство на дело и израз на европска блискост и заедништво.
Македонија
Муртезани домаќин на австриската и словенечката делегација: Гласна поддршка за нашата европска иднина

Министерот за европски прашања на Република Северна Македонија, Орхан Муртезани, ги пречека делегациите од Република Австрија и Република Словенија, кои престојуваат во работна посета на земјата, а кои се предводени од Сојузната министерка за Европа, интеграција и семејство на Република Австрија, Клаудија Плаколм и државната секретарка во Министерството за надворешни и европски прашања на Република Словенија, Нева Грашич. Во рамките на посетата се одржаа билатерални средби и заедничка трилатерална средба на која беше потврдена континуираната и принципиелна поддршка од Австрија и Словенија за европската интеграција на Северна Македонија.
На состанокот беше истакната исклучителната важност на продлабочувањето на соработката со двете држави, кои како докажани пријатели и партнери на нашата земја, доследно ја поддржуваат нејзината европска перспектива. Министерот Муртезани изрази благодарност за досегашната силна и видлива поддршка што Австрија ја дава во рамките на политиката на проширување на Европската Унија и за нејзината активна улога во афирмацијата на концептот на постепена интеграција, како средство за побрзо приближување на земјите од Западен Балкан кон европското семејство. Притоа, тој потенцираше дека Северна Македонија останува посветена на исполнувањето на обврските и реформите врз основа на заслуги и очекува европскиот процес да продолжи со јасна и меритократска динамика.
Во разговорите со австриската страна беше нагласено значењето на ангажманот на Австриската агенција за развој (ADA) во регионот, особено во областите на добро владеење, владеење на правото, одржлив и инклузивен економски развој, како и заштита на животната средина и климатските политики. Министерот Муртезани ја изрази подготвеноста за посилно вклучување на Агенцијата во координациските механизми на Владата, како и интерес за воспоставување постојано претставништво на ADA во земјата, со цел уште поефикасна реализација на заедничките развојни приоритети.
Во рамките на разговорите со словенечката делегација, беше потврдена долгогодишната традиција на пријателство и блиска соработка меѓу двете земји, кои немаат отворени прашања и се одликуваат со исклучително партнерски односи. Словенија и понатаму останува еден од најгласните и најконзистентни поддржувачи на европската интеграција на Северна Македонија, како и активен учесник во реализацијата на билатерални и регионални проекти за институционално зајакнување и развој. Во тој контекст, беше посочена и успешната имплементација на повеќе инфраструктурни и енергетски проекти финансирани со словенечки развојни средства, насочени кон заштита на животната средина, дигитализација, иновации и локален економски развој.
Министерот Муртезани ја нагласи подготвеноста на Република Северна Македонија за натамошно интензивирање на политичкиот дијалог и продлабочување на соработката со Република Австрија и Република Словенија, во духот на заедничките европски вредности и регионалната солидарност. Тој подвлече дека искреното пријателство и конкретната поддршка што нашата земја ги добива од овие две држави претставуваат значаен поттик за продолжување на реформскиот процес и забрзување на европската интеграција на Северна Македонија.
Македонија
Заев: Најостро и категорично ги отфрлам лагите и клеветењата од Мицкоски за наводни „куферчиња со пари од поранешен премиер од Бугарија“

„Небулози, клевети и навреди се методите на Мицкоски со кои сака да се оправда за катастрофата која и ја нанесува на целата држава. Неспособноста да испорача макар и еден единствен резултат во која било сфера од општеството и политиката, залиена со неговата самобендисаност и аздисаност ќе го турне во политичка провалија. Но, ќе мораме да внимаваме да не ни ја повлече и државата со себе во таа провалија“, реагира поранешниот претседател на СДСМ и експремиер, Зоран Заев.
„Најостро и категорично ги отфрлам лагите и клеветењата од Мицкоски за наводни “куферчиња со пари од поранешен премиер од Бугарија” како невистини и како очаен обид на неспособниот премиер да го пренасочи вниманието на јавноста од неговите неуспеси кон неговите измислици.
А, кога сме веќе кај куферите, видовме во снимките што сами си ги пуштија во јавност дека експерти за куфери со пари се токму неговите поддржувачи и финансиери. Оние за кои се фалеше дека му ги плаќале сметките за струја во Белата палата, оние несудени бугарски конзули и осудени криминалци пуштени да се бранат од слобода за да ја напаѓаат опозицијата“, додава Заев.