Владата на денешната седница ја разгледа и усвои информацијата за доделување на повеќегодишен договор за јавна набавка на 120 еколошки автобуси за градски превоз.

Министерството за транспорт е задолжено да ја отпочне постапката за јавна набавка.

Распределбата ќе се изврши согласно ургентноста, економската оправданост и реалните потреби на секоја од единиците на локалната самоуправа, се вели во информацијата од владината прес-служба.

Владата на денешната 66 седница го прифати предложениот концепт за организација на ресурсен центар за поддршка на општините.

Предложениот концепт за ресурсен центар за поддршка на општините ќе обезбеди сериозна поддршка за јакнење на капацитетите на локално ниво, што ќе доведе до поттикнување на поефикасен локален развој, а паралелно со ова ќе се обезбеди подобрена соработка помеѓу локалната и централната власт, велат од Владата.

Прва компонента која ја опфаќа овој концепт е Фонд за техничка документација (ФТД) – овој финансиски инструмент/шема за грантови за финансирање на општините и на центрите за развој на планските региони, за изработка на сеопфатна техничка документација за проекти за развој на инфраструктурата е веќе пилотиран во рамки на проектот „Градење на општински капацитети за имплементација на проекти“ и се спроведува во партнерски однос од страна на Министерството за локална самоуправа, УНДП и Шведската развојна агенција – SIDA. Втора компонента е поддршка и развој на капацитетите на општинската администрација – оваа компонента би се реализирала преку: обуки, стручна помош, размена на искуства и поддршка на меѓуопштинската соработка. Додека пак, трета компонента е прегледност на можности за финансирање на проектна основа-платформа со сите можности за финансирање на проектна основа. Следење и интегрирање на сите огласи за распределба на буџетски средства кон општините, како и отворени повици за повлекување на донаторски средства.

Министерот за правда Игор Филков смета дека Судскиот совет е повикан да реагира за пресудата од 2 години затвор за обвинетиот Менсур Пајазити, кој смртно ја прегази 22-годишната Теодора Ристовска.

Неговата изјава следува по бурните реакции во јавноста дека казната е прениска и по прозивките до судијата Елведин Феради, кој ја изрече пресудата.

Филков рече дека реакцијата на јавноста е оној глас на народот што е многу важен и кој треба да допре до сите, вклучително и до Советот, кој е повикан да реагира.

„Тие 2 процента доверба што му се доделени на судството уште еднаш се покажа дека не се бадијала“, рече министерот.

Претходно, на пресудта се осврна и премиерот Христијан Мицкоски, кој го повика Судскиот совет да го разгледа работењето на судијата Елведин Ферати и повторно да се анализира пресудата.

„Јас не само што не сметам дека правдата е задоволена, но и како претседател на Владата, како човек и родител на две деца, силно сум разочаран. Ова не е правда“, рече премиерот.

Судијата Елведин Ферати претходно беше споменуван во јавноста како лице за кое се води предистрага дека си ги поправал оценките со пречкртување на тетовскиот универзитет. Државниот просветен инспекторат лани утврди дека три оценки во неговото досие биле променети со пречкртување. Предметот бил затворен откога јавниот обвинител ги добил документите, кои потврдуваат дека Ферати ги преполагал овие предмети и затоа претходните оценки биле пречкртани.

Теодора Ристовска беше смртно прегазена во август 2022 година. На првото судење во ноември 2023 година, по признавањето вина, Пајазити беше осуден на три години и шест месеци затвор. По жалбата, Апелацискиот суд ја намали казната на две години затвор, па Врховниот суд ги укина двете пресуди на Основниот и на Апелацискиот суд и предметот го врати на повторно судење.