„За жал поради начинот на кој што владеевте изминативе 7 години ДУИ и СДСМ, ние денес сме таму каде што сме, а ова има можност цела јавност да види кои се луѓето кои прашуваат дали сме за ЕУ или Русија. Ова се луѓето кои ги бранат интересите. Кога вие зборувате дали сме за Русија или Европа замислете до која ситуација дојдовме. Ајде да видиме кој што направи за Русија, а кој за ЕУ“, вака претседателот на Владата, Христијан Мицкоски на денешната собраниска седница за пратенички прашања одговори на прашањето на пратеникот Блерим Беџети за тоа дали Владата е со Европа или Русија.

Тој понатаму додаде дека Беџети пред да поставува вакви прашања треба да се присети на анегдотата којашто кружи за тоа како неговата партија заедно со тогашниот коалициски партнер СДСМ на крајно неевропски начин кроеле планови за обезбедување пратеници за уставните измени.

„Има анегдота која вели дека овде во Собранието кога се гласаше за промена на уставното име во една канцеларија неколкумина претставници од политичката партија ДУИ се обидувале со поранешни припадници и членови на највисокото раководство на ВМРО-ДПМНЕ да постигнат консензус околу тие уставни измени. Таа анегдота вели дека еден од соговорниците коишто биле тогаш дел од највисокото раководство на ВМРО-ДПМНЕ им одговорил, рекол видете овие неколкумина можете да ги придобиете и со еден разговор можете да добиете ако им возвратите кој да го амнестирате од криминалот, со кој да му дадете некој тендер има градежна фирма знаете и слично и на тој начин ќе дојдете до 80 пратеника и до промената на уставното име. Така вели анегдотата, јас не велам дека е тоа вистина. Па таа анегдота во канцеларијата на еден од поранешните високи државни претставници ја пренесува, така вели анегдотата, висок функционер на ДУИ. И го пренесува ова искуство тој вели, видете сега треба истото да го направиме со ова ВМРО-ДПМНЕ сега и да најдеме 80 пратеници и да завршиме со промената на Уставот. Но, еден од соговорниците, така вели анегдотата, на состанокот кај еден висок претставник на раководството на државата од коалицијата поддржан ДУИ и СДСМ, му рекол види Али нашиве пријатели коишто тогаш ни помогнаа не се веќе во ВМРО-ДПМНЕ, што да правиме. Не се? А, што ќе направиме за да бидат? Ми текна, ќе го менуваме Кривичниот законик и тие што се тука ќе дојдат, тие што се тука ќе бидат мотивирани. Како ќе го менуваме ќе ни го закочат овие вмровциве? Ај со Левица и ќе се договориме некако, ама вмровциве, како со нив ќе се договориме? И ајде ќе тераме ќе му залепиме европско знаме, па ќе тераме. Така вели анегдотата, јас не знам дали е вистина ова, но така вели анегдотата кој е за ЕУ и кој е за Русија. Па, еден му вели во таа анегдота, абе малку штета ни нанесе ова голобрадово момче, трговски цел, му викавме само првиот кат да го купи, а тој решил трговски па трговски ќе купува момче кое реши трговци да купува. Абе немој трговски му велиме барем првиот кат купи го еве, не мора цел трговски. Кога наеднаш сватот на еден од високите претставници на политичката партија ДУИ со скап Ролс Ројс на брзинка се паркира пред резиденцијата на тој висок претставник на државата поддржан од коалицијата СДСМ и ДУИ и наеднаш сватот го кани да влезе во возилото, така вели анегдотата и го носи во еден ултра скап дуќан во центарот на градот да одберат туристичко патување во една скапа, би рекол егзотична дестинација за да можат на мира да го прават планот околу тоа како да обезбедат 80 пратеници. Така вели анегдотата. Јас повторно кажувам, не знам дали е ова вистина, но така вели анегдотата за овие коишто се денеска за ЕУ“, потенцираше Мицкоски и додаде дека ЕУ е вредност во која што се почитуваат законите, а не да се понижуваат граѓаните со играње фудбалчиња и баскет по канцеларии.

„ЕУ е вредност која што не подразбира вакви анегдоти. ЕУ е вредност во којашто се почитуваат законите, а не се понижуваат граѓаните со играње фудбалчиња, играње баскет итн. ЕУ подразбира независно судство, ЕУ подразбира вредности коишто овие господа овде пред мене не знаат ни како изгледаат, а камоли пак да се повикуваат на тие вредности. Почитуван Блерим Беџети, оваа Влада може да ви држи лекции за ЕУ и за вредностите коишто ги носи ЕУ. Можете да учите како требало повеќе од 20 години користејќи ги привилегиите на власта да се борите за вредностите на ЕУ. Јас да бев на ваше место ќе се присетив на оваа анегдота којашто циркулира тука низ Парламентот и ќе извлечев некаква поука од сето тоа. Жалам што и вас ве однесоа во длабокото“, заклучи Мицкоски.

Пратеникот на СДСМ Оливер Спасовски на денешната собраниска седница посветена на пратенички прашања, потсети на лицемерниот однос на ВМРО-ДПМНЕ во парламентот кога беше присутна претседателката на Европската комисија Фон Дер Лајен во однос на францускиот предлог, односно таканаречениот бугарски диктат и на променетиот став на власта денеска. Спасовски го праша Мицкоски дали ќе ја разреши министерката Сања Божиновска затоа што ја излажа јавноста за нејзиното бугарско државјанство.

-Сега имаме состојба којашто веројатно е променета, а се однесува на носењето на одлуките при креирањето на владата. Впрочем излегоа информации во јавноста дека во владата имаме министер кој се изјаснува дека е со бугарска самосвест, немам ништо против тоа е природно право и секој може тоа да го каже. Меѓутоа прашањето ми е дали при составот на владата, при разговорите што сте ги имале со кандидатите, бевте информирани за една ваква ситуација и можеби начелото: Прво Бугарите во Владата, па после во Уставот ќе вроди со плод и тоа е начинот на којшто ќе дојдете до промена на Уставот, нели новиот план што го претставивте и во изборната кампања и на изборите. Еднаш Божиновска велеше дека нема бугарско државајнство, потоа дека адвокати биле одговорни, за да излезе документ, потпишан од неа дека има бугарска самосвест. Еве го тој документ. Она што сега во јавноста кружи сакам да ве прашам дали ќе се побара одговорност од министерката Сања Божиновска?, рече пратеникот на СДСМ, Оливер Спасовски, во прашањето упатено до премиерот Мицкоски.

Пратеникот Спасовски му врачи примерок на Мицкоски од изјавата на Божиновска за бугарската самосвест.

Претседателот на Владата, Христијан Мицкоски на денешната собраниска седница за пратенички прашања истакна дека за ДУИ ветингот е ставот, но позади завесата е тефтерчето од Мала Речица од каде доаѓаат одлуките, при што потенцираше дека започнуваат реформите во судството и обвинителството и тие конечно ќе бидат ослободени.

„За Уставниот суд, мислев дека се шегувате, кога ќе го види човек на Уставниот суд мислев дека е провоаприлска шега, но шегата да ја оставиме за друг пат. Во услови кога не постои човек кој верува дека немаме партизација во судството, дека Уставниот суд е класичен пример како изгледаше „Кацарска судството“, вие велите дека ВМРО-ДПМНЕ прави притисок. Сите тие судии се избрани со мнозинството на тие кои сега се опозиција, ДУИ и СДСМ. Тогаш може да кажете дека ВМРО-ДПМНЕ има голема улога врз носењето на одлуките во Мала Речица па поставувате вакви прашања да ние добиеме политички поени“, изјави премиерот одговарајќи на пратеничко прашање од пратеникот од ДУИ, Блерим Беџети кој обвини за влијание врз судот.

Мицкоски му посочи на Беџети дека ДУИ се тие кои не треба да прават притисок врз Уставниот суд и другите судови.

„Влијанието кое сè уште се чувствува во судско-обвинителскиот систем кај нас конечно го департизираме и тоа ни е цел. Ќе го направиме тоа, имаше период кога чекавме предлози, сугестии, како одговорна влада сакавме да слушнеме, но за жал не добивме ниту една сугестија која цениме дека може да биде аплицирана. Следната недела ќе имаме координација и започнуваме со реформите. Почнуваме со реформата во Судскиот совет, па Совет на јавни обвинители“, изјави Мицкоски.

„Гледаме што се случува во Академијата за судии и јавни обвинители, браќа, братучеди на поранешни блиски соработници на поранешниот министер за внатрешни работи, сестри на пратеничка од СДСМ и претседателка на Унија на жени на СДСМ е дел од Управниот одбор.

Состојбата е алармантна во судството и верувајте дека набрзо оваа Влада ќе направи чекор на кој сите ќе бидат горди и ќе се забележи во следниот извештај за напредок од страна на Европската Комисија“, рече Мицкоски.