Потпишана е заедничка декларација помеѓу Царинската управа на Македонија и Министерството за трговија на Република Турција за царинска соработка, со што двете страни се обврзуваат заеднички да дејствуваат во борбата против организираниот криминал и забрзување на протокот на легална трговија.

Заедничката декларација денеска во Анкара ја потпишаа директорот на Царинската управа на Македонија, Бобан Николовски, и заменик-министерот за трговија на Република Турција и надлежен за царински политики, Сезаи Учармак.

„Заедничката декларација е потврда за нашата посветеност на блиска соработка и заемна поддршка во остварување на заедничките цели – жестока борба против организираниот криминал и унапредување на легалната трговија. Со декларацијата се обврзуваме на креирање заеднички профили на ризик, директна комуникација во реално време, размена на разузнавачки информации и учество во заеднички операции со цел спречување и разобличување криминални структури. Паралелно, се заложуваме за поедноставување на царинските постапки, размена на експертиза и заемна поддршка во спроведувањето меѓународни царински конвенции и стандарди. Дополнително, со цел зголемување на транспарентноста, ќе работиме на промоција на програмите за доверливи економски оператори и унапредување на соработката во сите царински области“, изјави директорот Николовски.

Заменик-министерот за трговија на Република Турција, Учармак, изјави дека двете служби имаат многу области и теми за соработка и оти денешниот договор е потврда за нивната посветеност на заедничко дејствување во овие области.

„Двете држави се наоѓаат на важен транспортен коридор и делат заеднички цели како земји кандидати за членство во Европската Унија. Двете страни ги применуваат истите меѓународни правила и стандарди, со цел да се олесни и забрза меѓународната соработка“, изјави заменик-министерот Учармак.

Во Анкара, директорот Николовски, заедно со помошник-директорите за контрола и истраги, царински систем, ИКТ и меѓународна соработка, оствари билатерална средба со Сезаи Учармак, заменик-министер за трговија на Република Турција, Мустафа Ѓумуш, генерален директор на Генералниот директорат за царини, Раиф Џан, генерален директор за анализа на трговијата и анализа на ризик, како и други високи претставници на Генералниот директорат за царини на Република Турција.

Во рамките на средбите во Анкара ќе биде одржан и технички состанок на експертско ниво, на кој двете страни ќе ги разгледаат конкретните чекори за справување со идните предизвици и интензивирање на соработката.