Македонија
Потпишани договорите за 26 идни офицери
Дваесет и шест млади дипломирани граѓани денеска во Воената академија потпишаа договори за стручно оспособување и усовршување, со што по шест месеци ќе се стекнат со офицерски чинови и ќе добијат постојано вработување во Армијата на Република Северна Македонија.
Со одлука на Влада, наместо 3.500 како досега, месечниот надоместок за време на обуката ќе биде во висина на месечна просечна плата, односно околу 25.000 денари.
Министерката Шекеринска им честиташе на 26-темина граѓани, идни офицери и м порача дека Армијата има потреба од вакви експерти.
„Драго ми е што денеска им посакавме добредојде на 26 млади луѓе, во нашата Армија. Тоа се млади коишто завршиле цивилни факултети – електроинженери, машински инженери, хемичари, нутриционисти, сообраќајни, градежни инженери и лекари и коишто сега ќе почнат да ја градат својата кариера во Армијата“, рече министерката.
Шекеринска рече дека во периодот на обука платата на лицата на стручно оспособување и усовршување ќе биде околу 25.000 денари, а потоа со стекнувањето на чинот поручник, сметано со двете зголемувања на платите на припадниците на Армијата, минатата година и септември годинава, таа ќе изнесува над 30.000 денари.
Министерката посочи дека истата одредба важи и за кандидатите за пилоти, каде исто така е зголемен бројот на пријавени кандидати.
„Ги обучувате, очекувате да бидат квалитетни, многу стручни, многу подготвени, а од друга страна голем период ги оставате без сериозен надомест. Ова го променивме со одлука на Влада и на ваков начин Армијата ќе може да регрутира и да обезбеди експерти кои и се неопходни во сите служби – логистичка, интендантска, сообраќајна, правна, финансиска служба. На тој начин им ги зголемивме и шансите на младите во нашата држава“, истакна министерката.
26-те млади граѓани на нашата татковина беа избрани по објавениот конкурс од страна на Министерството за одбрана февруари годинава, а по стекнувањето со офицерски чин, ќе бидат распоредени во техничката, интендантската, сообраќајната, санитетската, логистичката и правната служба на Армијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Ледени зрна на одделни патни правци: ЦУК апелира на зголемена внимателност поради заледување на патиштата
Центарот за управување со кризи известува дека денес, во попладневните часови, на одделни патни правци е евидентирана појава на врнежи од ледени зрна, кои предизвикуваат брзо и ненадејно заледување на коловозите, особено во повисоките и планинските предели.
Се апелира до сите учесници во сообраќајот да покажат зголемена внимателност, да ја прилагодат брзината според условите на патот, да одржуваат поголемо безбедно растојание и задолжително да користат соодветна зимска опрема.
Македонија
Градоначалникот на Битола им се придружи на младите бадникари во изработката на бадниковите ѕвезди
Пред дестина дена започнаа подготовките за годинашната Бадникова поворкa која ќе се одржи годинава и во Битола, како и во многу други градови и населени места во Македонија.
На младите бадникари-деца од различни возрасти во подготовката, односно изработката на бадниковите ѕвезди, вечерва им се приклучи и градоначалникот на Битола, Тони Коњановски.
Организаторите на поворката велат дека вредните детски раце неуморно и со љубов и верба во традицијата ги изработуваат овие ѕвезди, подготвувајќи се за Бадник.
На 6 јануари на големиот верски празник Бадник, собирно место ќе биде плоштадот „Магнолија“ од каде ќе се упатат кон Соборниот храм „Св. Великомаченик Димитриј“, а потоа и низ Широк Сокак до Офицерскиот дом каде ќе биде завршниот дел на поворката, велат од Општина Битола.
Организаторите упатуваат повик до сите оние кои што сакаат да бидат дел од Бадниковата поворка на големиот празник да им се приклучат.
Македонија
МВР со посебен план за безбедност и сообраќај во Маврово за зимската туристичка сезона, најави Тошковски
Министерот за внатрешни работи Панче Тошковски денеска оствари работна посета на Полициското одделение Маврово, Полициското одделение Ростуше и Полициската станица за граничен надзор Жировница, при што се запозна со тековните активности, условите за работа и конкретните предизвици со кои се соочуваат полициските службеници на терен.
„Во ПО Маврово ќе се изготви посебен план за претстојната зимска туристичка сезона, со цел овозможување подобар проток на сообраќајот, навремено управување со зголемениот број посетители и распоредување на соодветен број полициски службеници за одржување на јавниот ред и мир.“, потенцираше Тошковски.
При посетата на Полициското одделение Ростуше беше разгледана можноста за обука на полициски службеници за вршење увиди на сообраќајни незгоди, што ќе овозможи побрзо и поефикасно завршување на постапките на лице место. Оваа мерка ќе придонесе за намалување на времето на чекање, избегнување подолготрајни блокади на сообраќајниците и зголемување на функционалноста на системот, имајќи предвид дека досега овие увиди ги вршеа екипи од Гостивар.
Во Полициската станица за граничен надзор Жировница беше отворено и прашањето за можност дел од просторот во рамки на станицата да биде отстапен на општината, со цел обезбедување паркинг простор за жителите, како практично и рационално решение во интерес на локалната заедница.

