Деветтата седница на Централниот одбор на СДСМ почна пред малку во Охрид. Претседателот на Социјалдемократскиот сојуз, Зоран Заев, денеска од Преспа најави, како што рече, пријатни изненадувања на состанокот.

„Централниот одбор денеска треба да го избере Извршниот одбор на партијата, секретарите….. Имавме консултации пред состанокот со заменик-претседателот и генералниот секретар, но мислам дека ќе има пријатни изненадувања кои се типични за левичарските партии и верувам дека тоа ќе биде убава кадровска импликација за да можеме да ги мотивираме и другите политички партии и општеството да се менуваме кон подобро“, рече Заев.

На седницата ќе се дебатира за суштинските промени во партијата, новиот систем на делување и работа на партијата, напредокот на државата, а се очекува и заокружување на внатрепартиските промени и избор на ново партиско раководство.

На седницата ќе се разговара и за политичката ситуација во државата како и за позитивниот извештај од ЕУ и ветувањето и гаранциите кои ги даде Германија дека Бундестагот во септември ќе даде позитивен сигнал за преговори со Унијата.

Минатиот месец по барање на Заев беа разрешени сите претседатели на општиниски организации, шесте потпрестедатели на партијата и генералниот секретар Александар Кирацовски. За нов генерален секретар беше назначен министерот за земјоделство Љупчо Николовски, а минатата недела беа избрани и 30 претседатели на општински организации.

Од СДСМ најавија дека по завршување со промените внатре во партијата промени ќе има и во централната и локална власт. Сметаат дека нема потреба од предвремени парламентарни избори, сепак не се исклучува можноста да се дискутира за тоа. Партијата очекува во септември датум за преговори со ЕУ, а истите да почнат до крајот на годината.