Македонија
Почна увидот во Избирачкиот список за гласање во странство

Увидот во Избирачкиот список за гласање во странство за претседателските избори почна вчера и ќе трае до 14 март.
Државната изборна комисија преку соопштение ги повикува државјаните на Република Северна Македонија во странство, кои сакаат да го остварат своето гласачко право, да извршат увид во посебните изводи од Избирачкиот список во просториите на Дипломатско-конзуларните претставништва во период од 23 февруари до 14 март.
При увидот државјаните на се идентификуваат пред надлежно лице со важечка патна исправа или важечка лична карта издадена од надлежен орган на земјава, велат од ДИК.
Увидот може да се изврши и преку интернет страницата на Државната изборна комисија.
Во периодот од 8 февруари, кога собранискиот спикер ги распиша изборите, па се до 14 март пријавата за гласање, своерачно потпишана се доставува до ДКП, односно конзуларната канцеларија на земјава во одредената држава на адреса на ДКП/КК или се испраќа преку веб апликацијата поставена на интернет страницата на ДИК за државјаните на земјава, кои се на привремен престој во странство повеќе од три месеци или се на привремена работа или престој во странство повеќе од една година.
Државјаните на Република Северна Македонија, кои претходно го имаат пријавено пред надлежен орган својот привремен престој во странство или привремена работа во странство, односно државјаните за кои МВР има евиденција дека се на привремен престој или привремена работа во странство, поднесуваат само пријава.
Државјаните на земјава, кои претходно не пријавиле дека имаат привремен престој или се на привремена работа во странство, задолжително доставуваат скенирана копија од документи како доказ за престој во странство и тоа: потврда или копија од документот како доказ за престој во странство повеќе од три месеци или за привремена работа или престој во странство повеќе од една година или дозвола за престој или работа во странство издадена од надлежен орган од соодветна држава или копија од дозволата за престој или работа во странство.
Право на глас имаат сите државјани на Република Северна Македонија, кои имаат пријавено последно живеалиште во земјава, а на денот на гласањето привремено престојуваат во друга земја, повеќе од три месеци или се на привремена работа или престој во друга држава повеќе од една година, согласно евиденцијата од надлежниот орган, а кои од 8 февруари до 14 март доставиле пријава за гласање и се запишани во посебните изводи од Избирачкиот список.
На изборите за претседател можат да гласаат само државјани на Република Северна Македонија кои се на привремена работа или престој во странство, а кои доставиле пријава за гласање и се запишани во посебните изводи од Избирачкиот список. Сите останати државјани на Република Северна Македонија, кои имаат избирачко право, а кои не поднеле пријава за гласање, ќе бидат запишани во изводите од Избирачкиот список за гласање во Република Северна Македонија, согласно нивото пријавено последно живеалиште во земјава.
Гласањето ќе се одржи на 20 април 2019 година во период од седум до 19 часот, во просториите на ДКП, односно конзуларната канцеларија на земјава во одредената држава.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Комисијата утврди дискриминација врз професионалните војници – синдикатот бара итни законски измени

Комисијата за спречување и заштита од дискриминација утврди индиректна дискриминација врз професионалните војници од страна на Министерството за одбрана, информира Независниот синдикат на професионални војници СО Скопје.
Претставката до Комисијата ја поднел Александар Насковски, претседател на синдикатот и професионален војник, на 12 ноември 2024 година. Според него, Министерството со години не го трансформира работниот однос на професионалните војници од определено на неопределено време, спротивно на член 46 од Законот за работни односи.
„Професионалните војници се единствената категорија вработени во државата кои работат и по 25 години со договори на определено време, често продолжувани и по седум или осум пати, без можност да остварат право на пензија“, изјави Насковски.
По долготрајна институционална игнорација, синдикатот на 3 јуни 2025 година достави предлог-закон за изменување и дополнување на Законот за служба во Армијата до Собранието и сите пратенички групи. Со предложените измени се предвидува конечно уредување на статусот на професионалните војници и спроведување на препораките од Комисијата.
Синдикатот очекува Министерството за одбрана и пратениците да постапат по препораките и да ја исправат, како што велат, децениската неправда, со што ќе се постигне и буџетска заштеда за институцијата.
Македонија
Ангелов на состанок во Берово: Планирање на акција за справување со пожарот над Русиново

Раководителот на Главниот штаб за управување со кризи и директор на Дирекцијата за заштита и спасување (ДЗС), Стојанче Ангелов, синоќа присуствуваше на координативниот состанок на Општинскиот штаб за заштита и спасување во Берово, предводен од градоначалникот Звонко Пекевски.
На работниот состанок се анализираа извештаите за движењето и интензитетот на пожарот во планината над селото Русиново. Како главни предизвици беа посочени променливиот ветер, остатоците од стари пожари – шупливи дрвја кои при горење паѓаат по стрмнините – како и непристапниот терен, што значително го отежнува гаснењето.
Според соопштението од ДЗС, состанокот траел подолго поради разгледување на повеќе стратегии за утринска интервенција. Се планира комбинирана акција со теренски сили, механизација и ангажман на воздухоплови, чија активност ќе се координира од земја во согласност со конкретните дневни услови.
Ова е дел од континуираните напори за справување со активните пожари во источниот дел на земјата.
Македонија
Tри улици од Карпош ќе останат околу шест часа без струја

Без електрична енергија денес ќе останат корисниците од три улици во Карпош.
Во периодот од 08.15 до 13.30 часот, без струја ќе бидат корисниците од улиците Иван Цанкар – парни броеви, Франц Прешерн – непарни броеви и Вангел Дину. ( општина Карпош ), информира ЦУК по известување добиено од ЕВН.