В недела, 23 јуни, со почеток од 21 часот, во Градскиот парк, ќе почне забавата со музика од култните цртани филмови од земјите од источниот блок кои го обележаа детството на генерациите од 70-тите и 80-тите години од минатиот век. „Балтазар“, „Ну погоди“, „Как казаки“, „Козле Бозле“, „Густав“, „Балтазар“, „Мечето Ушко“ и многу други ќе бидат дел од првиот концерт „Филхармонијата на отворено“, што се реализира во соработка со МКЦ и со Град Скопје.

На овој концерт посетителите на „Градскиот летен парк“ ќе слушаат уникатна изведба на симфонискиот оркестар и на хорот, проследени со специјална видеопроекција на огромни платна и светлосен дизајн, сето тоа во знакот на старите добри и култни цртани филмови.

Градоначалникот Шилегов, заедно со директорот на Националната филхармонија, Виктор Илиески, денеска ги соопшти деталите и ги покани граѓаните на овој концерт.

„И годинава крајот на јуни го резервиравме за концерти на отворено во рамките на проектот ‘Градски летен парк’. Во соработка со Филхармонијата и со МКЦ, на 23 и 29 јуни граѓаните ќе може да уживаат во композиции изведени од симфониски оркестар и хор, што е ретка практика во светот. Овој проект ќе ги спои разните генерации, па затоа ве поканувам сите да присуствувате и искрено се надевам дека заедно ќе уживаме во уникатната изведба на Филхармонијата на отворено“, истакна Шилегов.

Аранжманите за музичките теми ги направи Владимир Николов, а оркестарот ќе настапи под диригентската палка на Џијан Емин.

„Скопје добива нова традиција, концерти на отворено во Градскиот парк. На овој начин ги промовираме вистинските културни вредности и содржини затоа што културата треба да биде за сите граѓани“, додаде Шилегов.

Тој посочи дека Градскиот парк е место за забава и рекреација за сите граѓани поради што Град Скопје континуирано работи на реконструкција на тревниците, одржување и чистење на езерцата, поставување нова урбана опрема, како и воведување нови услови за продажба на пијалаци и храна.