Пожарот кај селото Раовиќ во општината Сарај е сè уште активен, каде на засега неутврдена површина гори мешана шума.

Од Центарот за управување со кризи информираат дека во гасењето на пожарот учествуваат 50 припадници на специјалните единици на МВР во содејство со 7 француски експерти кои со полициски хелихоптер беа префрлени на сртот на кањонот Матка и извршија комплетна претрага и догасување на постоечките жаришта.

Денеска во 14 часот, како поддршка се приклучи и Црногорскиот хелихоптер со 12 налета испуштајќи голема количина на вода.

„Запрепастува фактот дека и покрај 8 дневното активно гасење на пожарот, утврдено е дополнително странично повеќеметарски оддалечено повторно потпалување – тлеење, а самото тоа не дозволува целосно ликвидирање на пожарот. Во неколку наврати, денес се дејствуваше и од воздух со хелихоптер на МВР“, велат од ЦУК.

Пожарот кај селото Раовиќ во општината Сарај

Пожарот на отворен простор помеѓу селата Барово и Вешје е целосно ставен под контрола, исклучиво сртот кој ги двои двете села сеуште покажува активност, но денес околу 16.30 часот ГШ при ЦУК одлучи да прати еден хелихоптер да изврши повторна активност со исфрлање на вода на непристапниот срт, а луѓето кои се распоредени околу сртот да извршат целосно догасување. Во денешната активност за гасење на овој пожар учествуваа 50 припадници на АРСМ од страната на село Барово, 60 припадници на специјалните сили на МВР, 20 припадници на Национални Шуми и околу 50тина мештани и вработени на Јавни претпријатија од Демир Капија, како и две ПП екипи од Неготино. Со активноста околу гаснењето на пожарот координираше директорот на ЦУК, Стојанче Ангелов, како и градоначалникот на општина Демир Капија, Лазар Петров.

Пожарот кој се случил вчера во атарот на селото Горно Мелничани општина Центар Жупа денеска беше под контрола, но истиот повторно се активираше околу 13 часот. Во гаснењето на пожарот се ангажирани 1 ПП возило со 5 пожарникари, 20 полицајци, 12 работници од ЈП Национални Шуми, и еден Багер од Општина Центар Жупа. Главниот штаб при ЦУК со оглед на исклучително тешката состојба со пожарот во Центар Жупа, донесе заклучок за утре да се активираат двата хеликоптера во 8 часот наутро, 40 припадници на АРМ, 30 припадници на специјалните полициски сили, 15 припадници на Национални шуми, како и две ТППЕ и еден тим на ДЗС за да помогнат во справување и ставање под контрола на истиот.
Исто така, согласно член 34 од Законот за управување со кризи, донесен е заклучок директорот на ДЗС да активира дополнителни ТППЕ кои се најблиски територијално до општина Центар Жупа.

Пожарот помеѓу селото Црвена Вода и планинарскиот дом Китка, ( Општина Студеничани ) е ставен под контрола.

Шумскиот пожар на подрачјето на општина Кратово во м.в.Кормина, близу селото Емирица, во кој е опожарена борова шума е локализиран.
Во раните утрински часови појавен е и пожар кај мв.Круша, Гевгелиско. Пожарот беше ставен под контрола, но сеуште се на терен екипи од ШС „Кожув“ поради високите температури. Изгорени се околу 2ха квалитетна букова шума.