Јавното претпријатие за државни патишта (ЈПДП) за едно огласено работно место на коридорите 8 и 10 д добило по речиси тројца пријавени. Огласот беше отворен до 25 април, а заинтересираните имаат 13 дена да се пријават.

„На јавниот оглас, кој беше објавен на 13.4.2023 година, до сега се пријавија вкупно 73 работници за 15 работни места за 28 извршители. Со оглед на тоа дека огласот е сè уште активен, односно следува фазата на селекција на кандидатите, во моментот не можеме да дадеме дополнителни  информации“, велат од Јавното претпријатие за „Макфакс“.

Поради тоа што сè уште трае селекцијата на кандидатите од Јавното претпријатие, не кажаа дали планираат дополнителни огласи за вработувања и колкумина од веќе вработените во претпријатието ќе работат на коридорите 8 и 10 д.

Јавното претпријатие објави оглас на кој бара 28 работници чии задолженија ќе бидат исклучиво коридорите 8 и 10 д. Новите вработени во претпријатието ќе имаат основни плати од 29.866 до 70.052 денара, а ќе бидат вработени во јавното претпријатие до завршување на проектот, односно до 22.1.2028 година. Овие плати се за 40-часовна работна недела.

Највисока основна плата, 70.052 денара, се нуди за помошник на главниот координатор, а најниските плати од 29.866 денари се за двајца администратори и двајца возачи.