По 30 години, Битола, конечно, добива прифатилиште за бездомни животни, кое ќе го носи името на најверното куче на светот – Хачико.

На последната 17-та седница на Советот на Општина Битола едногласно беа изгласани две точки: одлука за примање донација во вид на добра од Здружението за заштита на животните и животната средина „Бибевски“ од Битола и одлука за реализација на привремено решение до комплетна реализација на проектот за бездомни животни за поставување боксови на надворешниот простор (платото), кој е предвиден со постојната документација.

Локацијата на прифатилиштето е во склоп на земјоделското училиште во Битола, каде што се извршени и сите теренски подготовки.

„За оние што не ја знаат приказната за Хачико, тоа е куче од расата акита, кое секој ден во текот на цели 10 години го чекало својот сопственик на железничката станица во Токио, кој, за жал, починал, а на ова место тие двајца последен пат се разделиле. Токму оваа верност, истрајност, е потсетник за сите нас дека Битола цели 30 години чека прифатилиште за бездомни животни. 30 години апсолутно ни една локална самоуправа не повела никаква иницијатива за решавање на овој проблем! И по сите политички игри, ширење хистерија, обвинувања и лаги, денес со гордост можам да кажам дека нашата верност кон вас, преточена од приказната на Хачико, станува реалност“, објави претседателката на Советот на Општина Битола, Габриела Илиевска.

„И најважното на кое денес сме особено се гордееме, донација во вредност од 600.000 денари од The Bibevski Foundation за изработка на ограда. Фондацијата со која поинаку има потпишан меморандум за соработка пред избори, а по донесувањето на денешната одлука, и меморандум со Општина Битола. Со ова за краток период ќе завршат градежните работи за надворешниот дел од прифатилиштето и во рок од 30 дена очекуваме дозвола од Агенција за храна и ветеринарство. Дозвола што никогаш ја немала Битола.

Наредна година со следниот буџет за 2023 година обезбедени се 40 милиони за изградба на целиот објект. Верни кон нашите сограѓани битолчани, Битола може поинаку!“ – објави претседателката на Советот на Општина Битола, Габриела Илиевска.

Згрижувањето и обезбедувањето хуман третман на бездомните животни во првата година од мандатот беше еден од приоритетните проекти на граѓанската иницијатива „Поинаку“, недостиг на градот и проблем за голем број битолчани.