Пратениците ја изгласаа потребата од носење на новиот Деловник за работа на Собранието.

Со 78 гласа „за“ и два гласа „воздржан“ од присутните пратеници, Предлог-деловникот денеска го помина првото читање и оди во второ читање како следна фаза од постапката за донесување, односно на амандманска расправа во Комисијата за деловнички и мандатно-имунитетни прашања, а потоа и на пленарна седница.

Деловникот ќе стапи во сила од следниот парламентарен состав.

Претседателот на законодавниот дом, Талат Џафери изјави дека со новиот Деловник ќе се надминат предизвиците со коишто се соочувало Собранието уште од независноста и дека слабостите како и различните толкувања ќе бидат оневозможени.

Џафери, образложувајќи го Предлог-Деловникот од собраниската говорница, рече дека тој е производ на дебата која трае веќе пет години во два собраниски состави, и е пример кој докажува дека политичкиот дијалог во Собранието може да резултира со консензус.

Во иднина, рече Џафери, нема да се повторат ситуациите што ги имавме во минатите состави, вклучувајќи го и овој состав. Ќе има заедничка гаранција дека Собранието не може да се блокира, туку ќе биде функционално во името на граѓаните.
Панчо Минов, претседателот на Комисијата за деловнички и мандатно – имунитетни прашања, информираше дека ова работно тело донесе едногласен став дека има потреба од нов Деловник и дека Собранието треба да продолжи со неговото донесување.

Претседателката на Клубот на пратенички, Лолита Ристова, истакнувајќи дека донесувањето нов Деловник е посебно значен чин за Собранието, се заложи за дополнително унапредување на одредбите од аспект на рамноправната родова застапеност во законодавниот дом. Притоа, таа посочи на одредбите за избор на потпретседатели на Собранието и родовата застапеност во работните тела.

Пратеничката Гордана Силјановска Давкова, посочи дека е позитивно тоа што предлогот е поднесен во редовна постапка и забележа дека во текот на амандманската расправа треба да се обрне внимание на дел од предложените одредби, во насока на нивно прилагодување кон Уставот. Таа посочи и дека е потребно понатамошно унапредување на механизмот пратенички прашања.

Пратеникот Фадил Зендели рече дека со тоа што се уште трае постапката за донесување на новиот Деловник, има доволно простор за подобрување и допрецизирање на

одредбите, при што, подвлече, треба да се најдат долгорочни решенија за одредени ситуации со кои се соочи овој пратенички состав во текот на својот мандат.

Пратеникот Димитар Апасиев рече дека Левица зазеде принципиелен став уште на самиот почеток да излезе од процесот, затоа што смета дека Деловникот на Собранието е прашање кое треба да се реши во рамките на законодавниот дом. Тој најави амандмани во понатамошната постапка за донесување на Деловникот.

Координаторот на пратеничката група на ВМРО-ДПМНЕ, Никола Мицевски, оцени дека очекува новиот Деловник да придонесе за поголема функционалност на законодавниот дом. Потврди дека во новото решение се вклучени повеќето забелешки што биле воочени во текот на практичната примена на Деловникот на Собранието кој е во сила и рече дека при процесот на изготвување сите учесници поаѓале од начелото дека новиот Деловник ќе се применува од новиот собраниски состав.