Македонија
(Видео) Прв случај на коронавирус во земјата

Потврден првиот случај на коронавирус во земјата. Се работи за жена, родена 1970 година, од Скопје. Како што изјави министерот за здравство, Венко Филипче, на вонредна прес-конференција, таа се вратила утрово од Италија, каде што престојувала еден месец.
Тој рече дека биле извршени лабораториски тестирања на материјал од пациентката и дека резултатите покажале оти таа е позитивна на коронавирусот.
Жената патувала со комбе преку Табановце, а потоа со друго домашно возило била пренесена до скопските клиники.
„Нема простор за паника. Пацентката е сместена на Инфективната клиника во Скопје, во одделот за изолација, се третира соодветно за нејзината состојба, со епидемиолошки анализи, прашањата што ѝ беа упатени укажаа дека таа веќе еден месец била во Италија на прошетка и во посета на свои роднини. Ова ни дава право да мислиме дека инкубацијата е одамна помината и дека не претставува опасност да ја пренесе болеста. Сепак, сега се прави проверка на сите патници што патувале со неа во комбето и тие ќе бидат во 14-дневна изолација“, рече Филипче. Тој додаде дека пациентката била болна веќе две недели.
Филипче упати апел до сите институции кои имаат вработени што патувале во Италија да не ги примаат вработените на работните места, туку да останат дома 14 дена во карантин. Рече дека е во интензивна комуникација со грчкиот, српскиот и со косовскиот министер и се преземаат сите мерки.
„Карантин има за сите оние што знаеме дека сигурно имале контакт со заразено лице“, рече Филипче.
Д-р Жарко Караџовски изјави дека стручна екипа од Институтот за јавно здравје веднаш заминал на Инфективната клиника за да направи епидемиолошка анкета и увид на лицето.
„Едно позитивно лице не претставува ризик за преостанатото население. Упатувам смирувачка порака дека нема простор за паника. Спремни сме за половина час да мобилизираме екипа и она што за мене е битно – е дека ние владееме со состојбата. Не можеме да го спречиме трансферот на луѓе, стока, пари и капитал, но имаме контрола врз ситуацијата“, рече тој.
Караџовски изјави дека граничната полиција постапува во согласност со протоколите, односно на сите лица што влегуваат во земјата им се поставуваат 6 епидемиолошки прашања и ако тие изјават дека имаат одредени симптоми на болеста, се тргаат на страна.
Епидемиолошката служба што дежура на скопскиот аеродром, пак, врши скенирање со термокамера и вршат епидемиолошка анкета, а лицата со симптоми на болеста ги тргаат на страна во просторијата за изолација.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Улица во Кисела Вода денес без струја

Корисниците на улицата Кумановска во општина Кисела Вода денес ќе останат без електрична енергија во периодот од 12:00 до 15:00 часот, информираат од ЕВН Македонија АД.
Прекинот е најавен поради технички зафати на дистрибутивната мрежа.
Македонија
Денес сончево и топло, од четврток промена на времето

Утрото ќе биде ведро и посвежо, а преку денот се очекува претежно сончево и топло време, со слаб до умерен ветер од јужен правец. Минималните температури ќе се движат од 6 до 14 степени, додека максималните ќе достигнат од 27 до 33.
Во Скопје ќе преовладува сончево време, со утринска температура до 12 и дневна до 33 степени, информира УХМР.
До среда ќе се задржи стабилно и топло време. Од четврток попладне следува период на променливо облачно време со локални врнежи. Во петок се очекуваат и гремежи, како и умерен до засилен југоисточен ветер.
Температурите ќе бидат во постепено опаѓање, особено за време на викендот.
Македонија
Сиљановска-Давкова во Њујорк: Време е кормилото на ОН да му го довериме на жена

Во рамки на учеството на 80. Генерално собрание на Обединетите нации во Њујорк, претседателката Гордана Сиљановска-Давкова се обрати на состанок на високо ниво по повод 30-годишнината од Четвртата светска конференција за жените.
Во своето обраќање, Сиљановска-Давкова истакна дека иако Пекиншката декларација останува темел на борбата за родова еднаквост, напредокот е нееднаков, кревок и често реверзибилен.
„Насилството врз жените останува неказнето, фемицидот ја осквернува светоста на животот, а жените сè уште се соочуваат со бариери во пристапот до ресурси, лидерство и одлучување,“ рече таа.
Претседателката посочи и на кризата во Обединетите нации, институција основана за заштита на мирот, а денес исправена пред бројни конфликти низ светот. Таа апелираше на храбро лидерство од жени, велејќи:„Ако сме сериозни во врска со мирот, време е да го довериме кормилото на ОН на жена.“
Во нејзиниот говор таа подвлече дека родовата еднаквост не е феминистичка привилегија, туку хуманистички императив, потенцирајќи дека жените се носители на исцелување, сочувство и надеж.
Учесниците на состанокот ја потврдија потребата од посветеност, конкретни политики и ресурси за реализација на визијата од Пекинг и за создавање праведни и просперитетни општества.
Пекиншката декларација, како што потсети Сиљановска-Давкова, повикува на еднакви права и пристап за сите – жени и мажи, девојчиња и момчиња – и тој повик, рече таа, останува ургентен и денес.