Македонија
Предавање на Адеми на Универзитетот „Колумбија“: Членството во ЕУ и НАТО нема алтернатива

На покана на Институтот „Хариман“, министерот Едмонд Адеми одржа предавање на Универзитетот „Колумбија“ во Њујорк на тема „Западен Балкан, Македонија и интеграциските процеси – има ли улога за дијаспората?”
На почетокот од предавањето министерот Адеми се осврна на значењето на земјите од Западен Балкан, како и важноста на нивната стратешка определба кон евро-атлантските интеграции. Во тој контекст министерот ја потенцираше и стратешката определба на земјава за влез во НАТО, истакнувајќи го фактот дека истата датира од 1993 година, кога Собранието ја усвои Резолуцијата за влез на Република Македонија во НАТО. Дополнително на тоа ги потенцираше и конкретните чекори кои земјава ги има преземено од 1993 година до денес, а кои укажуваат на искрените намери на државата кон евро-атлантските интеграции. Министерот Адеми недвосмислено порача дека Владата искрено верува дека наскоро ќе почне процесот на преговори за влез во Европската Унија и дека Република Македонија ќе стане 30. членка на НАТО.
Министерот Адеми се осврна и на искрените намери на Владата за воспоставување соработка со дијаспората на институционално ниво. Во контекст на тоа, истакна дека за првпат во Република Македонија се работи на национална стратегија за соработка со дијаспората. Истата се базира на четири клучни столбови и има за цел да воспостави една рамка преку која ќе се решаваат клучните проблеми на дијаспората и која ќе овозможи воспоставување и продлабочување на соработката помеѓу државата и дијаспората.
На крај, министерот Адеми се заблагодари за поканата да одржи предавање на еден од најреномираните светски универзитети и истакна дека Владата и понатаму засилено ќе продолжи со активности кои забрзано ќе донесат полноправно членство на земјава во ЕУ и НАТО.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Скопје
(Фото) Левица: Учениците во „Ѓорѓија Пулевски“ учат во подруми со влага и смрдеа

Учениците од шесто одделение во основното училиште „Ѓорѓија Пулевски“ во општина Аеродром наставата ја следат во подрумски простории со влага, непријатна миризба и без природна светлина, реагираат од партијата Левица.
Од таму посочуваат дека ваквите услови се недостоинствени за било кое училиште, а не за основци кои треба да учат во здрава средина.
„Овие услови се недостоинствени дури ни за затворски ќелии, а камо ли за деца кои треба да растат во здраво и безбедно училишно опкружување. Загрижени родители алармираат дека на некои ученици им се слошило и повраќале поради неподносливата миризба на мувла и влага“, соопштија од Левица – Аеродром.
Според нив, локалната власт ја сноси целата одговорност за понижувањето на најмладите и изложувањето на здравствен ризик.
„Дополнителен скандал е фактот што ДПМНЕ пред четири години ветија целосна реконструкција на училиштата во општината, но во изминатиот мандат не направија ништо. Наместо елементарни услови, децата се приморани да учат во простории со влага и смрдеа“, додаваат од партијата.
Левица бара итно преместување на учениците во други училници и обезбедување нормални услови за образование.
Македонија
Земјотрес ги разбуди струмичани, епицентарот бил во Валандово

Телеметриската сеизмолошка мрежа на Македонија ноќеска во 02:13 часот регистрираше земјотрес со локална магнитуда 2,2 степени според Рихтеровата скала, со епицентар во епицентралното подрачје Валандово, на околу 116 километри југоисточно од Скопје.
Според Сеизмолошката опсерваторија при Природно-математичкиот факултет во Скопје, потресот бил почувствуван во Струмица и околните места со интензитет од III степени според Европската макросеизмичка скала.
„Се работи за послаб земјотрес кој нема потенцијал да предизвика материјални штети, но поради блискоста на епицентарот, граѓаните во дел од југоисточниот регион го почувствуваа потресот“, велат од Сеизмолошката опсерваторија.
Надлежните апелираат дека ваквите земјотреси се вообичаени за нашето подрачје и дека нема простор за паника.
Македонија
Македонци заминуваат кон грчките плажи, продолжениот викенд предизвика хаос на „Богородица“

Сообраќајот на државните патишта се одвива непречено и по суви коловози, но зголемената фреквенција на возила поради летните одмори и продолжениот викенд во Македонија предизвикува гужви на граничните премини.
Најголеми задржувања моментално се бележат на ГП Богородица, каде за излез од државата се чека околу 40 минути до 1 час. На ГП Табановце, пак, времето на чекање за влез и излез изнесува околу 30 минути. Од другите гранични премини од македонска страна не се евидентирани подолги задржувања.
АМСМ ги потсетува возачите да возат со прилагодена брзина, да ја почитуваат сигнализацијата и да бидат особено внимателни на делниците низ котлини, речни долини и клисури каде е можна појава на одрони. Како критични делници се наведуваат Катланово – Велес, Маврово – Дебар – Струга, Виница – Берово и Кочани – Делчево.
Воедно, возачите треба да бидат подготвени за времен режим на сообраќај. Од 3 септември започнуваат градежни истражувачки работи на делницата Гостивар – Тетово, што ќе траат две недели и ќе се одвиваат под изменет режим. Дополнително, во тек е и санација на мостот Здуње на државниот пат А2 (Гостивар – Стража), каде е воспоставена семафоризација и наизменично пропуштање на возилата во период од шест месеци.